AKP ភ្នំពេញ ថ្ងៃទី០២ ខែមករា ឆ្នាំ២០២៥ -- ក្រសួងពាណិជ្ជកម្មថៃបានសន្យាថានឹងបន្តកិច្ចព្រមព្រៀងពាណិជ្ជកម្មសេរី (FTAs) បន្ថែមទៀតនៅឆ្នាំ២០២៥ ក្នុងកិច្ចខិតខំប្រឹងប្រែងដើម្បីជំរុញអត្រាកំណើនសេដ្ឋកិច្ចរបស់ប្រទេសនេះដល់ ៣%។

បន្ទាប់ពីកិច្ចប្រជុំរវាងមន្ត្រីក្រសួង និងនាយកប្រតិបត្តិនៃសហព័ន្ធឧស្សាហកម្មថៃ (FTI) រដ្ឋមន្ត្រីក្រសួងពាណិជ្ជកម្មថៃ លោក ពីចៃ ណារីបថាផាន់ (Pichai Naripthaphan) មានប្រសាសន៍ថា នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា (Paetongtarn Shinawatra) ចង់ឱ្យវិស័យឯកជនក្លាយជាកត្តាជំរុញដ៏សំខាន់នៃកំណើនសេដ្ឋកិច្ចប្រកបដោយចីរភាព។ដូច្នេះ​លោកស្រី​បាន​ណែនាំ​រដ្ឋាភិបាល​ឱ្យ​ជំរុញ​កិច្ចសហប្រតិបត្តិការ​ឱ្យ​កាន់តែ​ជិតស្និទ្ធ​ជាមួយ​វិស័យ​នេះ​។

លោកបាននិយាយ​ថា ក្រសួង​នឹង​បន្ត​ខិតខំ​ប្រឹងប្រែង​សហការ​ជាមួយ​វិស័យ​ឯកជន ដើម្បី​ធានា​បាន​នូវ​កំណើនសេដ្ឋកិច្ច​យ៉ាង​ឆាប់រហ័ស ។ប្រទេស​នេះ​នឹង​បញ្ចប់​ការ​ចរចា​ក្នុង​ពេល​ឆាប់​ៗ​ខាង​មុខ​សម្រាប់​កិច្ច​ព្រមព្រៀង​ពាណិជ្ជកម្ម​សេរី​អឺរ៉ុប​ដែល​នឹង​ផ្តល់​ឱ្យ​ប្រទេស​ថៃ​ចូល​ទៅ​កាន់​ទីផ្សារ​ក្នុង​ប្រទេស​ស្វីស ន័រវេស អ៊ីស្លង់ និងឡិចតេនស្ដាញ។ លោកបានបន្ដថា នេះនឹងក្លាយជា កិច្ចព្រមព្រៀង FTA ទីមួយរបស់ប្រទេសថៃជាមួយសហភាពអឺរ៉ុប ហើយកិច្ចព្រមព្រៀង FTA ផ្សេងទៀតនឹងអនុវត្តន៍តាមដើម្បីបង្កើនការប្រកួតប្រជែង និងទាក់ទាញការវិនិយោគពីបរទេស។

ស្ថិតិរបស់ក្រសួងបានបង្ហាញថា ការនាំចេញរបស់ប្រទេសនេះបានកើនឡើង ៥,១% ក្នុងរយៈពេល ១១ខែដំបូងនៃឆ្នាំ២០២៤ ដែលសរុបមានចំនួន ៩,៦៩ទ្រីលានបាត (២៧៥,៧៦ប៊ីលានដុល្លារអាម៉េរិក)។ ចំនួន​នេះ​ត្រូវ​បាន​គេ​ព្យាករ​ថា​នឹង​កើន​លើស ១០ទ្រី​លាន​បាត​នៅ​ចុង​ឆ្នាំ​នេះ ដែល​ជា​ចំនួន​ខ្ពស់​បំផុត​ក្នុង​កំណត់ត្រា។

ក្រសួងមានបំណងសម្រាប់អត្រាកំណើនពី ២-៣% ក្នុងឆ្នាំ២០២៥ទោះបីជាមានហានិភ័យជាសកលក៏ដោយ ដោយប្រើប្រាស់កិច្ចសហប្រតិបត្តិការដ៏រឹងមាំរបស់រដ្ឋាភិបាល និងវិស័យឯកជន ដើម្បីសម្រេចបាននូវគោលដៅនេះ។

ទន្ទឹមនឹងនោះ ប្រធានសហព័ន្ធ FTI លោក ក្រេងក្រៃ ថេននូគុល (Kriengkrai Thiennukul) បានសរសើរកិច្ចខិតខំប្រឹងប្រែងរបស់ក្រសួងដោយមានប្រសាសន៍ថា សហព័ន្ធ FTI នឹងបន្តជួយដល់អាជីវកម្មក្នុងការធ្វើឱ្យកិច្ចព្រមព្រៀង FTA ទទួលបានច្រើនបំផុត៕

ដោយ៖ មូល មិនា (ប្រភព៖ VNA)