AKP ព្រះសីហនុ ថ្ងៃទី០៩ ខែមករា ឆ្នាំ២០២១ -- ប្រជាពលរដ្ឋក្រីក្រ ចាស់ជរាគ្មានទីពឹងចំនួន ២៥គ្រួសារ នៅតំបន់ថ្មធំ អណ្តូងទឹក និងព្រៃត្របែក ស្ថិតនៅភូមិ​ស្មាច់ដែង  ឃុំរាម ស្រុកព្រៃនប់ ខេត្តព្រះសីហនុ បានទទួលអំណោយមនុស្សធម៌ពីលោក ហ៊ិន ត្រឹង ហៅ (ហេង សុវណ្ណា) ជាអនុប្រធានក្រុមការងារថ្នាក់ជាតិចុះជួយស្រុកព្រៃនប់ ខេត្តព្រះសីហនុ។ ការជួបសំណេះសំណាល​សួរសុខទុក្ខបងប្អូនប្រជាពលរដ្ឋក្រីក្រ ចាស់ ជរាគ្មានទីពឹងនៅភូមិស្មាច់ដែង ឃុំរាម ស្រុកព្រៃនប់នេះ បានធ្វើ​ឡើង​នៅព្រឹកថ្ងៃសៅរ៍ ១១រោច ខែបុស្ស ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៩ ខែមករា ឆ្នាំ២០២១។ 

លោក ហ៊ិន ត្រឹង ពាំនាំនូវការសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន នាយករដ្ឋ​មន្ត្រី​នៃ​ព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ថ្នាក់ដឹកនាំ និងក្រុមការងាររាជរដ្ឋាភិបាលចុះជួយខេត្តព្រះសីហនុ ដែលបានយកចិត្តទុកដាក់ចំពោះប្រជាពលរដ្ឋ​ក្រី​ក្រ ចាស់ជរា ស្ត្រីម៉េម៉ាយកូនច្រើន និងក្មេងកំព្រានៅតាមមូល ដ្ឋាន ដែលមានជីវភាពខ្វះខាត ខណៈ​ពិភពលោក​ក៏ដូចជាកម្ពុជាបានជួបវិបត្តិជំងឺ កូវីដ-១៩ កំពុងរាតត្បាតផងដែរ ។ លោកបានបញ្ជាក់ថា ការចុះ ជួយនៅ​ក្នុងស្រុកព្រៃនប់នេះ គឺដើម្បីឈ្វេងយល់អំពីសុខទុកបងប្អូនប្រជាពលរដ្ឋនៅមូលដ្ឋានដែលមានជីវភាព​ខ្វះខាត អំពីកង្វល់ និងសំណូមពររបស់ប្រជាពលរដ្ឋនៅមូលដ្ឋាន។ ម្យ៉ាងដោយបានទទួលព័ត៌មានពីមេភូមិស្មាច់​ដែង ឃុំរាម មានប្រជាពលរដ្ឋតំបន់ដាច់ស្រយាលក្នុងតំបន់ថ្មធំ អណ្តូងទឹក និងព្រៃត្របែក ភូមិស្មាច់ដែង ឃុំរាម មាន​ការខ្វះខាតស្បៀងចំនួន ២៥គ្រួសារ ក្នុងចំណោមប្រជាពលរដ្ឋ ១១៦គ្រួសារ។ លោកបានសំណូមពរឱ្យ​ប្រជា​ពល​រដ្ឋ ចូលរួមថែទាំសុខភាព ផ្លាស់ប្តូរទម្លាប់ អនុវត្តន៍តាមគោលការណែនាំរបស់ក្រសួងសុខាភិបាល លាង​សម្អាត​ដៃជាមួយសាប៊ូ ទឹក អាល់កុល ឬជែលឱ្យបានញឹកញាប់ រក្សាគម្លាត បើចេញទៅកាន់ទីសាធារណ: ត្រូវ​ពាក់ម៉ាស់ ឬក្រមា ដើម្បីធានាថា សហគមន៍យើងមិនមានការឆ្លងជំងឺកូវីដ-១៩ ។

 ជាមួយគ្នានេះដែរ លោក ហ៊ិន ត្រឹង ក៏បានធ្វើការណែនាំឱ្យមេភូមិ មេឃុំ ត្រូវចុះសួរសុខទុក្ខប្រជាពលរដ្ឋ​នៅមូលដ្ឋាន ដើម្បីបានដឹងថា ប្រជាពលរដ្ឋណាមានការខ្វះខាត រាយការមកក្រុមការងារថ្នាក់ស្រុក ក៏ដូចថ្នាក់​ជាតិ ដើម្បីនាំយកអំណោយមនុស្សធម៌ចែកជូនពួកគាត់បានទាន់ពេលវេលា មិនទុកឱ្យប្រជាពលរដ្ឋរបស់​យើង​ណាម្នាក់ស្លាប់ដោយដាច់ស្បៀងនោះទេ។

លោក ស្រី ញួច មេភូមិស្មាច់ដែងបានថ្លែងអំណរគុណលោក ហ៊ិន ត្រឹង ហៅ ហេង សុវណ្ណា អនុប្រធានក្រុមការងាររាជរដ្ឋាភិបាលចុះជូយស្រុកព្រៃនប់ ដែលបានជួយដល់ប្រជាពលរដ្ឋទាំង ២៥គ្រួសារ ដែលមានជីវភាពខ្វះខាត ហើយនេះគឺជាសកម្មភាពក្នុងការកៀរគរនាំយកអំណោយមនុស្សធម៌ចែក ជូនប្រជា​ពល​រដ្ឋក្រីក្រ ចាស់ជរាគ្មានទីពឹងក្នុងភូមិស្មាច់ដែង ជាបន្តបន្ទាប់ ជាទឹកចិត្តមនុស្សធម៌ដ៏ល្អប្រពៃ​ជួយពួកគាត់​បានទាន់ពេលវេលា ខណៈពួកគាត់កំពុងមានការខ្វះខាតជីវភាពប្រចាំថ្ងៃ ។ 

សូមបញ្ជាក់ថា  អំណោយដែលបានចែកជូនប្រជាពលរដ្ឋ និងចាស់ជរា ២៥គ្រួសារ ក្នុងមួយ​គ្រួសារៗ​នៅភូមិស្មាច់ដែង ឃុំរាម ក្នុងមួយគ្រួសារទទួលបានអង្ករ ២៥គីឡូក្រាម មី ១កេស  ទឹកត្រី ១យួរ  ប៊ីចេង ១កញ្ចប់ ម៉ាស់ ១០ និងថវិកា ៥ម៉ឺនរៀល ក្នុងនោះ ឯកឧត្តម គួច ចំរើន អភិបាលខេត្តព្រះសីហនុ បានឧបត្ថម្ភថវិកា​ក្នុង​មួយគ្រួសារ ៣ម៉ឺនរៀលផងដែរ ៕

ដោយ ងូ សុមុនី