AKP ភ្នំពេញ ថ្ងៃទី០៧ ខែកុម្ភៈ ឆ្នាំ២០២៥--សហព័ន្ធកីឡារាំកម្ពុជាបានប្រកាសជូនដំណឹងពីការប្រកួតកីឡារាំ ជ្រើសរើសជើងឯកថ្នាក់ជាតិប្រចាំឆ្នាំ ២០២៤ ដែលគ្រោងនឹងធ្វើឡើងនាថ្ងៃទី២០-២១ ខែកុម្ភៈ ឆ្នាំ២០២៥ នៅមជ្ឈមណ្ឌលសហប្រតិបត្តិការកម្ពុជា-ជប៉ុន រាជធានីភ្នំពេញ ដោយនឹងផលិតធនធានឆ្នើមៗលើវិញ្ញាសាសរុបចំនួន១៥ ក្នុងគោលដៅចម្បងជ្រើសរើសអត្តពលិកជម្រើសជាតិ ត្រៀមចូលរួមប្រជែងមេដាយជូនជាតិ ក្នុងការប្រកួតកីឡារាំង ជើងឯកអាស៊ី និងជើងឯកពិភពលោក ឆ្នាំ២០២៥។

ថ្លែងប្រាប់ទីភ្នាក់ងារសារព័ត៌មានកម្ពុជា AKP នៅថ្ងៃទី០៧ ខែកុម្ភៈ ឆ្នាំ២០២៥នេះ លោកស្រី ហង់ ស៊ីមន អគ្គលេខាធិការ សហព័ន្ធកីឡារាំកម្ពុជាគូសបញ្ជាក់ថា ៖«នៅក្នុងការប្រកួតដ៏មានសារៈសំខាន់មួយនេះ គឺដើម្បីវាស់ស្ទង់កម្រិតគុណភាពបច្ចេកទេស ដែលកីឡាករ កីឡាការិនីនៅតាមបណ្តាក្លឹប-សមាគមនានាហ្វឹកហាត់កន្លងមក ក្នុងទិសដៅត្រៀមចូលរួមប្រកួតកីឡារាំអន្តរជាតិនានា ជាពិសេសត្រៀមការប្រកួតកីឡារាំ ជ្រើសរើសជើងឯកពិភពលោក និងជើងឯកអាស៊ី ក្នុងឆ្នាំ២០២៥នេះដែរ។ ដូច្នេះ តាមរយៈការប្រកួតជើងឯកថ្នាក់ជាតិប្រចាំឆ្នាំ២០២៤ នាថ្ងៃទី២០-២១ ខែកុម្ភៈ ឆ្នាំ២០២៥ខាងមុខឆាប់ៗនេះ ជាការត្រៀមខ្លួនឱ្យបានរួចជាស្រេច ក្នុងការជ្រើសរើសធនធានកីឡាករ កីឡាការិនីឆ្នើមៗ ត្រៀមចូលរួមប្រជែងមេដាយជូនជាតិមាតុភូមិ ក្នុងព្រឹត្តិការណ៍អន្តរជាតិដ៏សំខាន់នេះ»។

លោកស្រី ហង់ ស៊ីមន បានលើកឡើងបន្ថែមថា ក្នុងចំណោម១៥វិញ្ញាសានេះ គឺមាន១២វិញ្ញាសា ប្រភេទរាំគូ និង៣វិញ្ញាសាទៀត ជាប្រភេទរាំ Solo។ ការប្រកួតកីឡារាំ ជើងឯកថ្នាក់ជាតិ ប្រចាំឆ្នាំ២០២៤នេះ នឹងដំណើរការស្វែងរកធនធានឆ្នើមៗពីក្លឹប-សមាគមកីឡានានា លើ១៥វិញ្ញាសា ក្រោមគម្រោងថវិកាគាំទ្រប្រចាំឆ្នាំ២០២៤របស់ក្រសួងអប់រំ យុវជន និងកីឡា សម្រាប់ពន្លឿនការអភិវឌ្ឍកីឡាជាតិ។

លោកស្រីអគ្គលេខាធិការបន្ថែមថា វិញ្ញាសាទាំង១៥ ដែលសហព័ន្ធគ្រោងនឹងដាក់ឱ្យកីឡាករ កីឡាការិនីចូលរួមប្រជែងមេដាយនេះ គឺមានលើវិញ្ញាសា Latin Dance និង Standard Dance ក្នុងការប្រកួតកម្រិតបច្ចេកទេសខ្ពស់បំផុតរបស់ថ្នាក់ជាតិមួយនេះ។ លោកស្រី ហង់ ស៊ីមន បានអំពាវនាវដល់បណ្តាក្លឹប សមាគមទាំងអស់ចូលរួមចុះឈ្មោះចូលរួមប្រកួតឱ្យបានច្រើនកុះករ ដែលការបិទបញ្ជីនៃការចុះឈ្មោះនឹងធ្វើឡើងត្រឹមថ្ងៃទី១៥ ខែកុម្ភៈ ឆ្នាំ២០២៥ នៅទីស្នាក់ការសហព័ន្ធកីឡារាំកម្ពុជានៃពហុកីឡដ្ឋានជាតិអូឡាំពិក៕

ដោយ ហេង ណាលីន (រូបភាព៖ ឯកសារកីឡាជាតិ ២០២៤-NOCC)