AKP ភ្នំពេញ ថ្ងៃទី០៨ ខែមករា ឆ្នាំ២០២៥ -- រដ្ឋមន្ត្រីការបរទេសតួកគីលោក ហាកាន់ ហ្វីដាន់ (Hakan Fidan) បានពិភាក្សាជាមួយសមភាគីហ្សកដានី លោក អាយម៉ាន់ សាហ្វាឌី (Ayman Safadi) អំពីស្ថានភាពនៅក្នុងប្រទេសស៊ីរី និងការកសាងឡើងវិញរបស់ខ្លួន។

លោក ហ្វីដាន បានប្រាប់សន្និសីទសារព័ត៌មានរួមមួយដែលមានការចូលរួមដោយលោក សាហ្វាឌី ក្នុងទីក្រុងអង់ការ៉ា ភាគីទាំងពីរបានពិភាក្សាអំពីជំហានដើម្បី «រស់ឡើងវិញ» ដល់ប្រទេសស៊ីរី ជាពិសេសក្នុងវិស័យដឹកជញ្ជូន កសិកម្ម និងសន្តិសុខស្បៀង ហើយបានបង្កើតផែនទីបង្ហាញផ្លូវ។

រដ្ឋមន្ត្រីការបរទេសតួកគី បាននិយាយថា មានការសម្របសម្រួលយ៉ាងជិតស្និទ្ធជាមួយលោក សាហ្វាឌី និងមន្ត្រីហ្ស៊កដានីដទៃទៀត ចាប់តាំងពីការដួលរលំនៃរដ្ឋាភិបាលរបស់ លោក បាសារ អាល់ អាសសាដ (Bashar al-Assad) នៅក្នុងប្រទេសស៊ីរី កាលពីថ្ងៃទី៨ ខែធ្នូ ឆ្នាំ២០២៤។

លើកិច្ចខិតខំប្រឹងប្រែងប្រឆាំងភេរវកម្ម លោក ហ្វីដាន បានសង្កត់ធ្ងន់លើសារៈសំខាន់នៃការទប់ស្កាត់ការកើតឡើងវិញនៃក្រុមរដ្ឋអ៊ីស្លាម។ លោកក៏បានរំលឹកឡើងវិញនូវការទាមទាររបស់ប្រទេសតួកគី សម្រាប់ក្រុមការពារប្រជាជនឃឺដស៊ីរី (YPG) ឱ្យដកអាវុធ។

លោក សាហ្វាឌី បាន​យល់ស្របពី​កង្វល់​សន្តិសុខ​របស់ប្រទេសតួកគីដោយ​បញ្ជាក់​ពី​ការ​គាំទ្រ​របស់​ប្រទេស​ហ្សកដានី​ចំពោះ​ជំហរ​របស់ទី​ក្រុង​អង់ការ៉ា ​ប្រឆាំង​នឹង​ក្រុម YPG ដែល​ប្រទេសតួកគីចាត់​ទុក​ថា​ជា​សាខា​ស៊ីរី​នៃ​គណបក្ស​ពលករ Kurdistan (PKK)។

លោកក៏បានសម្តែងការប្រឆាំងទៅនឹងការជ្រៀតជ្រែកពីបរទេសក្នុងប្រទេសស៊ីរី ដោយលោកបានបញ្ជាក់ថា «យើងបដិសេធរាល់ការវាយប្រហារលើឯករាជ្យភាព និងអធិបតេយ្យភាពរបស់ប្រទេសស៊ីរី។សន្តិសុខ និងស្ថិរភាពរបស់ប្រទេសស៊ីរីត្រូវបានចងដោយផ្ទាល់ទៅនឹងសន្តិសុខរបស់ប្រទេសជិតខាងដូចជា ប្រទេសហ្ស៊កដានី និងប្រទេសតួកគី»៕

ដោយ៖ មូល មិនា (ប្រភព៖ ស៊ីនហួ)