AKP កណ្តាល ថ្ងៃទី១៤ ខែមករា ឆ្នាំ ២០២១--នៅថ្ងៃ១៥រោច ខែបុស្សឆ្នាំជូត​ ទោ ស័ក ព.ស. ២៥៦៤ត្រូវនឹងថ្ងៃពុធ ទី១៣ ខែមករា ឆ្នាំ២០២១ ឯកឧត្តម គង់ សោភ័ណ្ឌ អភិបាលខេត្តកណ្តាល និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល បាននាំយកអំណោយ របស់សាខាកាកបាទក្រហមកម្ពុជាខេត្ត ទៅចែកជូនដល់អង្គការជំនួយនៃក្តីសង្ឃឹមសម្រាប់សហគមន៍ទាំង៥សាខាក្នុងខេត្តកណ្តាល នៅអនុវិទ្យាល័យអនុវត្ត ស្ថិតនៅភូមិព្រែកសំរោង សង្កាត់តាខ្មៅ ក្រុងតាខ្មៅ និង បានសួរសុខទុក្ខលោកគ្រូ អ្នកគ្រូ ដែលបង្រៀនកុមារខ្សោយសតិបញ្ញា ក្នុងឱកាសនោះផងដែរ ។ 

ឯកឧត្តម គង់ សោភ័ណ្ឌ​ ក៏បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តាំសួរសុខទុក្ខ ក្តីអាណិតស្រឡាញ់ប្រកបដោយមនោសញ្ចេតនាយ៉ាងជ្រាលជ្រៅ​ ចំពោះក្មួយៗកុមារ​ទាំងអស់​ និងបានថ្លែងនូវការកោតសរសើរចំពោះទឹកចិត្តដ៏ថ្លៃថ្លារបស់លោកគ្រូ អ្នកគ្រូ បុគ្គលិក​ អ្នកស្ម័គ្រចិត្តបរទេស ដែលបានយកអស់កម្លាំងកាយ ចិត្ត​រួមចំណែកលើកកម្ពស់តម្លៃមនុស្សធម៌ របស់មនុស្សជាតិ​ ពិសេសជួយឱ្យកុមារពិការខ្សោយសតិបញ្ញាទាំងអស់​ បានរស់នៅប្រកបដោយសេចក្តីថ្លៃថ្នូរ​ មានការចិញ្ចឹមបីបាច់ ​ផ្តល់ភាពកក់ក្តៅ​ និង   ផ្តល់ការអប់រំ។​

សូមបញ្ជាក់ថា​​ អំណោយដែលចែកជូនអង្គការជំនួយនៃក្តីសង្ឃឹមសម្រាប់សហគមន៍ ទាំងអស់ រួមមាន៖​ អង្ករ​ ៥តោន,​ ​មី ៥០កេស​តូច, ទឹកបរិសុទ្ធដបធំចំនួន ២០កេស, ត្រីខកំប៉ុង​ ២កេស,​ ទឹកត្រី ១០យួរ, ទឹកស៊ីអ៊ីវ ១០យួរ, ប្រេងឆា ៣កេស, អាល់កុល ៣០ដប់, និងម៉ាសចំនួន ២៥០បន្ទះ​ ៕ 

ដោយ ណយ នឿន (ប្រភព:រដ្ឋបាលខេត្តកណ្តាល)