AKP បាត់ដំបង ថ្ងៃទី១៥ ខែមករា ឆ្នាំ២០២១--នៅថ្ងៃ១កើត ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃព្រហស្បតិ៍ ទី១៤ ខែមករា ឆ្នាំ២០២១ ឯកឧត្តម ងួន រតនៈ អភិបាលខេត្តបាត់ដំបង និងជាប្រធានគណៈបញ្ជាការឯកភាពរដ្ឋបាលខេត្ត បានអញ្ជើញដឹកនាំកិច្ចប្រជុំ     គណៈបញ្ជាការឯកភាពខេត្ត ត្រួតពិនិត្យការងារប្រចាំខែធ្នូ ឆ្នាំ២០២០កន្លងទៅ ដែលមានការអញ្ជើញចូលរួមពីអភិបាលរងខេត្ត អភិបាលក្រុង ស្រុកមួយចំនួន លោក លោកស្រី ប្រធាន អនុប្រធាន មន្ទីរអង្គភាព កងកម្លាំងប្រដាប់អាវុធទាំងបីប្រភេទ និងអ្នកពាក់ព័ន្ធជាច្រើននាក់ទៀត ។ 

ក្រោយពីស្ដាប់នូវរបាយការណ៍ និងការរាយការណ៍តាមអង្គភាពនីមួយៗ រួចមក ឯកឧត្តម ងួន រតនៈ បានធ្វើការកោតសរសើរចំពោះកងកម្លាំងប្រដាប់ទាំងអស់ ដែលបានចូលរួមសហការក្នុងការទប់ស្កាត់ល្បែងស៊ីសងនានា ដែលកើតមាននៅតាមស្រុកភូមិបានយ៉ាងមានប្រសិទ្ធភាព ។ ឯកឧត្តមក៏បានសំណូមពរដល់អាជ្ញាធរមូលដ្ឋាន ចូលរួមក្នុងវិធានការភូមិឃុំមានសុវត្ថិភាព បង្រ្កាបបទល្មើសនានាឱ្យមានប្រសិទ្ធភាព ធ្វើការណែនាំប្រជាពលរដ្ឋស្ដីពីច្បាប់ចរាចរណ៍ និងច្បាប់ផ្សេងៗ ជាពិសេសកាត់បន្ថយអាត្រាការស្លាប់ដោយគ្រោះថ្នាក់ផ្សេង ៗទៀត មិនថាគ្រោះថ្នាក់ចរាចរណ៍ឡើយ វាប៉ះពាល់ដល់ការងារសង្គម ធ្វើឱ្យមានការខ្វះខាតកម្លាំងពលកម្មក្នុងគ្រួសារ និងសង្គមជាដើម ។ 

ទាក់ទងនឹងបញ្ហាតាមស្ថានីយចាក់ប្រេងឥទ្ធនៈទាំងអស់ ឯកឧត្តមអភិបាលខេត្ត បានណែនាំឱ្យមន្រ្ដីជំនាញរបស់មន្ទីរឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្តន៍ ចុះតាមដាន និងត្រួតពិនិត្យជាប្រចាំដោយផ្ទាល់នៅតាមស្ថានីយចាក់ប្រេងឥទ្ធនៈនានាក្នុងខេត្ត ហើយធ្វើការណែនាំ និងចាត់វិធានការភ្លាមៗ តាមនីតិវិធីដែលបានចែង បើសិនរកឃើញថា ការចាក់ប្រេងមិនគ្រប់ចំណុះត្រឹមត្រូវ ប្រេងឥទ្ធនៈគ្មានគុណភាព និងមិនសុទ្ធ ដើម្បីផ្ដល់ទំនុកចិត្តដល់ប្រជាពលរដ្ឋដែលជាអ្នកប្រើប្រាស់ ហើយក៏ដើម្បីចៀសនូវភាពមិនពេញចិត្តដែលកន្លងមកមានមតិរិះគន់ជាច្រើនពាក់ព័ន្ធនឹងបញ្ហាប្រេងឥទ្ធនៈ ។ 

ឯកឧត្តមងួន រតនៈ បន្តថា នាឱកាសបើកបវេសនកាលឆ្នាំសិក្សាថ្មីកន្លងទៅថ្មីនេះ មានសាលារៀនមួយចំនួនក្នុងខេត្តបាត់ដំបង បើកដំណើរការធម្មតា ហើយសាលារៀនមួយចំនួនទៀតមិនទាន់អាចបើកដំណើរការបាន ដោយសារសាលាមួយចំនួនជាប់ភារកិច្ច ក្នុងការធ្វើជាមណ្ឌលចត្តាឡីស័ក សម្រាប់ពលករចំណាកស្រុកមកពីប្រទេសថៃ ។ ឯកឧត្តម សុំឱ្យមានការយោគយល់ដល់អាណាព្យាបាលសិស្ស ព្រោះនេះគឺជាភារកិច្ចរបស់ខេត្ត តាមការណែនាំរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការដាក់ពលករដែលមកពីប្រទេសនៅតាមព្រំដែន ដោយប្រការនេះវាល្អប្រសើរជាងពេលដែលដឹកពលករទៅតាមបណ្ដាស្រុក ឬខេត្តផ្សេងៗ ដែលអាចប្រឈមទៅនឹងការបិទសាលាទូទាំងខេត្ត ឈានទៅដល់ទូទាំងប្រទេសទៀត ។ 

ឯកឧត្តម បានបន្តថា សូមឱ្យអាជ្ញាធរមូលដ្ឋានរៀបចំទីកន្លែងត្រឹមត្រូវ ឬសាលារៀនខ្នាតតូចផ្សេងទៀត ប្រសិនបើចំនួនពលករដែលធ្វើចត្តាឡីស័កមានចំនួនតិច។ ព្រោះមណ្ឌលចត្តាឡីស័កខ្លះមានចំនួនពលករដែលនៅសល់តែ៥ ទៅ៦នាក់តែប៉ុណ្ណោះ ហើយប្រើប្រាស់សាលារៀនខ្នាតធំ ធ្វើឱ្យចំនួនសិស្សមួយចំនួនធំមិនអាចបន្តការសិក្សាបាន។ ដូចនេះត្រូវរកសាលាណាដែលខ្នាតតូច សម្រាប់ធ្វើជាមណ្ឌលចត្តាឡីស័ក ហើយឱ្យសាលាវិទ្យាល័យ ឬអនុវិទ្យាល័យដែលមានចំនួនសិស្សច្រើនបានបន្តការសិក្សាផងដែរ ៕

ដោយ ណយ នឿន (ប្រភព:រដ្ឋបាលខេត្តបាត់ដំបង)