AKP ភ្នំពេញ ថ្ងៃទី១៣ ខែមករា ឆ្នាំ២០២៥ -- ការបោះឆ្នោតជ្រើសរើសប្រធានាធិបតីរបស់ប្រទេសក្រូអាតបានចាប់ផ្តើមនៅម៉ោង ៧:០០នាទីព្រឹកកាលពីថ្ងៃអាទិត្យដោយមានអ្នកបោះឆ្នោតដែលមានសិទ្ធិជាង ៣,៧លាននាក់នៅទូទាំងប្រទេសដើម្បីជ្រើសរើសរវាងប្រធានាធិបតីដែលកំពុងកាន់អំណាច ហ្សូរ៉ាន់ មីឡាណូវីក (Zoran Milanovic) និងគូប្រជែងគឺលោក ដ្រាហ្គាន់ ព្រីម៉ូរ៉ាក់ (Dragan Primorac) ។ គណៈកម្មាធិការ​រៀបចំ​ការ​បោះឆ្នោត​របស់​រដ្ឋ​បាន​អំពាវនាវ​ឲ្យ​ប្រជាពលរដ្ឋ​ទៅ​បោះឆ្នោត​ដើម្បី​អនុវត្ត​សិទ្ធិ​បោះឆ្នោត។

ការបោះឆ្នោតជុំទីមួយបានធ្វើឡើងនៅថ្ងៃទី២៩ ខែធ្នូ ឆ្នាំ២០២៤។ក្នុងចំណោមបេក្ខជនទាំង ៨នាក់ គឺលោក មីឡានណូវីក គាំទ្រដោយគណបក្សប្រឆាំងដ៏ធំបំផុតគឺ គណបក្សសង្គមប្រជាធិបតេយ្យ និងលោក ព្រីម៉ូរ៉ាក់ គាំទ្រដោយសហភាពប្រជាធិបតេយ្យក្រូអាតដែលកំពុងកាន់អំណាចជាប់ចំណាត់ថ្នាក់ទី១ និងទី២ ជាមួយនឹងសំឡេង ៤៩,០៩% និង១៩,៣៥% រៀងៗខ្លួន។

យោងតាមច្បាប់របស់ក្រូអាត ប្រសិនបើគ្មាននរណាម្នាក់ទទួលបានសំឡេងច្រើនជាងពាក់កណ្តាលនៅក្នុងជុំទីមួយទេ បេក្ខជននាំមុខគេទាំងពីរនឹងត្រូវចុះឈ្មោះនៅក្នុងការបោះឆ្នោតប្រធានាធិបតីដែលធ្វើឡើងនៅពីរសប្តាហ៍ក្រោយ។

លោក មីឡានណូវីក ដែល​បាន​ខក​ខាន​ការ​ទទួល​ជ័យ​ជម្នះ​ដាច់​ខាត​ក្នុង​ជុំ​ទី​មួយ​បាន​ឈាន​ចូល​ជុំ​ទី​ពីរ​ដោយ​មាន​ប្រៀប​យ៉ាង​ខ្លាំង​លើលោក ព្រីម៉ូរ៉ាក់។ យោងតាមលទ្ធផលនៃការស្ទង់មតិចុងក្រោយបង្អស់ដែលចេញផ្សាយមុនការប្រកួតប្រជែង អត្រានៃការគាំទ្ររបស់ លោក មីឡានណូវីកគឺ៦២,៥% ខណៈដែលលោក ព្រីម៉ូរ៉ាក់ មាន២៧,៨%។ ប្រធានាធិបតី​ក្រូអាត​មាន​អាណត្តិ​៥​ឆ្នាំ ហើយ​អាច​ជាប់​ឆ្នោត​ម្តង​ទៀត​៕

ដោយ៖ មូល មិនា (ប្រភព៖ ស៊ីនហួ)