AKP ភ្នំពេញ ថ្ងៃទី១៥ ខែមករា ឆ្នាំ២០២១--វិធានការ “០៣ការពារ និង ០៣កុំ” បានក្លាយជាអភិក្រមរួចទៅហើយ តាមរយៈអនុសាសន៍ដ៏ខ្ពង់ខ្ពស់របស់ សម្តេចតេជោ កាលពីពេលថ្មីៗនេះ គឺជាអភិក្រមដ៏មានប្រសិទ្ធភាពបំផុត ហើយដែលត្រូវតែអនុវត្តជាចាំបាច់ នៅក្នុងបរិបទនៃការរីករាលដាលនៃវីរុសកូវីដ-១៩ នៅកម្ពុជា។ នេះបើតាម លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ថ្លែងប្រាប់ទីភ្នាក់ងារសារព័ត៌មានកម្ពុជា នៅព្រឹកថ្ងៃទី១៥ ខែមករា ឆ្នាំ២០២១ នេះ។

លោកជំទាវវេជ្ជបណ្ឌិត បានរម្លឹកជាថ្មីថា ៖ “អភិក្រម០៣ការពារ មានដូចជា ទី១ គឺពាក់ម៉ាស នៅពេលចេញក្រៅ ឬក្នុងករណីចាំបាច់ ទី២ គឺត្រូវលាងដៃឱ្យបានញឹកញាប់ ជាមួយសាប៊ូ ឬអាល់កុល ឬជែល ទី៣ គឺត្រូរក្សាគម្លាតសុវត្ថិភាពរវាងបុគ្គលទៅបុគ្គល ពីមួយម៉ែត្រកន្លះឡើង។ អភិក្រម ០៣កុំ មានដូចជា ទី១ កុំទៅកន្លែងមានមនុស្សច្រើន ទី២ កុំទៅកន្លែងដែលបិទជិតគ្មានខ្យល់ចេញចូល ប្រើម៉ាស៊ីនត្រជាក់ច្រើន និងទី៣ កុំប៉ះពាល់គ្នា ដូចជាពេលជួបគ្នា កុំចាប់ដៃគ្នា កុំឱបគ្នា កុំកៀកកគ្នា ជាដើម ដោយប្តូរឥរិយាបទនៃការគាវរកិច្ចគ្នាមកជា សំពះ អោនក្បាល ឬងក់ក្បាលវិញ”។ 

លោកជំទាវបានបន្ថែមថា ពិតមែនតែព្រឹត្តិការណ៍សហគមន៍ ២៨វិច្ឆិកា បានបិទបញ្ចប់ក៏ពិតមែន ប៉ុន្តែបញ្ហានៃការចម្លង និងរីករាលដាលនៅមិនទាន់បញ្ចប់នោះទេ ហើយក្រុមការងារនៃក្រសួងសុខាភិបាលបានគិតរួចមកហើយថា បញ្ហានេះនឹងបន្តកើនឡើងជាបន្តទៀត បន្ទាប់ពីការរកឃើញករណីវិជ្ជមានវីរុសកូវីដ-១៩ លើពលករកម្ពុជាដែលធ្វើដំណើរមកពីប្រទេសថៃ ជាពិសេសនោះគឺបន្ទាប់ពីមានការផ្ទុះជំងឺនេះក្នុងសហគមន៍ ជាលក្ខណៈទ្រង់ទ្រាយធំ នៅក្នុងខេត្តសាមុតសាខន ប្រទេសថៃ កាលពីពេលកន្លងទៅ។

ដោយសារតែកត្តាទាំងនេះហើយ ទើបក្រសួងសុខាភិបាល តែងតែអំពាវនាវហើយអំពាវនាវទៀត គឺសូមបងប្អូនប្រជាពលរដ្ឋកុំធ្វេសប្រហែសឱ្យសោះ ព្រោះថាការចម្លង ការរាតត្បាតនៃជំងឺនេះ នៅតែជាបញ្ហាសុខភាពសាធារណៈ និងនៅតែជាហានិភ័យគ្រប់ពេលវេលា គ្រប់កាលៈទេសៈ និងគ្រប់ទីកន្លែង បើមានការធ្វេសប្រហែសតែបន្តិចនោះ ហើយបញ្ហានេះទាមទារឱ្យមានការចូលរួមអនុវត្តពីគ្រប់ភាគីពាក់ព័ន្ធទាំងអស់ ហើយបើទោះជាមានការវិវត្តល្អនៃវ៉ាក់សាំងការពារជំងឺនេះក៏ដោយ ក៏វិធានការ ០៣ការពារ និង០៣កុំ គឺត្រូវតែអនុវត្តឱ្យបានខ្ជាប់ខ្ជួនបំផុត។

គួររម្លឹកថា នៅព្រឹកថ្ងៃនេះ ក្រសួងសុខាភិបាល បានប្រកាសពីការរកឃើញករណីវិជ្ជមានវីរុសកូវីដ-១៩ ថ្មី ចំនួន ១៥នាក់ ដែលសុទ្ធតែជាពលករខ្មែរដែលធ្វើដំណើរមកពីប្រទេសថៃ ដែលធ្វើឱ្យតួលេខសរុបទូទាំងប្រទេសកើនឡើងដល់ ៤២៦ករណី ក្នុងនោះព្យាបាលជាសះស្បើយចំនួន ៣៨១ករណី។

ដោយ ផែន រតនៈ