AKP សៀមរាប ថ្ងៃទី១៣ ខែមករា ឆ្នាំ២០២១ -- អាជ្ញាធរខេត្តសៀមរាបនៅថ្ងៃទី១៣ ខែមករា ឆ្នាំ២០២១នេះ បានបើកកិច្ចប្រជុំពិភាក្សា មួយស្តីពីការកំណត់ព្រំប្រទល់រដ្ឋបាលរវាងខេត្តសៀមរាប និងខេត្តឧត្តរមានជ័យ ក្នុងគោល បំណងសិក្សាអំពីភូមិសាស្ត្រមួយចំនួន ដែលមានការពាក់ព័ន្ធទៅនឹងបញ្ហាព្រំប្រទល់រវាង ខេត្តសៀមរាប និងខេត្តឧត្តរមានជ័យ ដែលបញ្ហានេះកើតមានជាយូរឆ្នាំមកហើយ និងបានធ្វើ ឱ្យប៉ះពាល់ដល់អារម្មណ៍របស់ប្រជាពលរដ្ឋ ក៏ដូចអាជ្ញាធរដែលមានព្រំប្រទល់រដ្ឋបាលជាប់គ្នា ក្នុងការគ្រប់គ្រងត្រួតលើគ្នា។ 

នៅក្នុងកិច្ចប្រជុំនេះ ក៏មានការបង្ហាញពីគំនូសខ្សែផែនទីព្រំប្រទល់ថ្មី ដែលអគ្គនាយក ដ្ឋានភូមិសាស្ត្របានចុះធ្វើការសិក្សាកន្លងមក និងស្តាប់នូវរាល់សំណូមពររបស់អាជ្ញាធរ មូលដ្ឋានដើម្បីធ្វើការកែសម្រួលព្រំប្រទល់ ឬក៏ឯកភាពទៅតាមគំនូស ខ្សែព្រំប្រទល់ថ្មីក្នុងការ យកចំណុចទាំងនោះទៅធ្វើការប្រជុំពិភាក្សាជាមួយ ខេត្តឧត្តរមានជ័យនៅថ្ងៃខាងមុខនេះ។

ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា អាជ្ញាធរស្រុក ដែលពាក់ព័ន្ធទាំងអស់ត្រូវកំណត់ និងបង្ហាញអំពីស្ថានភាពភូមិសាស្ត្រ និងប្រវត្តិឱ្យបាន ច្បាស់លាល់ ដោយយក អូរ ស្ទឹង បឹង ព្រែក ផ្លូវកំណត់ជាគោលនៃការកំណត់ព្រំប្រទល់។

ឯកឧត្តមបានបន្តថា ប្រជាពលរដ្ឋក្នុងតំបន់មូលដ្ឋានដែលមានព្រំប្រទល់ មិនច្បាស់ លាស់ បច្ចុប្បន្ននេះ គឺបានស្ថិតនៅក្រោមការគ្រប់គ្រងអាជ្ញាធរស្រុកទាំងបីរបស់ខេត្តសៀមរាប រួមមានស្រុកស្រីស្នំ ស្រុកវ៉ារិន និងស្រុកស្វាយលើ ដោយពួកគាត់ទាំងនោះទទួលបាននូវ សេវាសាធារណៈពីអាជ្ញាធរស្រុកទាំងបីទៀតផង។  ក្នុងនោះដែរឯកឧត្តមក៏បានធ្វើការណែនាំ ដល់អាជ្ញារស្រុកទាំងបី គឺត្រូវធ្វើការចងក្រងឯកសារឱ្យបានគ្រប់ជ្រុងជ្រោយ ដែលខ្លួនមាននា ពេលកន្លង ដែលជាវត្ថុតាងមួយដ៏សំខាន់ សម្រាប់អាជ្ញាធរស្រុក ដើមី្បដាក់ចូលទៅក្នុង របៀបវារៈកិច្ចប្រជុំនាថ្ងៃខាងមុខនេះ រវាងថ្នាក់ដឹកនាំនៃខេត្តទាំងពីរ ដែលគ្រោងនឹងធ្វើឡើង នៅក្នុងខេត្តសៀមរាប៕

ដោយ ឃុត សៅ