AKP ភ្នំពេញ ថ្ងៃទី០៩ ខែមករា ឆ្នាំ២០២១ — លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានស្នើឱ្យសារព័ត៌មានខ្មែរថែមស៍ (Khmer Times) ធ្វើការកែតម្រូវអត្ថបទរបស់ខ្លួន ដែលបានផ្សព្វផ្សាយកាលពីថ្ងៃទី០៨ ខែមករា ឆ្នាំ២០២១ ដែលមានចំណងជើងថា «Quarantines inconsistent, Thai market closed to Cambodians» នេះបើតាមសារដែលចែកចាយតាមរយៈបណ្តាញតេឡេក្រាមនាយប់ថ្ងៃទី០៩ ខែមករា ឆ្នាំ២០២១នេះ។

លោកជំទាវវេជ្ជបណ្ឌិត បានសង្កត់ធ្ងន់ថា ការផ្សព្វផ្សាយ របស់សារព័ត៌មានខ្មែរថែមស៍នេះ ធ្វេីឱ្យមានការយល់ច្រឡំលេីវិធានការសុខាភិបាល ដោយការមិនមានបង្ហាញពីប្រភពច្បាស់លាស់នៃហេតុការណ៏  ដែលក្រសួង ស្នើសុំសារព័ត៌មានខ្មែរថែមស៍ ផ្តល់អត្តសញ្ញាណអ្នកដំណើរ  ពេលវេលា និងទីតាំងកេីតហេតុ  ឱ្យបានច្បាស់លាស់មកក្រសួង  ដើម្បីក្រុមការងារក្រសួងទទួលបន្ទុកការងារនេះ អាចធ្វើការទំនាក់ទំនង ស្វែងយល់លេីបញ្ហា  ក៏ដូចជាជួយធ្វេីដំណោះស្រាយ បានទាន់ពេលវេលា ឬសាមីខ្លួនអាចទំនាក់ទំនងសាកសួរព័ត៌មានច្បាស់លាស់មកទូរស័ព្ទទាន់ហេតុការណ៍ ១១៥ ដើម្បីដោះស្រាយជូន  ក្រោយពីបានសាកសួរ និងបញ្ជាក់ជាមួយសណ្ឋាគារ  មិនទទួលបានលទ្ធផលច្បាស់លាស់។

ក្នុងនោះក្នុងនាមក្រសួងសុខាភិបាល លោកជំទាវ បានបញ្ជាក់ផងដែរថា៖ «សណ្ឋាគារដៃគូទាំងអស់ បានផ្តល់កិច្ចសហការយ៉ាងល្អ  ក្នុងការទទួលអ្នកដំណើរជាជនបរទេស  ឬខ្មែរ  ស្នាក់នៅធ្វើចត្តាឡីស័ក ដោយគោរពតាមគោលការណ៍នានារបស់ក្រសួងសុខាភិបាល និងក្រសួងសេដ្ឋកិច្ច និងហិរញ្ញវត្ថុ។ ករណីចុះផ្សាយរបស់សារព័ត៌មានខ្មែរថែមស៍ កាលពីថ្ងៃទី០៨ ខែមករា ឆ្នាំ២០២១ ពាក់ព័ន្ធនឹងព័ត៌មានអ្នកដំណើរដែលមានឈ្មោះ (Sean) បានលេីកកាលពីថ្ងៃទី០៨ ខែមករា ឆ្នាំ២០២១ នោះ  ក្រសួងមិនអាចរកឃើញមាននៅក្នុងប្រព័ន្ធកម្មវិធីគ្រប់គ្រងអ្នកដំណើរឡេីយ ហើយសណ្ឋាគារពាក់ព័ន្ធដែលត្រូវបានលើកឡើងថាមានបញ្ហាដាក់នៅក្នុងសារព័ត៌មាននេះដែរ  ក៏បានបញ្ជាក់មកក្រសួងរួចហេីយដែរថា មិនមានករណីដូចការចុះផ្សាយនេះទេ»។

ក្រសួងសុខាភិបាល ក៏បានអំពាវនាវជាថ្មី ក្នុងករណីមានបញ្ហា ណាមួយ សុំឱ្យសាមីខ្លួន ធ្វេីការទំនាក់ទំនងមកលេខ១១៥  ជាបន្ទាន់  ដេីម្បីក្រុមការងារក្រសួងជួយដោះស្រាយជូន បានទាន់ពេល វេលា៕

ដោយ ផែន រតនៈ