AKP ភ្នំពេញ ថ្ងៃទី០១ ខែតុលា ឆ្នាំ២០២៦ -- ក្រសួងការបរទេសអ៊ីរ៉ង់ បានប្រកាសកាលពីពេលថ្មីៗនេះថា ទីក្រុងតេអេរ៉ង់បានព្រមានទីក្រុងអាប៊ូដាប៊ីអំពីផលវិបាកនានា ដែលបណ្តាលមកពីដំណើរទស្សនកិច្ចរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ទៅកាន់ប្រទេសអេមីរ៉ាត់អារ៉ាប់រួម។

នៅក្នុងសេចក្តីថ្លែងការណ៍មួយ ក្រសួងការបរទេសនៃសាធារណរដ្ឋឥស្លាមអ៊ីរ៉ង់ បានថ្កោលទោសយ៉ាងខ្លាំងចំពោះដំណើរទស្សនកិច្ចរបស់លោក បេនចាមីន ណេតាន់យ៉ាហ៊ូ ទៅកាន់ប្រទេសអេមីរ៉ាត់អារ៉ាប់រួម និងបានព្រមានអំពីផលវិបាកដ៏គ្រោះថ្នាក់បំផុតដែលបណ្តាលមកពីវត្តមានរបស់របបកាន់កាប់ទឹកដី (អ៊ីស្រាអែល) នៅក្នុងតំបន់នេះ។

ក្រសួងការបរទេសអ៊ីរ៉ង់បានអំពាវនាវដល់បណ្តាប្រទេសនៅមជ្ឈិមបូព៌ា កុំអនុញ្ញាតឱ្យទឹកដីរបស់ខ្លួនត្រូវបានប្រើប្រាស់សម្រាប់សកម្មភាពបង្កអស្ថិរភាពប្រឆាំងនឹងប្រទេសដទៃទៀតនៅក្នុងតំបន់។

កាលពីថ្ងៃអាទិត្យ លោក ណេតាន់យ៉ាហ៊ូ បានទៅបំពេញទស្សនកិច្ចនៅទីក្រុងអាប៊ូដាប៊ី និងបានជួបពិភាក្សាជាមួយប្រធានាធិបតីអេមីរ៉ាត់អារ៉ាប់រួម លោក ស្សេក ម៉ហាំម៉េដ ប៊ីន ហ្សាយ៉េដ អាល់ ណាយ៉ាន់។ ដំណើរទស្សនកិច្ចនេះត្រូវបានភាគីទាំងពីរទទួលស្គាល់ជាផ្លូវការនៅថ្ងៃបន្ទាប់ ប៉ុន្តែភ្នាក់ងារសន្តិសុខបានឱ្យដឹងថា សេចក្តីរាយការណ៍របស់ប៉ុស្តិ៍ទូរទស្សន៍មួយត្រូវបានផ្សព្វផ្សាយនៅរយៈពេល ៤៩នាទី មុនពេលយន្តហោះចុះចតនៅអ៊ីស្រាអែល៕

ដោយ៖ យា ចិន្ដាខន្ដី (ប្រភព៖ ស្ពុតនីក)