AKP ព្រះសីហនុ ថ្ងៃទី១១ ខែមករា ឆ្នាំ២០២១​ -- ក្រុមហ៊ុន ព្រូដិនសល (ខេមបូឌា) ឡាយហ្វ៍ អឹសួរ៉ិនស៍ បានឧបត្ថម្ភម៉ាស៊ីនវាស់កម្តៅ ស្វ័យប្រវត្តចំនួន៩១គ្រឿង ជូនដល់រដ្ឋបាលខេត្តព្រះសីហនុ សម្រាប់ប្រើប្រាស់ក្នុងវិធានការ បង្ការ ទប់ស្កាត់ និងគ្រប់គ្រងជំងឺ Covid-19 នៅក្នុងខេត្តព្រះសីហនុ។ ពិធីនេះ មានការចូលរួម ពីអភិបាលរងខេត្ត លោកស្រីប្រធានមន្ទីរអប់រំយុវជន និងកីឡាខេត្តព្រះសីហនុ នារសៀល ថ្ងៃចន្ទ ១៣រោច ខែបុស្ស ឆ្នាំជូត ទោស័ក ព.ស ២៥៦៤ ត្រូវនឹង ថ្ងៃទី១១ ខែមករា ឆ្នាំ២០២១ នៅសាលាខេត្តព្រះសីហនុ។

លោកស្រី ហួត សាន់នី នាយកប្រត្តិបត្តក្រុមហ៊ុន ព្រូដិនសល (ខេមបូឌា) ឡាយហ្វ៍ អឹសួរ៉ិនស៍ បានជម្រាបជូនថា ម៉ាស៊ីនវាស់កម្តៅស្វ័យប្រវត្តនេះ នៅពេលមានកម្តៅលើស វានឹងស្រែកឱ្យយើងបានដឹង និងសាចអាល់កុលបានល្អទៀតផង។ ម៉ាស៊ីនទាំង ៩១គ្រឿងនេះ ឧបត្ថម្ភជូនរដ្ឋបាលខេត្ត ដើម្បីបម្រើការងារសង្គមក្នុងខេត្តព្រះសីហនុ កន្លងមក ក្រុមហ៊ុន បានធ្វើការងារសង្គមជាមួយក្រសូងសុខាភិបាល ដូចជាឧបត្ថមម៉ាស់ជាដើម។

ឯកឧត្តម គួច ចំរើន អភិបាលខេត្តព្រះសីហនុ បានថ្លែងអំណរគុណ និងអគុណ ក្រុមហ៊ុន ព្រូដិនសល (ខេមបូឌា) ឡាយហ្វ៍ អឹសួរ៉ិនស៍ ដែលបានឧបត្ថម្ភម៉ាស៊ីន វាស់កម្តៅ ស្វ័យប្រវត្តចំនួន ៩១គ្រឿង ជូនរដ្ឋបាលខេត្ត ដើម្បីធ្វើការបែងចែកទៅ ដល់សាលាគោល ដៅ ព្រោះម៉ាស៊ីននេះមានភាពងាយស្រួល អាចប្រើថ្មបាន នៅតំបន់ណាដែលគ្មាន អគ្គិសនីប្រើប្រាស់៕

ដោយ ងូ សុមុនី