AKP ភ្នំពេញ ថ្ងៃទី១៣ ខែមករា ឆ្នាំ២០២៥ -- ប្រធានាធិបតីម៉ាល់ឌីវ លោកម៉ូហាមេដ មីហ្សហ្សូ (Mohamed Muizzu) បានជួបជាមួយរដ្ឋមន្ត្រីការបរទេសចិន លោក វ៉ាង យី (Wang Yi) ដោយភាគីទាំងពីរបានប្តេជ្ញាថានឹងធ្វើឱ្យស៊ីជម្រៅកិច្ចសហប្រតិបត្តិការទ្វេភាគីលើវិស័យផ្សេងៗ។

ជំនួប​នេះ​ត្រូវ​បាន​ធ្វើ​ឡើង​ក្នុង​អំឡុង​ពេល​ដំណើរទស្សនកិច្ច​របស់​លោក វ៉ាង ទៅកាន់​ប្រទេស​ម៉ាល់ឌីវ បន្ទាប់ពីបាន​ត្រឡប់​មក​ពីទ្វីប​អាហ្វ្រិក។លោក វ៉ាង ក៏ជាសមាជិកនៃការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិនផងដែរ។

លោក មីហ្សហ្សូ បានរំលឹកពីដំណើរទស្សនកិច្ចផ្លូវរដ្ឋដ៏ជោគជ័យរបស់លោកទៅកាន់ប្រទេសចិនកាលពីឆ្នាំមុន ហើយបាននិយាយថា ប្រទេសទាំងពីរតែងតែប្រព្រឹត្តចំពោះគ្នាទៅវិញទៅមកដោយការយោគយល់ និងស្មោះត្រង់។

ប្រធានាធិបតីបាននិយាយថា ភាគីទាំងពីរបានរក្សាការផ្លាស់ប្តូរកម្រិតកំពូលយ៉ាងជិតស្និទ្ធ និងសម្រេចបាននូវកិច្ចសហប្រតិបត្តិការប្រកបដោយផ្លែផ្កា ដោយលោកបានបន្ថែមថា លោករីករាយដែលឃើញប្រទេសចិនបានក្លាយជាប្រភពទេសចរណ៍ដ៏ធំបំផុតសម្រាប់ម៉ាល់ឌីវ។

ចំណែកឯលោក វ៉ាង បាននិយាយថា ដំណើរទស្សនកិច្ចផ្លូវរដ្ឋដ៏ជោគជ័យរបស់លោក មីហ្សហ្សូ ទៅកាន់ប្រទេសចិន គឺជាពេលវេលាដ៏សំខាន់មួយនៅក្នុងទំនាក់ទំនងចិន-ម៉ាល់ឌីវ។ ក្នុងដំណើរទស្សនកិច្ចកាលពីឆ្នាំមុន ប្រមុខរដ្ឋទាំងពីរបានព្រមព្រៀងគ្នាក្នុងការធ្វើឱ្យប្រសើរឡើងនូវទំនាក់ទំនងទ្វេភាគីទៅជាភាពជាដៃគូសហប្រតិបត្តិការយុទ្ធសាស្ត្រដ៏ទូលំទូលាយ និងប្តេជ្ញារួមគ្នាក្នុងការកសាងសហគមន៍ចិន-ម៉ាល់ឌីវជាមួយនឹងអនាគតរួមគ្នា ដែលបានដាក់ចេញនូវទស្សនវិស័យទូលំទូលាយសម្រាប់ទំនាក់ទំនងទ្វេភាគី។

លោក វ៉ាង បាននិយាយថា ប្រទេសចិននឹងគាំទ្រប្រទេសម៉ាល់ឌីវក្នុងការការពារឯករាជ្យជាតិ និងអធិបតេយ្យភាពជាតិ ហើយស្វែងរកនូវមាគ៌ាអភិវឌ្ឍន៍ដែលសមស្របនឹងលក្ខខណ្ឌជាតិរបស់ខ្លួន៕

ដោយ៖ មូល មិនា (ប្រភព៖ ភីបផលដេលី)