AKP ព្រះសីហនុ ថ្ងៃទី១៥ ខែមករា ឆ្នាំ២០២១  លោក ម៉ាង ស៊ីណេត អភិបាលរងខេត្តព្រះសីហនុ ដឹកនាំកិច្ចប្រជុំប្រមូល និងគ្រប់ គ្រងថវិកា ដែលទទួលបានពីភ្ញៀវទេសចរទៅកម្សាន្តតាមកោះ សម្រាប់ទ្រទ្រង់ដល់ការគ្រប់ គ្រង និងអភិរក្សធនធានតំបន់ឆ្នេរក្នុងខេត្តព្រះសីហនុ  ដោយមានការចូលរួម ពីលោកជំទាវ គួច ចន្ថា សមាជិកក្រុមប្រឹក្សាខេត្ត នាយករងរដ្ឋបាលសាលាខេត្ត អនុប្រធានមន្ទីរ អង្គភាពពាក់ព័ន្ធ ប្រធានសមាគមន៍ទូកទេសចរណ៍ និងម្ចាស់ក្រុមហ៊ុនទូក ដឹកភ្ញៀវទេសចរ នៅសាលាខេត្តព្រះសីហនុ នារសៀលថ្ងៃសុក្រ ២កើត ខែមាឃ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៥ ខែមករា ឆ្នាំ២០២១។ 

 តំណាងក្រុមហ៊ុនទូកដឹកភ្ញៀវទេសចរ បានលើកឡើងពីផលពិបាកនៃការអាក់ខាន បង់ថ្លៃសំបុត្រ ជូនរដ្ឋបាលខេត្តព្រះសីហនុ ដោយសារតែផលប៉ះពាល់ដោយសារជំងឺកូវីដ-១៩ គ្មានភ្ញៀវទេសចរទៅ លេងកម្សាន្តតាមកោះក្នុងខេត្តព្រះសីហនុ។

ឧកញ៉ា ទៀ វិចិត្រ ប្រធានសមាគមន៍ទូកទេសចរណ៍ប្រចាំខេត្តព្រះសីហនុ ទទួលយក សំណើរបស់រដ្ឋបាលខេត្ត និងធ្វើការប្រជុំពិភាក្សាជាមួយម្ចាស់ក្រុម ហ៊ុនទូកដឹកភ្ញៀវទេសចរ ដើម្បីពន្លឿនការប្រមូលថវិកាសម្រាប់ទ្រទ្រង់ដល់ការគ្រប់គ្រង និងអភិរក្សធនធាន តំបន់ឆ្នេរក្នុងខេត្តព្រះសីហនុ។

លោក ម៉ាង ស៊ីណេត អភិបាលរងខេត្តព្រះសីហនុ មានប្រសាសន៍ថា ក្រុមហ៊ុនត្រូវ មានឆន្ទៈ ការទទួលខុសត្រូវ សហការចូលរួមជាមួយរដ្ឋបាលខេត្ត ក្នុងការប្រមូលថវិកាចំនួន ២ដុល្លា ពីលើតម្លៃសំបុត្ររបស់ភ្ញៀវទេសចរក្នុងម្នាក់ៗ ហើយការប្រមូលថវិកានេះ គឺបានការ ឯកភាពពីក្រសួងសេដ្ឋកិច្ច និងហិរញ្ញវត្ថុ ស្តីពីស្ថានភាពគ្រប់គ្រង និងការធ្វើអាជីវកម្មទូកទេស ចរណ៍នៅខេត្តព្រះសីហនុ ទន្ទឹមនោះ ស្នើរសុំឱ្យលោកប្រធានសមាគមន៍ រៀបចំបោះ សំបុត្រទូកឯក ភាពមួយ ដោយមានឡូហ្គោក្រុមហ៊ុន និងឡូហ្គោប្រធានសមាគម ដើម្បីយើង មានភាពងាយស្រួលក្នុងការគ្រប់គ្រងប្រមូលថវិកាជូនរដ្ឋបាលខេត្តព្រះសីហនុ។

លោកបានបន្តថា រាជរដ្ឋាភិបាលកម្ពុជា និងរដ្ឋបាលខេត្តព្រះសីហនុ បានរៀបចំកែលម្អ ឆ្នេរសមុទ្រ ជា លំហរសាធារណៈដ៏វែង ក្នុងការទាក់ទាញប្រជាពលរដ្ឋនៅទូទាំង ប្រទេសមកទស្សនាកម្សន្តនៅខេត្តព្រះសីហនុ និងបន្តទៅលេង កម្សាន្តតាមបណ្តាកោះ នានាក្នុងខេត្តព្រះសីហនុ។

លោក ម៉ាង ស៊ីណេត ក៏បានធ្វើការណែនាំឱ្យម្ចាស់ក្រុមហ៊ុនទូកទេសចរណ៍ ទាំងអស់ត្រូវមានអាវពោងសុវត្ថិភាពក្នុងការដឹកជញ្ជូនភ្ញៀវ ប្រកបដោយផាសុកភាព ធានានូវសុវត្ថិភាពជូនភ្ញៀវទេសចរ។ ព្រមទាំងឱ្យក្រុមហ៊ុនដឹកជញ្ជូនភ្ញៀវទេសចរត្រូវទូទាត់ ថវិកាថ្លៃសំបុត្រប្រចាំឆ្នាំ២០២០ ជូនរដ្ឋបាលខេត្តព្រះសីហនុ និងបានថ្លែងអំណរគុណ ក្រុមហ៊ុនទូកទេសចរណ៍របស់ឧកញ៉ា ទៀ វិចិត្រ ដែលបានចូលរួមជាមួយរដ្ឋបាលខេត្ត ប្រមូលថវិកាបង់ជូនសាលាខេត្តបានទាន់ពេលវេលា សូមឱ្យក្រុមហ៊ុនផ្សេងទៀត ត្រូវពន្លឿន ការបង់ថវិកាមករដ្ឋបាលខេត្ត យោងតាមលិខិតលេខ ៦៨៦៤សហវ- អទច ចុះថ្ងៃទី២៦ ខែកក្កដា ឆ្នាំ២០១៧ របស់ក្រសួងសេដ្ឋ កិច្ច និងហិរញ្ញ ស្តីពីស្ថាន ភាពគ្រប់គ្រង និងការ ធ្វើអាជីវកម្មទូកទេសចរណ៍នៅខេត្តព្រះសីហនុ។

តាមរបាយការណ៍មន្ទីរទេសចរណ៍ខេត្តព្រះសីហនុបានឱ្យដឹងថា ខេត្តព្រះសីហនុ មានក្រុមហ៊ុនទូកដឹកភ្ញៀវទេសចរចំនួន១០ក្រុមហ៊ុន ក្នុងនោះចំនួន០៦ បានស្នើសុំអាជ្ញាប័ណ្ណ ពីក្រសួងទេសចរណ៍ និង ០៤ សុំអាជ្ញាប័ណ្ណនៅសាលាខេត្តព្រះសីហនុ៕

ដោយ ងូ សុមុនី