AKP ភ្នំពេញ ថ្ងៃទី០៨ ខែមករា ឆ្នាំ២០២៥ -- កាសែតតៃប៉ិថែមស៍បានរាយការណ៍ថា ប្រទេសចិនបានចោទប្រកាន់កោះតៃវ៉ាន់ពីបទធ្វើឱ្យខូចដល់កិច្ចខិតខំប្រឹងប្រែងដើម្បីកែលម្អទំនាក់ទំនងឆ្លងច្រកសមុទ្រ ដោយបានបន្ទោសកោះនេះចំពោះការបដិសេធកិច្ចសន្ទនា និងការកើនឡើងភាពតានតឹងរវាងភាគីទាំងពីរ។

មន្ត្រី​ម្នាក់​ដែលបានដឹងអំពី​កិច្ចការ​ឆ្លង​ច្រក​សមុទ្រនេះ​បាន​និយាយ​ថា ​ការ​បដិសេធ​របស់កោះ​តៃវ៉ាន់​ក្នុង​ការ​ចូលរួម​កិច្ច​ចរចា ​និង​វោហាសាស្ត្រ​ដែល​មានការកើនឡើងនោះ ​បាន​នាំ​ឱ្យ​មានការ​បែកបាក់​ក្នុង​ការ​ផ្លាស់ប្តូរ​ទ្វេភាគី។

ទោះបីជាមានការចោទប្រកាន់ទាំងនេះក៏ដោយ មន្ត្រីរូបនេះក៏បានស្តីបន្ទោសដល់ទីក្រុងប៉េកាំងចំពោះសកម្មភាពយោធារបស់ខ្លួនជុំវិញកោះតៃវ៉ាន់ ដោយបានលើកឡើងថា ប្រទេសចិនមិនគួររំពឹងថា គណៈប្រតិភូរបស់ខ្លួននឹងត្រូវបានស្វាគមន៍ឡើយ ខណៈដែលយោធារបស់ខ្លួននៅតែបន្តបង្ករឿងនៅលើកោះនេះ។

ការពន្យារពេលនៃវេទិកាទីក្រុងភ្លោះកាលពីក្នុងខែធ្នូ ដែលមានន័យថាពាក់ព័ន្ធនឹងការផ្លាស់ប្តូររវាងមន្ត្រីតៃវ៉ាន់ និងចិន ត្រូវបានសន្មតថាដោយសារតែប្រទេសចិនមិនបានបញ្ចប់បញ្ជីភ្ញៀវរបស់ខ្លួន មិនមែនជាការរារាំងណាមួយពីក្រុមប្រឹក្សាកិច្ចការដីគោករបស់កោះតៃវ៉ាន់ (MAC) នោះទេ។

ប្រទេសចិនបានដាក់បញ្ជីឈ្មោះអ្នកចូលរួមជាង ១០០នាក់សម្រាប់វេទិកានេះ ដោយកោះតៃវ៉ាន់បានយល់ព្រមជាង ៩០% នៃបញ្ជីភ្ញៀវនោះ។ទោះជាយ៉ាងណាក៏ដោយ បុគ្គលមួយចំនួនដែលមិនត្រូវបានអនុម័តនោះ គឺមកពីការិយាល័យកិច្ចការកោះតៃវ៉ាន់របស់ប្រទេសចិន ដែលអនុវត្តគោលការណ៍ណែនាំចំនួន២២ របស់ទីក្រុងប៉េកាំងប្រឆាំងនឹងឯករាជ្យភាពតៃវ៉ាន់ ដែលជាគោលនយោបាយណែនាំនៅក្នុងខែមិថុនា ឆ្នាំ២០២៣។

ទោះបីជាយ៉ាងនេះក្តី មន្ត្រីនោះបាននិយាយថា ប្រជាជនតៃវ៉ាន់ជាច្រើននៅតែស្វែងរកវិធីដើម្បីបំពេញទស្សនកិច្ចនៅប្រទេសចិនដោយឯករាជ្យទោះបីជាកោះតៃវ៉ាន់នៅតែប្តេជ្ញាចិត្តក្នុងការជំរុញសុច្ឆន្ទៈជាមួយទីក្រុងប៉េកាំងក៏ដោយ។

ប្រសិនបើចិនចូលរួមក្នុងកិច្ចសន្ទនា ឬបង្ហាញពីសកម្មភាពវិជ្ជមាន កោះតៃវ៉ាន់បើកចំហរដើម្បីពិនិត្យមើលឡើងវិញនូវការហាមឃាត់ការធ្វើដំណើរជាក្រុម និងការកែលម្អទំនាក់ទំនងឆ្លងកាត់ច្រកសមុទ្រ៕

ដោយ៖ យា ចិន្ដាខន្ដី (ប្រភព៖ ANI)