AKP ភ្នំពេញ ថ្ងៃទី០៩ ខែមករា ឆ្នាំ២០២៥ -- សេវាសារព័ត៌មាននៃគណៈរដ្ឋមន្ត្រីកៀហ្ស៊ីស៊ីស្ថានបានប្រកាសនៅក្នុងសេចក្តីថ្លែងការណ៍មួយថា នាយករដ្ឋមន្រ្តីនៃប្រទេសកៀហ្ស៊ីស៊ីស្ថាន អ៊ូសបេគីស្ថាន និងតាជីគីស្ថាន នឹងបើកកិច្ចប្រជុំត្រីភាគីស្តីពីបញ្ហាព្រំដែនរដ្ឋកាលពីថ្ងៃពុធ។

សេវាសារព័ត៌មានបាននិយាយថា «នាយករដ្ឋមន្ត្រីកៀហ្ស៊ីស៊ីស្ថាន លោក អាឌីលបេក កាស៊ីម៉ាលីយេវ (Adylbek Kasymaliyev) នាយករដ្ឋមន្ត្រីអ៊ូសបេគីស្ថាន លោក អាប់ឌុលឡា អារីពៅ  (Abdulla Aripov) និងនាយករដ្ឋមន្ត្រីតាជីគីស្ថាន លោក កូគៀ រ៉ាស៊ូលហ្សូដា (Kokhir Rasulzoda) នឹងជួបប្រជុំគ្នាកាលពីថ្ងៃទី៨ ខែមករា នៅឯតំបន់ប្រសព្វព្រំដែនរដ្ឋនៃប្រទេសទាំងបី»។ ប្រមុខរដ្ឋាភិបាលនឹងពិភាក្សាលើកិច្ចព្រមព្រៀងដែលធ្វើឡើងរវាងប្រធានាធិបតីនៃប្រទេសទាំងបីទាក់ទងនឹងបញ្ហាព្រំដែនរដ្ឋ។

ប្រទេសកៀហ្ស៊ីស៊ីស្ថាន និងអ៊ូសបេគីស្ថាន បានបញ្ចប់ដំណើរការកំណត់ព្រំដែនរបស់ពួកគេ ហើយបានចាប់ផ្តើមដំណើរការកំណត់ព្រំដែនដោយចុះហត្ថលេខាលើពិធីសារស្តីពីការផ្តល់សច្ចាប័នសម្រាប់កិច្ចព្រមព្រៀងលើផ្នែកមួយចំនួននៃព្រំដែនរដ្ឋប្រទេសកៀហ្ស៊ីស៊ីស្ថាន-អ៊ូសបេគីស្ថាន នៅថ្ងៃទី២៧ ខែមករា ឆ្នាំ២០២៣។

នៅខែធ្នូ ឆ្នាំ២០២៤ គណៈរដ្ឋមន្ត្រីកៀហ្ស៊ីស៊ីស្ថាន បាននិយាយថា ប្រទេសកៀហ្ស៊ីស៊ីស្ថាន និងតាជីគីស្ថាន បានបញ្ចប់ទាំងស្រុងនូវការពិពណ៌នាអំពីព្រំដែនទៅវិញទៅមករបស់ពួកគេ។ ចាប់តាំងពីពេលនោះមក ភាគីទាំងពីរបានចាប់ផ្តើមរៀបចំសម្ភារៈក្នុងការឆ្លងកាត់ខ្សែបន្ទាត់ព្រំដែនដែលបានគ្រោងទុកសម្រាប់ការចុះបញ្ជីស្របច្បាប់ជាបន្តបន្ទាប់៕

ដោយ៖ មូល មិនា (ប្រភព៖ ភីបផលដេលី)