AKP ភ្នំពេញ ថ្ងៃទី១១ ខែមករា ឆ្នាំ២០២១​ -- ឯកឧត្ដម ឃួង ស្រេង អភិបាលរាជធានីភ្នំពេញ បានជំរុញឱ្យអាជ្ញាធរពាក់ព័ន្ធ ត្រូវបង្កើនការយកចិត្តទុកដាក់ការពារ និងរក្សាសណ្តាប់ធ្នាប់ ជូនប្រជាពលរដ្ឋដែលនឹង ទៅទស្សនាកម្សាន្ត ក៏ដូចជាទៅធ្វើពិធីសាសនាផ្សេងៗនៅរមណីយដ្ឋានប្រវត្តិសាស្ត្រវត្តភ្នំ ខណៈបុណ្យចូលឆ្នាំប្រពៃណីចិននឹងខិតចូលមកដល់ ហើយជាពិសេស ត្រូវធ្វើការណែនាំ ដល់ប្រជាពលរដ្ឋឱ្យអនុវត្ដន៍វិធានការការពារជំងឺកូវីដ-១៩ ទៅតាមការណែនាំរបស់ ក្រសួងសុភិបាល។

ឯកឧត្ដម ឃួង ស្រេង បានបញ្ជាក់បែបនេះនៅក្នុង កិច្ចប្រជុំគណៈបញ្ជាការឯកភាព នៅរដ្ឋបាលរាជធានីភ្នំពេញ នាព្រឹកថ្ងៃទី១១ ខែមករា ឆ្នាំ២០២១ និងមានការចូលរួម ពីអាជ្ញាធរ ខណ្ឌទាំង១៤ និងសមត្ថកិច្ចពាក់ព័ន្ធក្នុងរាជធានីភ្នំពេញជាច្រើនរូបទៀត។

ក្នុងកិច្ចប្រជុំនោះឯកឧត្ដម ឃួង ស្រេង បានលើកឡើងថា អាជ្ញាធរពាក់ព័ន្ធ ត្រូវចុះអប់រំជាប្រចាំដល់ភ្ញៀវទេសចរ ពិសេសពលរដ្ឋដែលមានជំនឿផ្នែកសាសនា ដែលទៅធ្វើពិធីបន់ស្រន់នៅទីតាំងរមណីយដ្ឋានវត្តភ្នំ ត្រូវរក្សាគម្លាតសង្គម និងពាក់ម៉ាស់ លាងដៃនឹងអាល់កុលជាប់ជាប្រចាំ ខណៈដែលប្រទេសកម្ពុជានៅតែបន្តរកឃើញអ្នកជំងឺកូវីដ-១៩ ទៅលើពលករដែលធ្វើដំណើរត្រឡប់មកពីប្រទេសថៃនោះ។

ក្រៅពីនេះឯកឧត្ដម ឃួង ស្រេង អភិបាលរាជធានីភ្នំពេញ ក៏បានជុំរុញឱ្យអាជ្ញាធរខណ្ឌ ទាំង១៤ ត្រូវយកចិត្តទុកដាក់ពិនិត្យមើលទីតាំងល្បែងស៊ីសងខុសច្បាប់គ្រប់ប្រភេទ និងស៊ើប អង្កេតដើម្បីបង្ក្រាបការជួញដូរគ្រឿងញៀននៅក្នុងមូលដ្ឋានរបស់ខ្លួន ដើម្បីថែរក្សាសុវត្ថិភាព សណ្តាប់ធ្នាប់សាធារណៈ និងសេចក្តីសុខជូនប្រជាពលរដ្ឋក្នុងរាជធានីភ្នំពេញ៕

ដោយ សួស សំរិត