AKP កណ្តាល ថ្ងៃទី០៨ ខែមករា ឆ្នាំ២០២១--នៅថ្ងៃ៩រោច ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី០៧ ខែមករា ឆ្នាំ២០២១ ឯកឧត្តម គីម រឹទ្ធី អភិបាលរងខេត្តកណ្ដាល បាននាំយកថវិការបស់ឯកឧត្តម គង់ សោភ័ណ្ឌ អភិបាលខេត្តកណ្ដាល រត់ម៉ារ៉ាតុងចំនួន ៨០លានរៀល ជូនដល់កម្មវិធីរត់ដើម្បីមនុស្សធម៌ជាមួយសាយ នៅក្រុងតាខ្មៅ ដើម្បីជួយរៃអង្គាសថវិកាសម្រាប់ជួយមន្ទីរពេទ្យកុមាអង្គរចំនួន ៦ លានរៀល និង ជួយដល់កុមរអូទីស្សឹមចំនួន ២០លានរៀល។

នៅក្នុងឱកាសនោះ ឯកឧត្ដម គីម រឹទ្ធី អភិបាលរងខេត្តកណ្តាល មានប្រសាសន៍ថា ឯកឧត្ដម មានសេចក្ដីរីករាយចំពោះកម្មវិធីមនុស្សធម៌នេះ ដែលយុវជនកម្ពុជាយើងចេះបណ្ដុះគំនិត ក្នុងការបំផុសស្មារតីឱ្យយុវជន ប្រជាពលរដ្ឋ និងយុវជនជំនាន់ក្រោយ ចូលរួមការងារសង្គម ដោយនាំគ្នាគោរពច្បាប់ចរាចរណ៍ ចូលរួមថែរក្សាអនាម័យ បរិស្ថាន ដើម្បីសុខភាព និងការអភិវឌ្ឍសង្គមជាតិយើងឱ្យរីកចម្រើនជឿនលឿន។

យុទ្ធនាការរត់ ដើម្បីមនុស្សធម៌ជាមួយសាយ មានគោលបំណងចម្បងជួយទ្រទ្រង់ថវិកាដល់ដំណើរការរបស់មន្ទីរពេទ្យកុមាអង្គរ ដែលផ្តល់សេវាសុខភាពសម្រាប់កុមារកម្ពុជាដោយមិនគិតថ្លៃក្នុងក្រុងសៀមរាប ដែលកំពុងខ្វះថវិកា ដើម្បីថែរក្សា និងព្យាបាលសុខភាពកុមារកម្ពុជា៕

ដោយ ណយ នឿន (ប្រភព:រដ្ឋបាលខេត្តកណ្តាល)