AKP សៀមរាប ថ្ងៃទី០៧ ខែមករា ឆ្នាំ២០២១ -- បន្ទាប់ពីប្រជាពលរដ្ឋដែលរស់នៅអមសងខាងផ្លូវ2SR2ដែលតភ្ជាប់ពីស្រុកអង្គរធំ ទៅស្រុកអង្គរជុំ ខេត្តសៀមរាប បានធ្វើការបិទផ្លូវនេះជាបន្តបន្ទាប់ដោយសារតែ រថយន្តដឹកថ្មបើកឆ្លងកាត់លឿន និងហុយខ្លាំងពេក។ ការបិទផ្លូវនោះប្រជាពលរដ្ឋបានសំណូមពរចំនួន៤ចំណុច ១. សូមឱ្យក្រុមហ៊ុនស្រោចទឹកតាមបណ្តោយផ្លូវ ២.សូមបើកបរដោយបន្ថយល្បឿន ៣.សូមមានការជួសជុលផ្លូវឡើងវិញ និង៤សូមឱ្យសមត្ថកិច្ចពិនិត្យសាធាតុញៀនក្នុងខ្លួនអ្នកបើកបរ។ 

ពាក់ព័ន្ធបញ្ហានេះ កាលពីរសៀលថ្ងៃទី០៦ ខែមករាឆ្នាំ២០២១នេះ អាជ្ញាធរខេត្តសៀម រាបបានបើកិច្ចប្រជុំពិភាក្សាគ្នារកដោះស្រាយមួយសមស្របដែលឱ្យប្រជាពលរដ្ឋអាចទទួលយកបាន។ ដោយកិច្ចប្រជុំនេះដឹកនាំដោយ លោក ពិន ប្រាកដ អភិបាលរងខេត្តសៀមរាប និងមានចូលរួមពីមន្រ្តីជំនាញនៃមន្ទីរពាក់ព័ន្ធអាជ្ញាធរស្រុកទាំងពីរ  អាជ្ញាធរមូលដ្ឋាន និងតំណាងក្រុមហ៊ុនធ្វើអាជីវកម្មលក់ថ្មទាំង០៥ក្រុមហ៊ុន។ 

បន្ទាប់ពីបានពិភាក្សាគ្នាប្រមាណជាង១ម៉ោង តំណាងក្រុមហ៊ុនទាំង០៥បានយល់ព្រមផ្តល់ថវិកា១ក្រុមហ៊ុនចំនួន ១ ៥០០ដុល្លារសរុប ៧ ៥០០ ដុល្លារ ក្នុង១ខែសម្រាប់ជួលរថយន្តដឹកទឹកស្រោចផ្លូវនេះកុំឱ្យហុយបន្តទៀត។ ជាមួយគ្នានេះ អង្គរប្រជុំក៏បានសម្រេជ្រើសរើសយកក្រុមហ៊ុន ស៊ីង អង្គរ ជាអ្នករ៉ាប់រងក្នុងការដឹកទឹកស្រោចផ្លូវប្រវែងជាង៣០គីឡូម៉ែត្រក្នុង១ថ្ងៃ៣ដង។ 

លោក ពិន ប្រាកដ បានមានប្រសាសន៍ថា ដើម្បីឆ្លើយតបទៅតាមសំណូមពររបស់ប្រជាពលរដ្ឋ បានសម្រេចឱ្យក្រុមហ៊ុន ស៊ីង អង្គរ ចាប់ផ្តើមដឹកទឹកស្រោចផ្លូវចាប់ពីថ្ងៃទី០៧ខែមករាឆ្នាំ២០២១នេះទៅ។ ជាមួយគ្នានេះមន្ទីរសាធារណការនិងដឹកជញ្ជូនខេត្តសៀមរាបត្រូវធ្វើការដាក់ស្លាកសញ្ញាចរាចរណ៍កំណត់ល្បឿនដើម្បីឱ្យអ្នកបើកបរទាំងអស់ត្រូវគោរពតាម កម្លាំងសមត្ថកិច្ចត្រូវធ្វើការចល័ត កម្លាំងត្រួតពិនិត្យល្បឿន និងសារធាតុញៀនចំពោះអ្នកបើកបររថយន្តក្នុងគោលបំណងធ្វើយ៉ាងកុំឱ្យមានផលប៉ះពាល់ដល់ប្រជាពលរដ្ឋ៕

ដោយ ឃុត សៅ