AKP ភ្នំពេញ ថ្ងៃទី១៤ ខែមករា ឆ្នាំ២០២៥ -- លោក ជែក ស៊ុលលីវេន (Jake Sullivan) ទីប្រឹក្សាសន្តិសុខជាតិរបស់ប្រធានាធិបតីអាម៉េរិក លោក ចូ បៃដិន (Joe Biden) បាននិយាយថា ភាគីនៃកិច្ចចរចា ស្តីពីការដោះលែងចំណាប់ខ្មាំងនៅតំបន់ហ្គាហ្សាស្ទ្រីប គឺខិតជិតទៅរកការព្រមព្រៀងមួយហើយ ដែលវាអាចសម្រេចបានមុនពេលប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ (Donald Trump) ស្បថចូលកាន់តំណែងនៅថ្ងៃទី២០ ខែមករា ឆ្នាំ២០២៥ ខាងមុខនេះ។

លោក ស៊ុលលីវេន បាននិយាយថា អ្នកសម្របសម្រួលសេតវិមានសម្រាប់មជ្ឈិមបូព៌ា លោក ប្រ៊ែត ម៉ាកហ្គុក (Brett McGurk) បានទៅកាន់ទីក្រុងដូហារយៈពេលមួយសប្តាហ៍ ដែលព័ត៌មានលម្អិតចុងក្រោយនៃអត្ថបទកិច្ចព្រមព្រៀងត្រូវបានយល់ព្រម។

លោក ស៊ុលលីវេន ក៏បាននិយាយផងដែរថា លោក បៃដិន ទទួលបានព័ត៌មានថ្មីៗប្រចាំថ្ងៃអំពីបញ្ហានេះ ហើយទំនងជានឹងមានកិច្ចពិភាក្សាជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ក្នុងពេលឆាប់ៗនេះ៕

ដោយ៖ យា ចិន្ដាខន្ដី (ប្រភព៖ ស្ពុតនីក)