AKP ភ្នំពេញ ថ្ងៃទី០៦ ខែមករា ឆ្នាំ២០២១ -- មន្រ្ដីជាន់ខ្ពស់ក្រសួងពាណិជ្ជកម្មបានជំរុញឱ្យក្រសួង-ស្ថាប័នពាក់ព័ន្ធទាំងអស់​បន្ត​នីតិវិធី​ពិនិត្យ និងស្រាវជ្រាវជាមួយមន្ត្រីជំនាញក្នុងក្រសួង-ស្ថាប័នរៀងៗខ្លួនលើ​ជំហកម្ពុជា​ទាក់​ទង​នឹងអនុ​សញ្ញា​សិង្ហបុរីស្តីពីសន្ធានកម្មដើម្បីជាធាតុចូលឱ្យកាន់តែភាព​ស៊ីជម្រៅ សម្រាប់​ ជាមូល​ដ្ឋានក្នុងការប្រជុំពិភាក្សានាពេលខាងមុខ និងការឈានចូលដល់សម្រេចចិត្តណា​មួយ​នាពេលអនាគត។ នេះគឺជាការលើកឡើងរបស់ឯកឧត្តម សុខ សុភ័ក្ត្រ រដ្ឋលេខាធិការ​ក្រសួងពាណិជ្ជកម្ម ក្នុងការដឹកនាំកិច្ចប្រជុំស្តីពីអនុសញ្ញាសិង្ហបុរីស្តីពីសន្ធានកម្ម តាម​ប្រព័ន្ធ​វីដេអូ ដែលមានការចូលរួមពីមន្ត្រីជំនាញរបស់ក្រសួង-ស្ថាប័នជំនាញពាក់ព័ន្ធ​កាល​ពីរសៀលថ្ងៃទី០៥ ខែមករា ឆ្នាំ២០២១ នៅទីស្ដីការក្រសួងពាណិជ្ជកម្ម។

ឯកឧត្តម សុខ សុភ័ក្ត្រ បានបញ្ជាក់ថា អនុសញ្ញានេះ បានចូលជាធរមាន កាលពី​ថ្ងៃទី១២ ខែកញ្ញា ឆ្នាំ២០២០ កន្លងទៅ ដែលមកទល់ពេលនេះមានប្រទេស​និងដែនដីជាង​៥០ បានក្លាយជាហត្ថលេខី ដែលក្នុងនោះមានតែ៦ ប្រទេស និងដែនដី (ហ្វីជី កាតា សិង្ហបុរី បេឡារុស អារ៉ាប៊ីសាអូឌីត និងអេក្វាទ័រ) ប៉ុណ្ណោះ ដែលបានផ្តល់សច្ចាប័នចូល​អនុសញ្ញានេះ។ ឯកឧត្ដមបានបន្ដថា ដើម្បីជាធាតុចូលប្រកបដោយបរិយាប័ន អង្គប្រជុំ​បាន​លើកឡើងពីច្បាប់សារធាតុនៃអនុសញ្ញានេះ ដោយបានពិនិត្យពីអនុលោមភាពនៃ​បញ្ញតិ្តក្នុង​អនុសញ្ញានេះ ជាមួយនឹងច្បាប់ជាតិជាធរមានរបស់កម្ពុជា រួមមានច្បាប់ស្តីពី​វិនិយោគ និងក្រមរដ្ឋវេណីជាដើម ព្រមទាំងច្បាប់អន្តរជាតិសំខាន់ៗផ្សេងទៀត។

ជាមួយ​គ្នានេះ អង្គប្រជុំ​ក៏បានវិភាគពីទិដ្ឋភាពច្បាប់ សេដ្ឋកិច្ច នយោបាយ និងសង្គម (ធនធាន​មនុស្ស និងស្ថានភាពកម្ពុជាបច្ចុប្បន្ននិងអនាគត) ក្នុងករណីដែលកម្ពុជាចូល ឬមិនចូល​ក្នុងអនុសញ្ញានេះ ដើម្បីធានាថា ការសម្រេចចិត្តរបស់កម្ពុជា គឺត្រឹមត្រូវ និង​ប្រកប​ដោយ​សុភវិនិច្ឆ័យខ្ពស់បំផុត ពិសេសដើម្បីលើកកំពស់ការធ្វើវិនិយោគ និងធុរកិច្ច​នៅកម្ពុជា៕

ដោយ ឡុង ស៊ីវ៉ាន់ ប្រភព៖ ក្រសួងពាណិជ្ជកម្ម