AKP សៀមរាប ថ្ងៃទី​​​​១២ ខែមករា ឆ្នាំ២០២១--កាលពីព្រឹកថ្ងៃ១៣រោច ខែបុស្ស ឆ្នាំជូត ទោ ស័ក ព.ស. ២៥៦៤ ត្រូវនឹងថ្ងៃចន្ទ ទី១១ ខែមករា ឆ្នាំ២០២១ លោក ឈាង រ័ត្ន និងលោកស្រី នួន ស៊ុន្ទរី (ហៅស្រីអូន) ជាម្ចាស់ក្រុមហ៊ុន សម្រស់ធម្មជាតិ បាននាំយកថវិការចំនួន ៥លានរៀល យកទៅជូនដល់ទី  ស្នាក់ការសាខាកាកបាទក្រហមកម្ពុជាខេត្តសៀមរាប ដែលក្នុងពេលនោះលោក ស៊ុំ សំអន នាយកសាខាកាកបាទក្រហមកម្ពុជាខេត្តសៀមរាបជាអ្នកទទួលអំណោយខាងលើនេះ។ 

នៅក្នុងពិធីប្រគល់អំណោយនោះ លោក ឈាង រ័ត្ន បានមានប្រសាសន៍ឱ្យដឹងថា ថវិកាដែលប្រគល់ជូនសាខាកាកបាទក្រហមកម្ពុជា ខេត្តសៀមរាបនាពេលនេះ គឺជាទឹកចិត្តសប្បុរសរបស់លោក និងក្រុមគ្រួសារ ក្នុងការរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា។ ការបរិច្ចាគនេះគឺដោយសទ្ធាជ្រះថ្លា ក្នុងការចែករំលែកជួយគ្នា ទោះតិចក្ដីច្រើនក្ដី តែជាទឹកចិត្តជួយគ្នាក្នុងគ្រាក្រ គ្រាលំបាក។ 

ជាការឆ្លើយតប លោក ស៊ុំ សំអន តំណាងឱ្យឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសធម៌របស់លោក ឈាង រ័ត្ន និងលោកស្រី នួន ស៊ុន្ទរី ព្រមទាំងនិយោជិតក្រុមហ៊ុនសម្រស់ធម្មជាតិ ដែលបានយកចិត្តទុកដាក់ចូលរួមចំណែកក្នុងសកម្មភាពមនុស្សធម៌ គឺសបញ្ជាក់ពីទឹកចិត្តដ៏ប្បុរសធម៌ចំពោះបងប្អូនប្រជាពលរដ្ឋរងគ្រោះ និងងាយរងគ្រោះបំផុត។

លោក ស៊ុំ សំអន បន្តថា សាខាកាកបាទក្រហមកម្ពុជាខេត្តសៀមរាប នឹងប្រើប្រាស់នូវថវិកានេះ ឱ្យចំគោលដៅមនុស្សធម៌ ដោយមិនប្រកាន់ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការ របស់ចលនាអន្តរជាតិកាកបាទក្រហម អឌ្ឍចន្ទក្រហម។ លោកក៏បានជូនពរដល់លោក ឈាង រ័ត្ន និងលោកស្រី នួន ស៊ុន្ទរី (ហៅស្រីអូន) ព្រមទាំងនិយោជិតក្រុមហ៊ុន សម្រស់ធម្មជាតិ សូមជួបប្រទះនូវពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយហង្ស សៀក