AKP ភ្នំពេញ ថ្ងៃទី០២ ខែមករា ឆ្នាំ២០២៥ -- យោងតាមនាយកដ្ឋានទេសចរណ៍ក្រុង បានឱ្យដឹងថា ទីក្រុងហាណូយមានបំណងទាក់ទាញភ្ញៀវទេសចរជាង ៣០លាននាក់នៅឆ្នាំ២០២៥ រួមទាំងភ្ញៀវអន្តរជាតិចំនួន ៧លាននាក់។

នាយកដ្ឋានបាននិយាយនៅក្នុងសន្និសីទមួយថា វិស័យទេសចរណ៍របស់ទីក្រុងមានការរីកចម្រើននៅឆ្នាំ២០២៤ ដោយសម្រេចបាននូវកំណើនគួរឱ្យកត់សម្គាល់។

ចំនួន​ភ្ញៀវ​ទេសចរ​សរុប​មាន​ដល់​ទៅ ២៧,៨៦លាន​នាក់ បានកើនឡើង១២,៧% ធៀប​នឹង​ឆ្នាំ​មុន។ ក្នុង​នោះ​ភ្ញៀវ​អន្តរជាតិ​សរុប​មាន​ចំនួន​ ៦,៣៥​លាន​នាក់ ខណៈ​ភ្ញៀវ​ទេសចរ​ក្នុងស្រុក​មាន​ចំនួន ​២១,៥១​លាន​នាក់​។

វិស័យនេះក៏បានរាយការណ៍ពីប្រាក់ចំណូលប្រមាណ ១១០,៥ទ្រីលានដុង (៤,៣៣ លានដុល្លារអាម៉េរិក) បានកើនឡើង ១៨,៣% ពីមួយឆ្នាំទៅមួយឆ្នាំ។ អត្រាស្នាក់នៅជាមធ្យមសម្រាប់សណ្ឋាគារគឺ ៦២% និង២,៩% ខ្ពស់ជាងឆ្នាំ២០២៣។

សម្រាប់ឆ្នាំ២០២៥ វិស័យទេសចរណ៍របស់ទីក្រុងមានគោលបំណងជំរុញប្រាក់ចំណូលសរុបរបស់ខ្លួនឱ្យលើសពី ១៣០ទ្រីលានដុងក្នុងការការធ្វើពិពិធកម្មរបស់ខ្លួន ដោយសង្កត់ធ្ងន់ទៅលើដំណើរកម្សាន្តពេលយប់ទេសចរណ៍ម្ហូបអាហារ ទេសចរណ៍ MICE (ការប្រជុំ ការលើកទឹកចិត្តសន្និសីទ និងពិព័រណ៍) និងទេសចរណ៍សុខុមាលភាព។

អនុរដ្ឋមន្ត្រីក្រសួងវប្បធម៌ កីឡា និងទេសចរណ៍ លោក ហូ អានភួង (Ho An Phong) បានសង្កត់ធ្ងន់លើតួនាទីដឹកនាំរបស់ទីក្រុងក្នុងវិស័យទេសចរណ៍ជាតិ។ លោកបានជំរុញភាពជាដៃគូក្នុងតំបន់ អភិវឌ្ឍន៍ផលិតផលទេសចរណ៍ចម្រុះ និងរួមបញ្ចូលឧស្សាហកម្មវប្បធម៌ ដើម្បីពង្រឹងជំហររបស់ខ្លួនជាអ្នកដឹកនាំទេសចរណ៍របស់ប្រទេសវៀតណាម៕

ដោយ៖ មូល មិនា (ប្រភព៖ VNA)