AKP ព្រៃវែង ថ្ងៃទី១១ ខែមករា ឆ្នាំ២០២១ -- កសិករមួយគ្រួសារដែលបានដាំបន្លែក្នុងផ្ទះសំណាញ់ រស់នៅក្នុងស្រុកបាភ្នំ ខេត្ដព្រៃវែង​បានបង្ហាញការសប្បាយចិត្ត ដោយទទួលបានផលខ្ពស់ និងប្រាក់ចំណេញច្រើន ហើយ​ក៏មានការចាប់អារម្មណ៍ពីអ្នក​ប្រើ​​ប្រាស់ក្នុងស្រុកច្រើន ព្រមទាំងមានទីផ្សារល្អៗ សម្រាប់​លក់ផងដែរ។

អ្នកស្រី ស្វែង ណារី ជាកសិកររស់នៅភូមិក្តីដូង ឃុំរោងដំរី ស្រុកបាភ្នំ ខេត្តព្រៃវែង បានចាប់យកមុខរបរដាំបន្លែ ផ្ទះសំណាញ់ ហើយក៏ត្រូវបានជ្រើសរើសជាសមាជិកបណ្តុំ អាជីវកម្មបន្លែ ដែលបានសម្របសម្រួល និងបង្កើតឡើងដោយកម្មវិធីផ្សព្វផ្សាយ បច្ចេក​ទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ (ASPIRE) តាំងពីឆ្នាំ២០១៨ ដែល​មានសមាជិកសរុប៤៥នាក់។ អ្នកស្រី ស្វែង ណារី បានឱ្យដឹងថា ចំពោះការ​ដាំបន្លែ នេះ ​គឺគាត់រកប្រាក់ចំណូលបានពីការលក់បន្លែនេះក្នុងមួយខែដោយទទួលបាន ពី ៤០ ម៉ឺនរៀល ទៅ៥០ម៉ឺនរៀល។ អ្នកស្រីបន្ដថា ការដាំបន្លែទាំងនេះមានការលំបាក​ខ្លះ​បន្តិច​មែន ប៉ុន្តែវាជួយសម្រួលដល់ជីវភាពរស់នៅរបស់គាត់បានមួយកម្រិតផងដែរ បន្ទាប់ពីការ​ធ្វើស្រែចម្ការ ដោយលក់ដូរខ្លះផង ហូបខ្លួនឯងខ្លះផង។ អ្នកស្រីបានបញ្ជាក់ថា “នេះគឺ​ជាផ្នែកមួយ ក្នុងការកាត់បន្ថយការចំណាយ​នៃប្រាក់ចំណូលរបស់ខ្ញុំ​សម្រាប់ការទិញបន្លែ ពីផ្សារដោយយើងមិនដឹងថាបន្លែនោះមានសារជាតិគីមីដែរ ឬក៏អត់នោះទេ។ បន្លែដែលខ្ញុំ​ដាំសព្វថ្ងៃនេះមានស្ពៃ សាឡាត់ ម្រះ ត្រសក់ ជាដើម មិនត្រឹមតែបន្លែទាំងអស់នោះទេ ខ្ញុំ​ក៏មានចិញ្ចឹមមាន់បន្តិចបន្តួចផងដែរ”។

ជាមួយគ្នានេះ អ្នកស្រីក៏បានសំណូមពរដល់មន្ទីរកសិកម្ម រុក្ខាប្រមាញ់ និងនេសាទ ខេត្តជួយពង្រឹងការបង្រៀននូវបច្ចេកទេសដាំបន្លែបន្ថែមទៀតដល់គាត់ ដោយសារគាត់ មិន​​មានគម្រោងដាំបន្លែតែប៉ុណ្ណឹងនោះទេ គឺអ្នកស្រីនឹងមានគម្រោងដាំ ស្ពៃក្តោប និង​បន្លែ​ផ្សេងៗទៀតដើម្បីផ្គត់ផ្គង់ទៅតាមតម្រូវការទីផ្សារដែលកំពុងតែត្រូវការប្រចាំថ្ងៃ។

លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង បានលើកឡើងថា ការដាំបន្លែក្នុងផ្ទះសំណាញ់ គឺទទួលបានផលខ្ពស់ និងមាន​ការចាប់​អារម្មណ៍ពីប្រជាកសិករយ៉ាងច្រើននៅក្នុងខេត្តព្រៃវែង ក្នុងការដាំដុះដំណាំនេះ ហើយក៏​មានការចាប់អារម្មណ៍ពីអ្នកប្រើប្រាស់ព្រមទាំងមានទីផ្សារល្អផងដែរ។ លោកប្រធានមន្ទីរ បានថ្លែងថា ក្រោយបានបញ្ចប់នៃការធ្វើបង្ហាញ និងតាមរយៈការដាំក្នុង​ផ្ទះសំណាញ់នេះ ពួកគាត់បានបន្តដំណើរការដាំដុះដាំបន្លែយកស្លឹកសម្រាប់ផ្គត់​ផ្គង់ទីផ្សារ​ក្នុងស្រុក (ផ្សារ​ឈើ​កាច់ ផ្សារអ្នកលឿង) ដោយមានតម្លៃចន្លោះពី ៤ ០០០ រៀល ទៅ ៥ ០០០ រៀល ក្នុង១កីឡូក្រាម ទៅតាមប្រភេទដំណាំ។ លោកបានថ្លែងបន្ដថា ជាទូទៅ ពួកគាត់​អាចដាំ​បន្លែយកស្លឹកទាំងអស់នេះជាមធ្យមចន្លោះពី៥-៦ដងក្នុង១ឆ្នាំ។

អ្នកស្រី ស្វែង ណារី បានបញ្ជាក់បន្ថែមថា “ការដាំដុះបន្លែក្នុង១ ដង នៃផលិត​កម្ម​របស់​ខ្ញុំនឹងទទួលប្រាក់​ចំណេញ​សុទ្ធជាមធ្យមចន្លោះពី៤០ម៉ឺនរៀលទៅ៥០ម៉ឺនរៀល ដោយ​​​គ្រាន់តែចំណាយត្រឹម​២០ម៉ឺន ឬ២៥ម៉ឺនរៀល ទៅលើសម្ភារមួយចំនួនរួមមាន គ្រាប់ពូជ ការរៀបចំដី ជីធម្មជាតិ កម្លាំងពលកម្ម ថ្លៃប្រេងបូបទឹក កំបោរ អង្កាម ជាដើម”៕

ដោយ រិទ្ធី ប្រភព៖ មន្ទីរព័ត៌មានខេត្តព្រៃវែង