AKP សៀមរាប ថ្ងៃទី០៨ ខែមករា ឆ្នាំ២០២១​ -- លោក ឃឹម ហ្វីណង់ អភិបាលស្រុកបន្ទាយស្រី ខេត្ដសៀមរាបបានគូសបញ្ជាក់ថា ចាប់ពី ថ្ងៃទី០៨ ខែមករា ឆ្នាំ២០២១នេះតទៅ អាជ្ញាធរស្រុកបន្ទាយស្រី នឹងមិនអនុញ្ញាត​ឱ្យ​អ្នកផ្សាយពាណិជ្ជកម្មដើរបិទស្លាកផ្សព្វផ្សាយពាសវាលពាសកាលតាមដើមឈើទៀតនោះទេ។

លោកបានលើកឡើងថា ក្រុមការងារចម្រុះមួយនឹងចាប់ផ្តើមដើរបកស្លាក​ទាំងអស់​នេះ​​ចេញ និងមិនឱ្យបិទឡើងវិញឡើយ។ លោកអភិបាលស្រុកបន្តថា លោកតែងតែទើស​ភ្នែកយូរហើយ ស្ទើរតែគ្រប់ដើមឈើទាំងអស់នៅតាមបណ្តោយផ្លូវទៅកាន់​ប្រាសាទ​បន្ទាយ​ស្រី ត្រូវបានគ្រប់ដណ្តប់ទៅដោយស្លាកផ្សាយពាណិជ្ជកម្មស្អេកស្កះ យ៉ាងអនាធិប​តេយ្យ និងមិនមានច្បាប់អនុញ្ញាត ដែលធ្វើឱ្យប៉ះពាល់ទៅដល់សោភណភាពសាធារណៈ និងភាពស្អាតនៃបរិស្ថាននៅក្នុងស្រុក ហើយមិនសមនឹងភ្នែកអ្នកទេសចរ ដែលធ្វើដំណើរ​ឆ្លងកាត់តាមដងផ្លូវនេះ។ លោកបានបន្ថែមថា ទម្លាប់ល្អត្រូវចេញពីរឿងតូចតាចទៅ ហើយ​ដើមឈើក៏មិនមែនជាកន្លែងសម្រាប់ផ្សាយពាណិជ្ជកម្មដោយគ្មានការទទួលខុសត្រូវនោះដែរ។

លោកអភិបាលស្រុកបានអះអាងថា នេះអាចចាត់ទុកថា ជាសេចក្តីជូនដំណឹង​ទុក​ជាមុនទៅដល់ក្រុមហ៊ុនទាំងឡាយដែលបានប្រព្រឹត្តសកម្មភាពទាំងនេះក្នុងពេលកន្លងមក ហើយអាជ្ញាធរមូលដ្ឋាននឹងចាប់ឱ្យក្រុមហ៊ុនផ្ទាល់ទទួលខុសត្រូវ និងធ្វើកិច្ចសន្យា ប្រសិន​បើ​​នៅតែបន្តសកម្មភាពអនាធិបតេយ្យដូច្នេះតទៅមុខទៀត៕

ដោយ ឃុត សៅ រូបថត៖ រដ្ឋបាលស្រុកបន្ទាយស្រី