AKP ស្វាយរៀង ថ្ងៃទី១១ ខែមករា ឆ្នាំ២០២០ -- ឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង បានធ្វើការណែនាំដល់អស់លោក លោកស្រីជានាយ នាយរង និងពលអាវុធហត្ថទាំងអស់ ត្រូវខិតខំគោរពបទបញ្ជា និងវិន័យរបស់កងរាជអាវុធហត្ថ ការសាមគី្គភាពផ្ទៃក្នុងនៅក្នុងអង្គភាព ក៏ដូចជាការចូលរួមសហការជាមួយអាជ្ញាធរមូលដ្ឋានឱ្យបានល្អប្រសើរដើម្បីបន្តការការពារសន្តិសុខ ការបង្ក្រាបបទល្មើសនានាដែលកើតមានឡើងនៅក្នុងមូលដ្ឋាន ដូចជាបទល្មើសគ្រឿងញៀន លួចឆក់ប្លន់ជាដើម។

ឯកឧត្តម អភិបាលខេត្ត បានថ្លែងដូច្នេះ ក្នុងឱកាសអញ្ជើញជាអធិបតីពិធីបញ្ចុះបឋមសិលាសាងសង់អគាររដ្ឋបាលមូលដ្ឋានកងរាជអាវុធហត្ថស្រុកស្វាយជ្រំ ខេត្តស្វាយរៀង ដោយមានការអញ្ជើញចូលរួមពី ឯកឧត្តមអភិបាលរងខេត្ត  ឯកឧត្តមព្រះរាជអាជ្ញា អមសាលាដំបូងខេត្ត លោកឧត្ដមសេនីយ៍ត្រីមេបញ្ជាការកងរាជអាវុធហត្ថខេត្ត លោកឧត្ដមសេនីយ៍ វរៈសេនីយ៍ស្នងការរងនគរបាលខេត្ត មេញ្ជាការរងកងរាជអាវុធហត្ថខេត្ត មេបញ្ជាការរងតំបន់ប្រតិបត្តិការសឹករងខេត្ត លោកប្រធានមន្ទីរ-អង្គភាពពាក់ព័ន្ធ លោកប្រធានក្រុមប្រឹក្សាស្រុក លោក-លោកស្រីអភិបាល អភិបាលរងស្រុក និងមន្ត្រីរាជការ កងកម្លាំងទាំង៣ប្រភេទជាច្រើនរូបទៀត។

ជាមួយគ្នានេះ ឯកឧត្តម ម៉ែន វិបុល ស្នើអាជ្ញាធរពាក់ព័ន្ធទាំងអស់ចូលរួមផ្សព្វផ្សាយអប់រំប្រជាពលរដ្ឋឱ្យចូលរួមគោរពច្បាប់ចរាចរណ៍ផ្លូវគោកដើម្បីកាត់បន្ថយគ្រោះថ្នាក់ចរាចរណ៍ដែលកើតមានឡើងនៅតាមដងផ្លូវសាធារណៈនានា។ ទន្ទឹមនេះ កងរាជអាវុធហត្ថត្រូវថែរក្សាសុខភាព និងអនុវត្តតាមការណែនាំរបស់ក្រសួងសុខាភិបាលដើម្បីកុំឱ្យមានការឆ្លងរីករាលដាលជំងឺកូវីដ-១៩ ផងដែរ។

ឯកឧត្តម ម៉ែន វិបុល ក៏បានធ្វើការផ្តាំផ្ញើដល់ក្រុមជាងដែលទទួលការសាងសង់អាគាររដ្ឋបាលមូលដ្ឋានកងរាជអាវុធហត្ថស្រុកស្វាយជ្រុំ ត្រូវខិតខំធ្វើឱ្យសំណង់នេះឱ្យធានាគុណភាពជាប់បានយូរអង្វែង មានសោភ័ណភាព សាកសមជាកន្លែងធ្វើការងាររបស់កម្លាំងរាជអាវុធហត្ថដែលបម្រើការងារការពារសន្តិសុខជូនប្រជាពលរដ្ឋ។

សូមបញ្ជាក់ថា អាគាររដ្ឋបាលមូលដ្ឋានថ្មីនៃកងរាជអាវុធហត្ថស្រុកស្វាយជ្រុំដែលនឹងចាប់ផ្តើមសាងសង់នៅពេលខាងមុខនេះនេះ គឺជាការចាប់ផ្ដើមអភិវឌ្ឍនូវសមិទ្ធិផលថ្មីសម្រាប់ឆ្នាំ២០២១ នៅលើទឹកដីស្រុកស្វាយជ្រំ ខេត្តស្វាយរៀង សម្រាប់បម្រើការងារការពារសន្តិសុខសណ្ដាប់ធ្នាប់សាធារណៈជូនប្រជាពលរដ្ឋនៅក្នុងខេត្ត៕

ប្រភព៖ មន្ទីរព័ត៌មានខេត្តស្វាយរៀង