AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៥-- ក្នុងខែកុម្ភៈ ឆ្នាំ២០២៥ អង្គភាពប្រឆាំងអំពើពុករលួយ (អបព ឬACU) ទទួលបានពាក្យប្តឹងសរុបចំនួន៥៥ពីបណ្តារាជធានីខេត្ត និងមានមន្រ្តី៤៧៦រូប បានប្រកាសទ្រព្យសម្បត្តិ និងបំណុល។ 

ឯកឧត្តម សយ ច័ន្ទវិចិត្ត ឧបការី និងជាមន្រ្តីនាំពាក្យអង្គភាពប្រឆាំងអំពើពុករលួយ បានថ្លែងប្រាប់ក្នុងកិច្ចប្រជុំលើកទី៤៤ អាណត្តិទី៣ នៃក្រុមប្រឹក្សាជាតិប្រឆាំងអំពើពុករលួយ  នារសៀលថ្ងៃទី២៥ ខែកុម្ភៈ ឆ្នាំ២០២៥ ថា ការងារប្រកាសទ្រព្យសម្បត្តិ និងបំណុល នាខែកុម្ភៈ ឆ្នាំ២០២៥នេះមានមន្ត្រីចំនួន៤៧៦រូប បានមកប្រកាសទ្រព្យសម្បត្តិ និងបំណុល ក្នុងនោះមន្ត្រីទើបទទួលបានការតែងតាំងថ្មីចំនួន២៦១រូប ដោយឡែកមន្ត្រី២១៥ រូបទៀត បានមកប្រកាសទ្រព្យសម្បត្តិ និងបំណុល ដោយមូលហេតុលាឈប់ និងចប់អាណត្តិ។

មន្រ្តីអ្នកនាំពាក្យអង្គភាពប្រឆាំងអំពើពុករលួយ បានឱ្យដឹងបន្ថែមថា សម្រាប់ការងារពាក្យប្ដឹងនៅខែកុម្ភៈនេះដែរ អង្គភាពប្រឆាំងអំពើពុករលួយបានដំណើរការពិនិត្យ វិភាគ និងធ្វើការសម្រេច លើពាក្យប្ដឹងដែលមានក្នុងខែ សរុបចំនួន ៥៥ ពាក្យប្ដឹង។ ដោយឡែកទាក់ទិនការងារអប់រំត្រូវបានមន្រ្តីអ្នកនាំពាក្យរូបនេះបានឱ្យដឹងផងថា អង្គភាពប្រឆាំងអំពើពុករលួយបានធ្វើការអប់រំ ផ្សព្វផ្សាយដល់សាលាចំនួន១៦នៃក្រុងបានលុង ស្រុកបរកែវ និងស្រុកអូរជុំដល់លោកគ្រូអ្នកគ្រូ ចំនួន១៩៧ រូប កាលពីអំឡុងពាក់កណ្តាលខែកុម្ភៈ ឆ្នាំ២០២៥។

ជាមួយគ្នានេះដែរ ឯកឧត្តម សយ ច័ន្ទវិចិត្ត បានឱ្យដឹងបន្ថែមថា អង្គភាពប្រឆាំងអំពើពុករលួយតាមរយៈយន្តការអនុសញ្ញា អសប ប្រឆាំងអំពើពុករលួយ UNCAC (អ៊ុន កាក់) ជុំទី២ក៏បានរួមកិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងអំពើពុករលួយ។ ក្នុងនេះ អ្នកជំនាញការ អសប បានពិនិត្យនិងផ្តល់អនុសាសន៍ដល់កម្ពុជា ពាក់ព័ន្ធនឹងជំពូកទី២ មាន១៨អនុសាសន៍ (អបព ក្រសួងមុខងារសាធារណៈ ក្រសួងអប់រំ យុវជននិងកីឡា ក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានពន្ធដារ ក្រសួងយុត្តិធម៌ ក្រសួងពាណិជ្ជកម្ម ក្រសួងព័ត៌មាន ធនាគារជាតិកម្ពុជា អង្គភាពស៊ើបការហិរញ្ញវត្ថុកម្ពុជា) ជំពូកទី៥ មាន១០អនុសាសន៍ ដែលមានស្ថាប័នចំនួន១១ ទទួលពិនិត្យ និងកែលម្អ៕

ដោយ៖ ដេប៉ូ