AKP រតនគិរី ថ្ងៃទី១៨ ខែមករា ឆ្នាំ២០២១--នៅថ្ងៃ៤កើត ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃអាទិត្យ ទី១៧ ខែមករា ឆ្នាំ២០២១ ឯកឧត្តម ថង សាវុន អភិបាលខេត្តរតនគិរី អមដំណើរដោយ ឯកឧតម លោកជំទាវ ជាអភិបាលរងខេត្ត ប្រធាន អនុប្រធានមន្ទីរ អង្គភាពជុំវិញខេត្តបានអញ្ជើញចុះសួរសុខទុក្ខ និងនាំយកអំណោយរបស់រាជរដ្ឋាភិបាលផ្តល់តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ចែកជូនដល់ប្រជាពលរដ្ឋងាយរងគ្រោះចំនួន ២៣០គ្រួសារ ដែលពិធីចែកអំណោយនេះធ្វើឡើងនៅរមណីយដ្ឋានទេសចរណ៍ធម្មជាតិបឹងលំកុដ ស្តិតក្នុងឃុំសេដា ស្រុកលំផាត់។

លោក ហ៊ត ស៊ុនហោ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបានឱ្យដឹងថា ដោយសារជំងឺកូវីដ-១៩ បានធ្វើឱ្យប្រជាពលរដ្ឋមួយចំនួន នៅតាមបណ្តាស្រុកនានាជួបការលំបាកខ្វះខាតជីវភាព។ ដើម្បីសម្រួលនូវការលំបាកនេះ រាជរដ្ឋាភិបាលតាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទា បានផ្តល់អំណោយ ដើម្បីជួយដល់គ្រួរសារងាយរងគ្រោះ នៃគម្រោងសុខុមាលភាពសង្គម សម្រាប់ជួយដល់ប្រជាពលរដ្ឋ នៅក្នុងខេត្តជាពិសេសគ្រួសារចាស់ជរាជួបការលំបាក ស្រ្តីមេម៉ាយក្រីក្រមានកូនច្រើន ជនពិការ។អំណោយដែលបានផ្តល់ជូនប្រជាពលរដ្ឋរងគ្រោះនាពេលនេះ ១គ្រួសារៗទទួលបាន អង្ករ២៥គីឡូក្រាម​,​មី​១កេស ,​ ឃីត​១កញ្ចប់​ និងថវិការ​ ១ម៉ឺនរៀល​។ ក្នុងនោះដែរជនពិការ៤នាក់​ និងកុមារកំព្រា៤នាក់​ ក្នុងម្នាក់ទទួលបាន ៦ម៉ឺនរៀល បន្ថែមទៀតផងដែរ​ ។

ក្នុងឱកាសនោះឯកឧត្តម ថង សាវុន បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលជានិច្ចកាលសម្តេចតែងតែខ្វាយខ្វល់ និងយកចិត្តទុកដាក់គិតគូរអំពីសុខុមាលភាព ជីវភាពរស់នៅរបស់ប្រជាពលរដ្ឋនៅគ្រប់ទិសទី ទូទាំងប្រទេសដោយមិនប្រកាន់ពូជសាសន៍ និងនិន្នាការនយោបាយឡើយ ។ ពោលគឺមិនទុកឱ្យប្រជាពលរដ្ឋណាម្នាក់ស្លាប់ ដោយសារអត់អាហារឡើយ។ ដូចនេះរាជរដ្ឋាភិបាលកម្ពុជា តាមរយៈមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បានសហការជាមួយរដ្ឋបាលខេត្ត និងរដ្ឋបាលស្រុកដើម្បីរៀបចំកម្មវិធីផ្ដល់អំណោយជូនដល់បងប្អូនប្រជាពលរដ្ឋ ដែលរងគ្រោះនាពេលនេះ។

ឯកឧត្តម ថង សាវុន បានអំពាវនាវដល់អាជ្ញាធរនៅគ្រប់មូលដ្ឋានទាំងអស់ ត្រូវបង្កើនសកម្មភាពបន្ថែមទៀត ក្នុងការបន្តចុះអប់រំផ្សព្វផ្សាយអំពីវិធានការទប់ស្កាត់ ការរីករាលដាលនៃជំងឺឆ្លងកូវីដ-១៩ ដល់ប្រជាពលរដ្ឋរបស់ខ្លួនឱ្យបានញឹកញាប់ ធ្វើយ៉ាងណាឱ្យនៅក្នុងមូល ដ្ឋាន ក្រុមគ្រួសារ និងសហគមន៍របស់ខ្លួន គ្មានការឆ្លងរាលដាលនៃជំងឺកូវីដ-១៩ ។ ដោយឡែកពុកម៉ែបងប្អូនប្រជាពលរដ្ឋ ក៏ត្រូវបន្តប្រុងប្រយ័ត្នខ្ពស់ដោយត្រូវមានអនាម័យជាប់ជាប្រចាំគឺត្រូវពាក់ម៉ាស ដុសលាងសម្អាតដៃជាមួយសាប៊ូ ទឹកអាល់កុល ឬជែលសម្លាប់មេរោគផ្សេងៗ ហើយបន្តរក្សាគម្លាតឆ្ងាយពីគ្នា ដើម្បីយើងរួមគ្នាប្រយុទ្ធប្រឆាំងនឹងជំងឺដ៏កាចសាហាវនេះកុំឱ្យកើតមានក្នុងសហគមន៍របស់យើង ៕

ដោយ ណយ នឿន (ប្រភព:មន្ទីរព័ត៌មានខេត្តរតនគិរី)