ENGLISH 
FRENCH 
ARAB បទយកការណ៍៖ ប្រជាពលរដ្ឋ និងយុវជន នៅតែឱ្យតម្លៃថ្ងៃ៧ មករា
AKP ភ្នំពេញ ថ្ងៃទី០៧ ខែមករា ឆ្នាំ២០២១ -- បើទោះបីជាកម្ពុជា នៅពេលនេះកំពុងតែជួបប្រទះនឹងបញ្ហាលំបាក ដែលបណ្តាលមកពីវិបត្តិសកលបណ្តាលមកពីការរីករាលដាលជំងឺកូវីដ ១៩ យ៉ាងណាក្តី ហើយកម្មវិធីប្រារព្ធមីទ្ទិញមហាជនខួបអនុស្សាវរីយ៍ លើកទី៤២ឆ្នាំ នៃទិវាជ័យជម្នះ៧មករា មិនបានរៀបចំក្តី ក៏ប្រជាជនកម្ពុជាទូទាំងប្រទេសនៅតែ សម្តែងក្តីសប្បាយរីករាយ ចូលរួមអបអររំឭកខួបអនុស្សាវរីយ៍ លើកទី៤២ នៃទិវាជ័យជម្នះ ៧ មករា ជាប្រវត្តិសាស្ត្រ (៧ មករា ១៩៧៩ - ៧ មករា ២០២១) ជាមួយរាល់សមិទ្ធផលដែលរួមគ្នាសម្រេចបានក្នុងរយៈពេល៤២ឆ្នាំកន្លងទៅ ជាពិសេសជោគជ័យធំៗជាច្រើន ដែលយើងសម្រេចបានក្នុងឆ្នាំ២០១៩ ក្រោមការដឹកនាំដ៏ត្រឹមត្រូវឈ្លាសវៃរបស់គណបក្សប្រជាជនកម្ពុជា និងរាជរដ្ឋាភិបាលកម្ពុជា ។
ប្រជាពលរដ្ឋខ្មែរភាគច្រើន នៅតែដឹងគុណបំណាច់យ៉ាងធំធេង ចំពោះថ្ងៃ៧ មករា ដោយបានចាត់ទុកថា ថ្ងៃ៧មករានេះ ជាថ្ងៃកំណើតទីពីររបស់ពួកគេ ជាថ្ងៃដែលប្រទេស និងពលរដ្ឋខ្មែរ បានរួចផុតពីទុក្ខវេទនា ក្រោមការគ្រប់គ្រងរបស់របបប្រល័យពូជសាសន៍ ប៉ុល ពត ហើយនាំឱ្យប្រទេសកម្ពុជា ទាំងមូលមាន សុខសន្តិភាព និងការអភិវឌ្ឍរហូតដល់សព្វថ្ងៃ។
អ្នកស្រី ឈឹម សុគន្ធ ប្រជាពលរដ្ឋរស់នៅរាជធានីភ្នំពេញមួយរូប បានឱ្យដឹងថា រូបអ្នកស្រី គ្មានថ្ងៃបំភ្លេចបានឡើយ ៧ មករា ឆ្នាំ១៩៧៩ ដែលជាថ្ងៃបានរំដោះប្រទេស និង ប្រជាជនកម្ពុជា ឲ្យរួចផុតភាពវេទនា និងសេចក្ដីស្លាប់ ដែលគ្រានោះ ដឹកនាំដោយរបប ប៉ុល ពត និងបាន សម្លាប់ប្រជាពលរដ្ឋខ្មែរស្លូតត្រង់រាប់លាននាក់នោះ។
អ្នកស្រី ឈឹម សុគន្ធ បានបញ្ជាក់ថា «ថ្ងៃ៧ ខែមករា ឆ្នាំ១៩៧៩ ពិតជាបានផ្តល់នូវសេរីភាព និងសេចក្តីសុខសាន្តសម្រាប់រូបខ្ញុំ និងបានរស់នៅជួបជុំសាច់ញាតិក្នុងក្រុមគ្រួសារ»។
ស្រី្តវ័យជិត៧០ឆ្នាំរូបនេះ បានបន្តថា គឺមិនអាចបំភ្លេចបាននោះឡើយ ដោយអ្នកស្រី បងប្អូនខ្មែរគ្រប់រូប និងយុវជនជំនាន់ក្រោយ ត្រូវយល់ដឹងឲ្យបានច្បាស់ និងគប្បីទទួលស្គាល់ថ្ងៃនេះ ដែលជាថ្ងៃកំណើតទី២របស់ពលរដ្ឋខ្មែរគ្រប់ៗគ្នា។
ចំណែកយុវជនមួយចំនួន បានលើកឡើងថា ថ្វីត្បិតតែពួកគេមិនបានកើតទាន់របបប្រល័យពូជ សាសន៍ ប៉ុល ពត ក៏ពិតមែន ប៉ុន្តែពួកគេបានដឹងតាមរយៈឪពុកម្តាយ យាយតា ថារបបប្រល័យនេះ បានធ្វើ ឲ្យជីដូនជីតារបស់ពួកគេវេទនាយ៉ាងខ្លាំង គ្មានសេរីភាពក្នុងធ្វើដំណើរដូចសព្វថ្ងៃនេះឡើយ មិនមានអាហារបរិភោគគ្រប់គ្រាន់ ជាពិសេស របបដ៏យង់ឃ្នងមួយនេះ បានសម្លាប់ជាតិសាសន៍ឯង គ្មានមេត្តា។
ជាគ្រូបង្រៀនម្នាក់ លោកស្រី សៀង លក្ខិណា បានឱ្យដឹងថា ថ្ងៃ៧មករា ជាថ្ងៃដែលបានជួយសង្គ្រោះជីវិតរបស់លោកស្រី ឱ្យរស់រានមានជីវិត មានសេរីភាព សន្តិភាព និងការអភិវឌ្ឍ។
លោកស្រី សៀង លក្ខិណា បានបញ្ជាក់ថា «៤២ឆ្នាំកន្លងមក ហាក់នៅតែថ្មីៗសម្រាប់ប្រជាជនដែលបានកើតជំនាន់នោះ (របបវាលពិឃាត)។ ៤២ឆ្នាំនេះ បានផ្តល់ឱកាសសម្រាប់ខ្ញុំ ក្រុមគ្រួសារ មានជីវភាពល្អប្រសើរ និងបានផ្តល់ឱ្យកូនស្រីខ្ញុំទាំង២សិក្សារៀនសូត្រ បានខ្ពស់ៗនិងទទួលបានការងារធ្វើល្អៗ»។
នៅតាមដងវិថី នានា នៅរាជធានីភ្នំពេញ ជាពិសេសក្រសួងសា្ថប័ន ថ្នាក់ជាតិ និងថ្នាក់ក្រោមជាតិមានការព្យួរ ផ្ទាំងបដា បានសរសេរ ដោយមានអត្តន័យ ជាប្រវត្តិសាស្រ្តនៃ ការរម្លឹកចងចាំ ថ្ងៃ៧មករា ជាទិវាប្រវត្តិសាស្ត្រនៃការផ្ដួលរំលំរបបកម្ពុជាប្រជាធិបតេយ្យនៃពួកខ្មែរក្រហម ដែលរបបនេះ គេហៅថារបបប្រល័យពូជសាសន៍ ហើយបដាខ្លះ សរសរថា មានថ្ងៃ៧មករា ទើបមានជីវិតមកដល់ពេលនេះ។
ដើម្បីរម្លឹកដល់ថ្ងៃនេះ ជាប្រវត្តិសាស្រ្តនេះ នៅព្រឹកព្រលឹមថ្ងៃទី ៧ ខែ មករា នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជាក៏បានផ្ញើរសារតាមបណ្តាញសង្គម ផងដែរ ។
នៅក្នុងសារនោះសម្តេចតេជោបានសរសេរថា នៅ ថ្ងៃ ទី ៧ ខែ មករា ឆ្នាំ ២០២១ នេះ គឺជាខួបលើកទី ៤២ឆ្នាំ ដែលប្រទេសកម្ពុជាត្រូវបានសង្គ្រោះ និងរំដោះចេញផុតពីរបបកម្ពុជាប្រជាធិបតេយ្យ ឬហៅថារបបប្រល័យពូជសាសន៍ខ្មែរក្រហមដឹកនាំដោយ ប៉ុល ពត ដែលបានប្រែក្លាយកម្ពុជាទៅជាវាលពិឃាតដ៏ខ្មៅ ងងឹតអស់រយៈពេល ៣ ឆ្នាំ ៨ ខែ និង ២០ ថ្ងៃ ។ របបដ៏ឃោរឃៅព្រៃផ្សៃយង់ឃ្នងនេះ បានធ្វើអោយបាត់បង់ជីវិតមនុស្សស្លូតត្រង់អស់រាប់លាននាក់ ហើយប្រទេសជាតិទាំងមូលបានវិនាសអន្តរាយយ៉ាងធ្ងន់ធ្ងរបំផុត។
សម្តេចតេជោនាយករដ្ឋមន្រ្តីបានសរសេរបន្តថា គួររំលឹកដែរថា កាលពី ៤២ មុន ប្រជាពលរដ្ឋខ្មែរគ្រប់រូបរួមទាំងកុមារតូចៗរស់នៅក្រោមការបង្ខិតបង្ខំអោយធ្វើការលើសកម្លាំង គ្មានថ្ងៃឈប់សម្រាក ទទួលទានអាហារមិនគ្រប់គ្រាន់ គ្មានមន្ទីរពេទ្យព្យាបាល គ្មានសាលារៀន ហើយសិទ្ធិសេរីភាពទាំងអស់របស់ពលរដ្ឋត្រូវបានរបបព្រៃផ្សៃនេះបានបំបិទមិនអោយមាន ពលរដ្ឋដែលមានសំណាងនៅសល់តែស្បែកដណ្តប់ឆ្អឹងគឺរងចាំតែថ្ងៃស្លាប់ ប៉ុណ្ណោះ។ ប៉ុន្តែក្រោយពីប្រទេសជាតិត្រូវបានរំដោះចេញផុតពីរបបឃោរឃៅព្រៃផ្សៃមួយនេះនៅថ្ងៃទី ៧ ខែ មករា ឆ្នាំ ១៩៧៩ ក្រោមការដឹកនាំរបស់គណបក្សប្រជាជនកម្ពុជា គឺពលរដ្ឋមានសិទ្ធសេរីភាពពេញលេញឡើងវិញ ហើយប្រទេសជាតិទាំងមូលមានសុខសន្តិភាព និងការអភិវឌ្ឍន៍រីកចម្រើនគ្រប់វិស័យមកទល់សព្វថ្ងៃ។
ឆ្លៀតឱកាសនោះ សម្តេចតេជោនាយករដ្ឋមន្រ្តី បានសរសេរបន្តថា នៅក្នុងខួបអនុស្សាវរីយ៍លើកទី ៤២ នៃថ្ងៃជ័យជម្នះ ៧ មករា ថ្ងៃនេះ សូមឱ្យស្មារតីថ្ងៃរំដោះជាតិនេះ ស្ថិតនៅក្នុងក្រអៅបេះដូងពលរដ្ឋគ្រប់រូប និងជានិមិត្តរូបនៃសាមគ្គីជាតិ និង មហាគ្រួសារខ្មែរស្ថិតនៅជាអមតៈក្រោមម្លប់សុខសន្តិភាពជានិច្ចនិរន្ត៍ ។
ក្នុងឆ្នាំសកលថ្មី ២០២១ នេះ សូមជូនពរបងប្អូនប្រជាពលរដ្ឋទូទាំងប្រទេស ជៀសផុតពីជំងឺឆ្លងកូវីដ-១៩ ហេីយជួបតែសេចក្តីសុខ សេចក្តីចម្រើន និងប្រកបដោយពុទ្ធពរទាំង ៤ប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
ដោយឡែក សម្តេចអគ្គមហាពញាចក្រី ហេង សំរិន ប្រធានរដ្ឋសភា ក៏បានចេញនូវសារមួយ ដែលមាន អត្ថន័យថា ថ្ងៃ ៧មករា ឆ្នាំ១៩៧៩ ៧មករា ឆ្នាំ២០២១ ជាថ្ងៃគម្រប់ខួបលើកទី៤២ នៃទិវាជ័យជម្នះប្រវត្តិសាស្រ្តរបស់ប្រជាជនកម្ពុជា ដែលបានវាយផ្តួលរំលំរបបប្រល័យពូជសាសន៍ ប៉ុល ពត បញ្ចប់សម័យកាលដ៏ខ្មៅងងឹតបំផុត ដែលបានកាប់សម្លាប់ និងធ្វើឱ្យយប្រជាពលរដ្ឋខ្មែរស្លាប់ជិត ៣លាននាក់។
សម្តេចបានបន្តថា ដោយសារតែជំងឺកូវីដ-១៩ យើងមិនបានរៀបចំពិធីមីទ្ទីងអធិកអធមដូចរាល់ឆ្នាំ តែប្រជាពលរដ្ឋ និងអាជ្ញាធរនៅតាមមូលដ្ឋាន បានរៀបចំពិធីតូចៗ ដើម្បី រំលឹកនូវអនុស្សាវរីយ៍ថ្ងៃជ័យជម្នះជាប្រវត្តិសាស្រ្ត ដែលបានផ្តល់កំណើតទី២ ដល់យើងគ្រប់គ្នា ក្នុងស្មារតីចងចាំជានិច្ចនូវគុណូបការៈដ៏ឧត្តុង្គឧត្តមរបស់វីរកម្មាភិបាល យុទ្ធជន យុទ្ធនារី នៃរណសិរ្សសាមគ្គីសង្រ្គោះជាតិកម្ពុជា និងវីរកងទ័ពស្ម័គ្រចិត្តប្រទេសជាមិត្ត ដែលបានធ្វើការលះបង់យ៉ាងធំធេង ក្នុងការប្រយុទ្ធ តស៊ូ ដើម្បីផ្តួលរំលំរបបប្រល័យពូជសាសន៍ ប៉ុល ពត ហើយបានពួតដៃគ្នាការពារ កសាង និងអភិវឌ្ឍប្រទេសជាតិ ឱ្យមានភាពរីកចម្រើនរហូតមកដល់បច្ចុប្បន្ននេះ។
សម្តេចបានរៀបរាប់ថា ជ័យជម្នះ ថ្ងៃ៧មករា ឆ្នាំ១៩៧៩ បានកើតចេញពីកម្លំាងចលនាតស៊ូមហាជនស្នេហាជាតិ ក្រោមការដឹកនាំរណសិរ្សសាមគ្គីសង្គ្រោះជាតិកម្ពុជា ដែលបច្ចុប្បន្នមានឈ្មោះ រណសិរ្សសាមគ្គីអភិវឌ្ឍន៍មាតុភូមិកម្ពុជា បង្កើតឡើងដោយសម្តេចអគ្គមហាពញាចក្រី ហេង សំរិន សម្តេចអគ្គមហាធម្មពោធិសាល ជា ស៊ីម និងសម្តេចអគ្គមហាសេនាបតីតេជោ ហ៊ុន សែន និងឥស្សរជនស្នេហាជាតិដទៃទៀត។
ជ័យជម្នះ ៧មករា ឆ្នាំ១៩៧៩ បានផ្តល់ឱកាសពេញលេញដល់យើងក្នុងការកសាងសុខសន្តិភាព និងការអភិវឌ្ឍប្រទេសជាតិ ឱ្យមានការវិវឌ្ឍ រីកចម្រើនលូតលាស់ជាបន្តបន្ទាប់ ។ ក្រោមម្លប់សន្តិភាព សេដ្ឋកិច្ចកម្ពុជា កាន់តែរីកលូតលាស់ជាលំដាប់ កំណើនសេដ្ឋកិច្ចរក្សាបានក្នុងរង្វង់ ៧% ជាច្រើនឆ្នាំជាប់គ្នា នៅក្នុងរយៈពេលចុងក្រោយ មុនការផ្ទុះឡើងនៃជំងឺរាតត្បាតកូវីដ-១៩។
សម្តេចប្រធានរដ្ឋសភាបានបន្តថា ទោះបីចាប់ពីឆ្នាំ២០២០មក យើងបានជួបនូវវិបត្តិជំងឺកូវីដ-១៩ ជាមួយពិភពលោកទំាងមូលយ៉ាងណាក្តី តែកម្ពុជានៅតែអាចរក្សាបាននូវការកាត់បន្ថយអត្រាភាពក្រីក្រ បានដោយជោគជ័យ។
សម្តេចបានបញ្ជាក់ថា "យើងបានប្រែក្លាយពីប្រទេសគ្មានអ្វីសោះ មកជាប្រទេសមានចំណូលមធ្យមកម្រិតទាប ហើយយើងបន្តប្រឹងប្រែង អភិវឌ្ឍប្រទេសក្លាយជាប្រទេសមានចំណូលមធ្យមកម្រិតខ្ពស់ និងជាប្រទេសមានចំណូលខ្ពស់នាពេលអនាគត តាមចក្ខុវិស័យច្បាស់លាស់និងត្រឹមត្រូវរបស់យើង" ។
សម្តេចបានបន្តថា ក្រោមម្លប់សុខសន្តិភាព យើងបានកំពុងកសាងកិត្យានុភាពលើឆាកអន្តរជាតិ តាមគោលនយោបាយការបរទេស។ កម្ពុជាបានចែករំលែកទំាងសកម្មភាព ទស្សននិងធនធាន ជាមួយពិភពក្នុងការកសាងសន្តិភាព និងជួយគ្នានៅគ្រាមានមានទុក្ខលំបាក ដូចជាបានបញ្ជូនកងកម្លំាងរក្សាសន្តិភាពទៅកាន់ប្រទេសជាច្រើន នៅក្រោមឆ័ត្រអង្គការសហប្រជាជតិ ហើយនៅពេលមានវិបត្តិកូវីដ១៩នេះ យើងបានផ្តល់ជំនួយជាម៉ាស និងសម្ភារៈវិជ្ជសាស្រ្តមួយចំនួន ដល់ប្រទេសក្នុងសហគមន៍អាស៊ាននិងតំបន់អាស៊ី មានប្រទេសឡាវ មីយ៉ាន់ម៉ា ទីម័រខាងកើត និងប្រទេសនេប៉ាល់ជាដើម។
សមិទ្ធផលធំៗរបស់ជាតិជាច្រើន កំពុងរីកផុសឡើងនៅទូទាំងប្រទេស ពិសេសទឹកដីខេត្តសៀមរាប និងខេត្តព្រះសីហនុ។អ្វីដែលយើងទាំងអស់គ្នា កំពុងសារទរទៀតនោះ គឺអណ្តូងរ៉ែប្រេង ដែលជាធនធាន ដ៏មានតម្លៃរបស់ជាតិយើងនេះ នឹងក្លាយជាប្រភពថ្មីមួយទៀត ក្នុងការជំរុញខឿនសេដ្ឋកិច្ចជាតិ លើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែរីកចម្រើន ធូរធារឡើងមួយ កម្រិតទៀតនាពេលអនាគត។
មានសុខសន្តិភាពទើបយើងមានឱកាសកសាងនិងអភិវឌ្ឍប្រទេសជាតិ និងកសាងកិត្យានុភាពប្រទេសយើងនៅលើឆាកអន្តរជាតិទៀតផង។ សូមជនរួមជាតិថែរក្សាស្មារតី៧មករា ក៏ដូចជាថែរក្សាសុខសន្តិភាព ដើម្បីកម្ពុជាឆ្ពោះទៅកាន់វឌ្ឍនភាព និងរុងរឿងថែមទៀត នាពេលខាងមុខនេះ៕
ដោយ ផល សុផានិត និង ហេង បញ្ញា
