AKP ភ្នំពេញ ថ្ងៃទី០៩ ខែមករា ឆ្នាំ២០២១ -- ដើម្បីជំរុញឱ្យលោកគ្រូ អ្នកគ្រូខិតខំសិក្សាបន្ថែមទៀតលើផ្នែកបច្ចេកវិទ្យានោះក្រសួងអប់រំយុវជន និងកីឡា បានរៀបចំការប្រកួតប្រជែងគ្រូបង្រៀនដែលមានគំនិតច្នៃប្រឌិតខ្ពស់ (The Most Innovative Teacher 2020) វេទិកាអប់រំតាមប្រព័ន្ធអេឡិចត្រូនិកលើកទី១ នៅកម្ពុជា ដែលបានប្រព្រឹត្តទៅកាលពីថ្ងៃទី០៣ ដល់ទី០៤ ខែធ្នូ ឆ្នាំ២០២០។

ការប្រកួតប្រជែងនេះ នឹងផ្ដល់ឱកាសដល់គ្រូបង្រៀន ចាប់ពីកម្រិតមតេ្តយ្យសិក្សារហូតដល់មធ្យមសិក្សាទុតិយភូមិ ដែលមានគំនិតច្នៃប្រឌិតខ្ពស់ក្នុងការប្រើប្រាស់បច្ចេកវិទ្យាព័ត៌មានជំនួយដល់ការរៀន និងបង្រៀនឆ្លើយតបទៅនឹងវិបត្តិកូវីដ-១៩ ក៏ដូចបរិបទនៃការអប់រំបែបឌីជីថល និងការសិក្សាពេញមួយជីវិតចូលរួមប្រកួតប្រជែងក្នុងកម្មវិធីគ្រូបង្រៀន ដែលមានគំនិតច្នៃប្រឌិតខ្ពស់។

ក្នុងពិធីប្រគល់ពានរង្វាន់ដល់ជ័យលាភី កាលពីថ្ងៃទី០៨ ខែមករា ឆ្នាំ២០២១ លោកជំទាវ គឹម សេដ្ឋានី រដ្ឋលេខាធិការក្រសួងអប់រំ យុវជន និងកីឡាបានមានប្រសាសន៍ជំរុញលើកទឹកចិត្តដល់លោកគ្រូ  អ្នកគ្រូទាំងអស់ ឱ្យខិតខំប្រឹងប្រែងសិក្សាបន្ថែមទៀត លើផ្នែកបច្ចេកវិទ្យា ដែលជាផ្នែកមួយដ៏សំខាន់សម្រាប់ការអប់រំបែបឌីជីថល។  លោកជំទាវក៏បានណែនាំដល់លោកគ្រូអ្នកគ្រូត្រូវប្រើប្រាស់បច្ចេកវិទ្យាព័ត៌មានថ្មីៗសម្រាប់បម្រើដល់ការបង្រៀន និងរៀនឱ្យកាន់តែមានភាពទូលំទូលាយជាងមុន៕

ដោយ រិទ្ធី ប្រភព៖ ក្រសួងអប់រំ