AKP ព្រះសីហនុ ថ្ងៃទី០២ ខែមករា ឆ្នាំ២០២៥ -- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ អញ្ជើញចុះពិនិត្យវឌ្ឍភាពគម្រោងសាងសង់របស់ក្រុមហ៊ុម ផឹនីនស៊្យូឡឺ បេ អ៊ិនវេសម៉ិន ឯ.ក (Peninsula Bay Investment Co., Ltd.) មានទីតាំងស្ថិតនៅសង្កាត់លេខ៤ ក្រុង ខេត្តព្រះសីហនុ ដោយមានការចូលរួមពីមន្ត្រីបច្ចេកទេស និងលោកអភិបាលក្រុងព្រះសីហនុ នាព្រឹកថ្ងៃព្រហស្បតិ៍ ទី០២ ខែមករា ឆ្នាំ២០២៥។

លោក LAI XIAO BO Project Managerរបស់ក្រុមហ៊ុន បានឱ្យដឹងថា គម្រោងនេះចំណាយថវិកា៥៧៤លានដុល្អាអាមេរិក ស្ថិតនៅទីលានតេជោ សង្កាត់លេខ៤ ក្រុង-ខេត្តព្រះសីហនុ និងតាមការវាយតម្លៃចុងក្រោយគម្រោងត្រូវចំណាយថវិកា១ពាន់លានដុល្លាអាមេរិក ហើយនៅក្នុងគម្រោងសាងសង់ធ្វើការបែងចែកជា២តំបន់ គឺតំបន់ A និងតំបន់ B។ តំបន់B មានដូចជាអគារខុនដូ អគារពាណិជ្ជកម្ម អាចសាងសង់ហើយរួចរាល់នៅចុងឆ្នាំ២០២៥ ដោយឡែកតំបន់A មានដូចជាសណ្ឋាគារលំដាប់ផ្កាយ៥ ផ្សារទំនើប និងសួនកម្សាន្តផ្សេងៗទៀត គ្រោងនឹងបញ្ចប់ការងារនៅឆ្នាំ២០២៨។ ចំពោះហាងលក់ដូរនៅតាមបណ្តោយឆ្នេរខាងក្រោមមានលក់ទំនិញជាច្រើនប្រភេទ ហើយក្រុមហ៊ុនបានធ្វើការទំនាក់ទំនងជាមួយក្រុមហ៊ុនបរទេស ដើម្បីនាំយកនូវផលិតផលប្រេនៗពីប្រទេសបារាំងយកមកដាក់លក់ ក្នុងនោះក៏មានសួនកម្សាន្តលំដាប់ដែលអាចទាក់ទាញភ្ញៀវទេសចរផងដែរ ដោយឡែកហាងនៅមាត់សមុទ្រគ្រោងនឹងបើកឱ្យដំណើរការនៅខែកុម្ភៈ ឆ្នាំ២០២៥ខាងមុខ ក្រុមហ៊ុនទទួលបានសិទ្ធិវិនិយោគនៅលើផ្ទៃដីចំនួន១៥,៨ហិកតា ដែលមានអគាររហូតដល់៩០ម៉ឺនការ៉េ ផ្តល់ការងារជូនប្រជាពលរដ្ឋកម្ពុជា ប្រមាណជា៥០០០នាក់។

លោក LAI XIAO BO បានបន្តថា ថ្ងៃនេះ ឯកឧត្តមអភិបាលខេត្តបានអញ្ជើញចុះមកពិនិត្យវឌ្ឍនភាពគម្រោងសាងសង់របស់ក្រុមហ៊ុន និងជំរុញឱ្យក្រុមហ៊ុនពន្លឿនដំណើរការសាងសង់ ក្នុងនោះក៏បានពិនិត្យការងារបច្ចេកទេសផ្សេងទៀតពាក់ព័ន្ធនឹងអាងប្រព្រឹត្តកម្ម បរិស្ថាន អនាម័យជាដើម ព្រមទាំងចូលរួមដោះស្រាយចំណុចពាក់ព័ន្ធមួយចំនួនក្នុងការដ្ឋាន ហើយចំពោះការងារសាង់សង់នាពេលនេះ ក្រុមហ៊ុនផ្តោតសំខាន់ទៅលើបរិស្ថានជាចម្បង។

ក្នុងឱកាសដឹកនាំមន្ត្រីបច្ចេកទេសចុះពិនិត្យពិនិត្យវឌ្ឍភាពគម្រោងសាងសង់របស់ក្រុមហ៊ុនក្នុងក្រុងព្រះសីហនុ ឯកឧត្តម ម៉ាង ស៊ីណេត បានថ្លែងអំណរគុណចំពោះក្រុមហ៊ុនដែលបានបោះទុនវិនិយោគនៅខេត្តតំបន់ឆ្នេរនៃព្រះរាជាណាចក្រកម្ពុជា ដើម្បីជួយបង្កើនការងារ ក៏ដូចបង្កើនសេដ្ឋកិច្ចរបស់ខេត្តព្រះសីហនុ ចូលរួមកាត់បន្ថយភាពក្រីក្រ ព្រមទាំងបានជំរុញឱ្យក្រុមហ៊ុនពន្លឿនការងារសាងសង់។ ទន្ទឹមនឹងការងារសាងសង់ ក្រុមហ៊ុនត្រូវគិតគូររៀបចំអាងប្រព្រឹត្តកម្មទឹកកខ្វក់ឱ្យបានត្រឹមត្រូវ ដើម្បីធានាថា គម្រោងសាងសង់របស់ក្រុមហ៊ុនអនុវត្តតាមបទដ្ឋានលក្ខណៈស្តង់ដាត្រឹមត្រូវ មិនមានការបំពុលបរិស្ថាននៅជុំវិញ ហើយរដ្ឋបាលខេត្តព្រះសីហនុគាំទ្រនូវគម្រោងសាងសង់របស់ក្រុមហ៊ុន និងរង់ចាំជួយសម្របសម្រួលដោះស្រាយបញ្ហាប្រឈមឱ្យបានទាន់ពេលវេលា ដើម្បីធានាធ្វើយ៉ាងណាឱ្យដំណើរការងារសាងសង់របស់ក្រុមហ៊ុនមានភាពរលូនតាមការគ្រោងទុក៕

ដោយ ងូ សុមុនី