AKP កំពង់ចាម ថ្ងៃទី១១ ខែមករា ឆ្នាំ២០២១ -- រដ្ឋបាលខេត្តកំពង់ចាម បានរៀបចំពិធីបើកបវេសនកាលថ្មីឆ្នាំ២០២០-២០២១ និង សម្ពោធដាក់ឱ្យប្រើប្រាស់នូវអគារស្នាក់នៅរបស់កុមារពិការភ្នែក គរ ថ្លង់ ១ខ្នង មាន កម្ពស់៣ជាន់ ស្មើនឹង១២បន្ទប់ នាព្រឹកថ្ងៃចន្ទ ១៣រោច ខែបុស្ស ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី១១ ខែមករា ឆ្នាំ២០២១ នៅវិទ្យាល័យអប់រំពិសេស ស្ថិតនៅក្នុង សង្កាត់វាលវង់ ក្រុងកំពង់ចាម ខេត្តកំពង់ចាម ដែលជាអំណោយដ៏ថ្លៃថ្លា របស់មូលនិធិ ហោ ណាំហុង បុរីហោ ជូនដល់វិទ្យាល័យអប់រំពិសេសក្រុងកំពង់ចាម។

ពិធីនេះប្រព្រឹត្តទៅក្រោមអធិបតីភាពរបស់ឯកឧត្តម ហោ ណាំហុង ឧបនាយករដ្ឋមន្រ្ដី និងមានការអញ្ជើញចូលរួមដោយឯកឧត្តម ហង់ ជួនណារ៉ុន រដ្ឋមន្រ្ដីក្រសួងអប់រំ យុវជន និងកីឡា ឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មាន ឯកឧត្តម ខ្លូត ផន ប្រធានក្រុមប្រឹក្សាខេត្ត ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ព្រមទាំងឯកឧត្តម លោកជំទាវ ជាសមាជិករដ្ឋសភា សមាជិករាជរដ្ឋាភិបាល ថ្នាក់ដឹកនាំ នៃបណ្ដាមន្ទីរអង្គភាពជុំវិញខេត្ត និងលោកគ្រូ អ្នកគ្រូ ព្រមទាំងកុមារពិការភ្នែក គរ ថ្លង់ នៃវិទ្យាល័យអប់រំពិសេសយ៉ាងច្រើនកុះករ។

ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានថ្លែងសុន្ទរកថា ស្វាគមន៍ដោយថ្លែងអំណរគុណដល់ឯកឧត្តមឧបនាយករដ្ឋមន្រ្ដី ដែលអញ្ជើញជា អធិបតីក្នុងពិធីបើកបវេសនកាលថ្មីឆ្នាំសិក្សា២០២០-២០២១ក្នុងខេត្តកំពង់ចាម និងសម្ពោធ ដាក់ឱ្យប្រើប្រាស់អគារស្នាក់នៅរបស់កុមារពិការភ្នែក គរ ថ្លង់ ដែលជាអំណោយ ដ៏ថ្លៃថ្លារបស់មូលនិធិ ហោ ណាំហុង បុរីហោ ជូនដល់វិទ្យាល័យអប់រំពិសេសក្រុងកំពង់ចាម។

ឯកឧត្តម អ៊ុន ចាន់ដា ក៏បានលើកឡើងថា វិទ្យាល័យអប់រំពិសេស ខេត្តកំពង់ចាម មានអគារសរុប៧ខ្នងស្មើនឹង៤៤បន្ទប់ មានសិស្សសរុប១៧២នាក់ ស្រី៧៣នាក់ ក្នុងនោះកុមារពិការភ្នែក មានចំនួន៥៥នាក់ ស្រី២៤នាក់ កុមារ គរ ថ្លង់មានចំនួន១១៧នាក់ ស្រី៤៩នាក់ និងបុគ្គលិកចំនួន៣០នាក់ ស្រីចំនួន១១នាក់។ ជានិច្ចកាលបុគ្គលិក និងកុមារ ពិការ ភ្នែក គរ ថ្លង់ ក្នុងវិទ្យាល័យអប់រំពិសេស ត្រូវបានការជួយរបស់ឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មាននិងលោកជំទាវ ក្នុងមួយឆ្នាំចុះសួរសុខទុក្ខ២លើក ដោយមាន រៀបចំជាអាហារ និងផ្ដល់សម្ភារសិក្សា គ្រឿងឧបភោគ បរិភោគ ដល់បុគ្គលិកសិក្សា និងសិស្សានុសិស្ស និងសម្រាប់សាលាផងដែរ។

ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡាបានឡើងអាន នូវសារលិខិតរបស់សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដោយជំរុញឱ្យក្រសួងអប់រំយុវជន និងកីឡាត្រូវបន្តដឹកនាំ និងអនុវត្តន៍តាមគន្លងជីវិតថ្មី ក្នុងវិស័យអប់រំ ដោយគិតគូរអំពីជម្រើសឱ្យបានច្រើនក្នុងការផ្តល់សេវាអប់រំ ជាពិសេស ដំណើរការបង្រៀន ក្នុងបរិបទហានិភ័យឆ្លងរីករាលដាលកូវីដ-១៩នេះ។ ក្រសួងអប់រំយុវជន និង កីឡាត្រូវបន្តជំរុញ ការអប់រំឌីជីថលស្របសភាពការណ៍ជាតិ តំបន់ និងសកលលោក។ ត្រូវរៀបចំនិងអនុវត្តន៍ កម្មវិធីសិក្សាបំព្រួញ ដោយកំណត់ជាមុខវិជ្ជា កាតព្វកិច្ច និងជ្រើសរើសមុខវិជ្ជាមេរៀនសម្រាប់សិក្សាក្នុងថ្នាក់ក្នុងការបង្រៀន ដោយផ្តោតលើ ចំណុចសំខាន់ៗនិងស៊ីជម្រៅ ជាពិសេស មេរៀនសម្រាប់ថ្នាក់ទី៩ និងទី១២ សម្រាប់ការប្រឡងសញ្ញាបត្រ។

ថ្លែងក្នុងឱកាសនោះឯកឧត្តម ហោ ណាំហុង ឧបនាយករដ្ឋមន្រ្ដីបានកោតសរសើរ និងវាយតម្លៃខ្ពស់ចំពោះការខិតខំរបស់ក្រសួងអប់រំ ក៏ដូចជាអាជ្ញាធរគ្រប់លំដាប់ថ្នាក់ របស់ខេត្តដែលបានអនុវត្តគោលនយោបាយចតុកោណរបស់រាជរដ្ឋាភិបាល ឱ្យទទួលបាន ជោគជ័យគ្រប់ផ្នែក ក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា ដែលបានធ្វើឱ្យប្រទេសជាតិមាន សុខសន្ដិភាពពេញលេញ។

ឯកឧត្តមឧបនាយករដ្ឋមន្រ្ដីបញ្ជាក់ថា សុខសន្ដិភាពនេះ ហើយទើប ប្រទេសជាតិមានការរីកចម្រើនលើគ្របវិស័យ ពិសេសរាជរដ្ឋាភិបាល លើកអាទិភាពខ្ពស់ ក្នុងវិស័យអប់រំក្នុងការបណ្ដុះនូវធនធានមនុស្សសម្រាប់អភិវឌ្ឍប្រទេសជាតិ។ ឯកឧត្តម ហោ ណាំហុង ក៏បានធ្វើការអំពាវនាវថា ក្នុងបរិបទនៃការបើកបវេសនកាលថ្មី ក្នុងបរិបទនៃ ជំងឺកូវីដ១៩ គ្រប់គ្រឹះស្ថានសិក្សា​ទាំងអស់ទូទាំងប្រទេស អាជ្ញាធរគ្រប់ លំដាប់ថ្នាក់ ប្រជាពលរដ្ឋទាំងអស់​ត្រូវតែអនុវត្តន៍ឱ្យបានជាប្រចាំ នូវវិធានការអនាម័យ សុខភាព របស់ក្រសួងសុខាភិបាល និងរក្សាគម្លាត ពិសេសប្អូនៗ កូនក្មួយសិស្សានុសិស្ស ទាំងអស់ត្រូវយកចិត្តទុកដាក់រៀនសូត្រ ទើបជាសិស្សល្អ កូនល្អ ជាទំពាំងស្នងឫស្សី សម្រាប់ប្រទេសជាតិ និងត្រូវចៀសឱ្យឆ្ងាយពីគ្រឿងញៀនដើម្បីអនាគតរបស់ខ្លួន៕

ដោយ ឆាយម៉ុត