AKP ក្រចេះ ថ្ងៃទី១៥ ខែមករា ឆ្នាំ២០២១ -- ឯកឧត្តម ហឿ ស៊ីយ៉ែម ប្រធានក្រុមប្រឹក្សាខេត្ត បានអញ្ជើញចុះពិនិត្យដំណាំស្រូវ រដូវប្រាំង ដែលបានស្តារឡើងវិញក្រោយទឹកជំនន់ទន្លេមេគង្គនៅក្នុងសង្កាត់អូរឫស្សី ក្រុងក្រចេះ ខេត្តក្រចេះ កាលពីព្រឹកថ្ងៃសុក្រ ២កើត ខែមាឃ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៥ ខែមករា ឆ្នាំ២០២១។

លោក ឈឺន រិទ្ធ ចៅសង្កាត់អូរប្ញស្សី ក្រុងក្រចេះបានឱ្យដឹងថា សង្កាត់អូរប្ញស្សី មានផ្ទៃដីស្រូវរដូវប្រាំងសរុបចំនួន ២១៤ ហិកតា ក្នុងនោះផ្ទៃដីជាង៥៧ហិកតា ដែលខូចខាត ដោយទឹកជំនន់ទន្លេមេគង្គ ត្រូវបានស្តារឡើងដោយជំនួយស្រូវពូជពីរាជរដ្ឋាភិបាល។

ក្នុងឱកាសចុះពិនិត្យមើលស្រូវប្រាំងដែលបានស្តារឡើងវិញ ក្រោយទឹកជំនន់ ទន្លេមេគង្គនៅក្នុងសង្កាត់អូរប្ញស្សី ក្រុងក្រចេះនោះឯកឧត្ដម ហឿ ស៊ីយ៉ែម ប្រធានក្រុមប្រឹក្សា ខេត្តបានជួបសំណេះសំណាលជាមួយប្រជាកសិករ ដោយការលើកទឹកចិត្តឱ្យពួកគាត់ខិតខំ បង្កបង្កើនផល និងថែទាំដំណាំស្រូវប្រាំងដែលកំពុងតែឱ្យផលបានល្អ។  ឯកឧត្ដមប្រធាន ក្រុមប្រឹក្សាខេត្តក៏បានជំរុញដល់មន្ទីរកសិកម្ម រុក្ខាប្រមាញ់ និងនេសាទ បន្តសហការ ផ្តល់ បច្ចេកទេសជួយដល់ប្រជាកសិកររហូតដល់ការប្រមូលផលបានចប់សព្វគ្រប់ និងបន្តជំរុញ ការបង្កបង្កើនផលដាំដំណាំរួមផ្សំផ្សេងៗ ដល់ប្រជាកសិករផងដែរ ។

គួររម្លឹកថា កាលពីខែតុលា ឆ្នាំ២០២០ កន្លងទៅ ទឹកជំនន់ទន្លេមេគង្គបានបង្កឱ្យប៉ះពាល់ ដល់ផ្ទៃដីស្រូវរដូវប្រាំងនៅខេត្តក្រចេះប្រមាណ ២២៧៥ហិកតា និងខូចខាតទាំងស្រុង១៧០៤ ហិកតា ដែលត្រូវបានស្តារឡើងវិញដោយជំនួយផ្នែកពូជស្រូវពីរាជរដ្ឋាភិបាលកម្ពុជា៕

ដោយ ជួន សុជាតិ