AKP មណ្ឌលគិរី ថ្ងៃទី១៣ ខែមករា ឆ្នាំ២០២១ -- ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពលបានព្រមានដល់ក្រុមហ៊ុនរ៉ែមាស រង់ ឈីង អ៊ិនដាសស្រ្ទៀល អ៊ិនវេសមេន(ខេមបូឌា)ខូអិលធីឌី ដែលកំពុងតែធ្វើអាជីវកម្ម​នៅក្នុងខេត្ដមណ្ឌលគិរីដោយអះអាងថា គិតត្រឹមដំណាច់ឆ្នាំ ២០២១នេះ បើក្រុមហ៊ុន​មិន​មាន​សកម្មភាព​ប្រតិបត្តិការចម្រាញ់រ៉ែមាស ក្រសួងនឹងលុបអាជ្ញាប័ណ្ណ​ក្រុម​ហ៊ុន ហើយ​នឹង​ដាក់ដេញថ្លៃបន្តឱ្យក្រុមហ៊ុនថ្មីចូលធ្វើជំនួស ខណៈក្រុមហ៊ុន​មិនមាន​សង្វាក់​ផលិតកម្ម​ក្រោយ​ពីទទួលបានអាជ្ញាប័ណ្ណជាច្រើនឆ្នាំនាពេលកន្លងមក។ ការព្រមាននេះ បានធ្វើឡើង ក្នុងឱកាសចុះទស្សនកិច្ច និងត្រួតពិនិត្យទីតាំង​ក្រុមហ៊ុន​រ៉ែមាស រង់ ឈីង អ៊ិនដាស​ស្រ្ទៀល អ៊ិនវេសមេន(ខេមបូឌា)ខូអិលធីឌី កាលពីថ្ងៃទី១២ ខែមករា ឆ្នាំ២០២១ ស្ថិតនៅ​ក្នុងភូមិពូទុង ឃុំចុងផ្លាស់ ស្រុកកែវសីមា ខេត្ដមណ្ឌលគិរី។

ឯកឧត្ដម ស៊ុយ សែម បានគូសបញ្ជាក់ថា ក្រោយពីក្រសួង រ៉ែនឹងថាមពល បាន​សម្រេចអនុញ្ញាតផ្ដល់អាជ្ញាប័ណ្ណធ្វើអាជីវកម្ម រ៉ែមាស ដល់ក្រុមហ៊ុននេះអស់រយៈពេល ១០​ឆ្នាំ ទៅហើយ ប៉ុន្តែក្រុមហ៊ុន នៅតែមិនមានដំណើរការអាជីវកម្មរ៉ែមាស។ ដូច្នេះ បើនៅ​តែ​បន្តអាជ្ញាប័ណ្ណ នាំតែខាតពេលវេលានោះទេ។ ឯកឧត្តមរដ្ឋមន្រ្ដីបានបន្ដថា ក្រសួងសម្រេច បន្តអាជ្ញាប័ណ្ណឱ្យក្រុមហ៊ុនបន្ដទៀត ប៉ុន្តែត្រូវមានលក្ខខណ្ឌ ធ្វើប្រតិបត្តិការអាជីវកម្ម ដោយ​ចាប់ផ្ដើមពីពេលនេះតទៅ បើនៅក្នុងអំឡុងចុងឆ្នាំ២០២១នេះ មិនមានការផលិត មាស​តាមការគ្រោងទុក ក្រសួងនឹងដកយកអាជ្ញាប័ណ្ណមកវិញ ។

ពាក់ព័ន្ធនឹងការលើកឡើងរបស់ឯកឧត្ដមរដ្ឋមន្រ្ដីក្រសួងរ៉ែ និងថាមពលនេះ តំណាង​​ក្រុមហ៊ុន រង់ ឈិន បានបញ្ជាក់ដែរថា ក្រុមហ៊ុនរបស់ខ្លួន គឺបានផ្ទេរទីតាំង​ក្រុមហ៊ុន​នេះ ពីក្រុមហ៊ុនចាស់ដែលជាម្ចាស់អាជ្ញាប័ណ្ណ ហើយទើបធ្វើឱ្យសង្វាក់ផលិតកម្ម មានភាព​រអាក់រអួល។ លើសពីនេះទៀត ក្រោយពីក្រុមហ៊ុន ទទួលការងារបន្តពីម្ចាស់ដើម អាជ្ញា​ប័ណ្ណ នៅសល់រយៈពេលខ្លី ហើយត្រូវជួបប្រទះបញ្ហាកូវីដ១៩ ដែលបានបណ្ដាលឱ្យ ក្រុម​អ្នកជំនាញ នៅប្រទេសចិន មិនអាចធ្វើដំណើរមកបំពេញការងារឱ្យក្រុមហ៊ុនបាន។

ឯកឧត្តម ស៊ុយ សែម ក៏បានដាក់ចេញនូវដំណោះស្រាយដល់ក្រុមហ៊ុន ដើម្បី​មាន​ភាពងាយស្រួលក្នុងការយកអ្នកបច្ចេកទេសពីប្រទេសចិនមកបំពេញការងារ និង​សម្រេច​បន្តសុពលភាពអាជ្ញាប័ណ្ណដល់ក្រុមហ៊ុន ដើម្បីឱ្យក្រុមហ៊ុនអាច​សាកល្បងអាជីវ​កម្ម​របស់​ខ្លួន​បាន៕

ដោយ រិទ្ធី ប្រភព៖ មន្ទីរព័ត៌មានខេត្ដមណ្ឌលគិរី