AKP ភ្នំពេញ ថ្ងៃទី០៦ ខែមករា ឆ្នាំ២០២១ -- ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានចាត់ទុកការចុះ​អនុស្ស​រ​ណៈ​​យោគយល់គ្នារវាងក្រសួងពាណិជ្ជកម្ម និងក្រុមហ៊ុន យ៉ាម៉ាតុ ហ្រ្គីន (YAMATO GREEN) នឹងបង្កើតកិច្ចសហប្រតិបត្តិការយ៉ាងល្អក្នុងការចូលរួមដោះស្រាយបញ្ហាប្រឈមនានា ក្នុង ខ្សែច្រវាក់តម្លៃ ពង្រឹងផលិតភាព និងគុណភាព ដើម្បីឆ្លើយតបទៅទីផ្សារ។ ការលើក​ឡើង​នេះ ក្នុងពិធីចុះហត្ថលេខាលើអនុស្សរណៈនៃការយោគយល់គ្នាដើម្បីអភិវឌ្ឍន៍​ខ្សែច្រវាក់​តម្លៃផលិតផលកសិ-ពាណិជ្ជកម្ម រវាងក្រសួងពាណិជ្ជកម្ម និងក្រុមហ៊ុន យ៉ាម៉ាតុ ហ្រ្គីន (YAMATO GREEN) ដោយមានការអញ្ជើញចូលរួមពី ឯកឧត្តម មីកាមិ ម៉ាសាហ៊ីរ៉ូ (Mikami Masahiro) ឯកអគ្គរាជទូតជប៉ុនប្រចាំនៅកម្ពុជា នាព្រឹកថ្ងៃទី០៦ ខែមករា ឆ្នាំ២០២១ នៅ​ទីស្ដី​ការក្រសួងពាណិជ្ជកម្ម។ នេះបើយោងតាមក្រសួងពាណិជ្ជកម្ម។

ឯកឧត្តម ប៉ាន សូរស័ក្តិ បានមានប្រសាសន៍ថា ការវិនិយោគរបស់ក្រុមហ៊ុន Yamato Green លើវិស័យកសិ-ពាណិជ្ជកម្ម គឺមានសារៈសំខាន់ណាស់ ព្រោះកសិ-ពាណិជ្ជ​កម្មជា​វិស័យ​មួយ​​ដែលមានសក្ដានុពលខ្ពស់នៅកម្ពុជា និងមិនទាន់មានការអភិវឌ្ឍ ឬវិនិយោគ​ច្រើននៅ​ឡើយ។ ឯកឧត្ដមបានគូសបញ្ជាក់ថា ការចុះអនុស្សរណៈយោគយល់​គ្នាថ្ងៃនេះ ជាការធ្វើការរួម​គ្នា​រវាងវិស័យសាធារណៈ និងឯកជន និងបានឆ្លើយតបទៅនឹងគោល​នយោ​បាយ​​​របស់​រាជ​រដ្ឋាភិបាលកម្ពុជាក្នុងការលើកកម្ពស់វិស័យកសិ-ពាណិជ្ជកម្ម ដែល​ស្របទៅនឹង​ចតុកោណ​ទី៤ មុំទី១ នៃយុទ្ធសាស្ត្រចតុកោណដំណាក់កាលទី៤ ក្នុងការលើក​ស្ទួយវិស័យកសិកម្ម និងអភិវឌ្ឍន៍ជនបទ។ ឯកឧត្ដមបន្ដថា ក្នុងនាមភាពជាដៃគូអភិវឌ្ឍន៍​ឧស្សាហកម្ម និងកសិ-ពាណិជ្ជកម្ម ក្រុមហ៊ុន Yamato Green នឹងក្លាយជាដៃគូសមស្រប​មួយ​សម្រាប់អភិវឌ្ឍន៍ផលិតកម្ម កសិ-ពាណិជ្ជកម្ម ប្រកបដោយនិរន្តរភាព និងការផ្តល់​បច្ចេក​ទេសកែច្នៃ ការវេចខ្ចប់ ព្រមទាំងនីតិវិធីផ្សេងៗ ដើម្បីបង្កើនឱកាសក្នុងការផ្គត់ផ្គង់​ទីផ្សារ​ក្នុង​ស្រុក និងការនាំចេញប្រកបដោយប្រសិទ្ធភាព។ ឯកឧត្តមរដ្ឋមន្ត្រីបានសង្កត់ធ្ងន់ថា ដើម្បី​ដោះស្រាយបញ្ហាប្រឈមដែលទាក់ទងទៅនឹងផលិតកម្មតាមគំរូអាជីវកម្មប្រកបដោយនិរន្តរភាពនៅក្នុងយុគសម័យឌីជីថល ការចូលរួមរបស់ក្រុមហ៊ុន Yamato Green ក្នុងការអភិវឌ្ឍ​ម៉ូដែលផលិតកម្មមួយ ដែលមានបច្ចេកវិទ្យាជឿនលឿន នឹងជំរុញផលិតកម្មក្នុងស្រុក​នាពេលបច្ចុប្បន្ន។ ឯកឧត្ដមបានអះអាងថា “ក្រុមហ៊ុន សហគ្រាសធុនតូចនិងមធ្យម និង​ក្រុមកសិករផលិតនឹងមានលទ្ធភាពក្នុងការបង្កើតខ្សែច្រវាក់តម្លៃផ្គត់ផ្គង់ ដែលប្រកបដោយ​បរិយាប័ន្ន និងទទួលបានឧត្តមភាពប្រកួតប្រជែងសម្រាប់ជ្រៀតចូលទីផ្សារ និងធ្វើពិពិ​ធ​កម្ម​ទីផ្សារ ឱ្យមានវិសាលភាពទូលំទូលាយ”។

ឯកឧត្តម ប៉ាន សូរស័ក្តិ ក៏បានផ្តល់នូវអនុសាសន៍ដល់ភាគីទាំងពីរ គួរតែមាន​ប្រព័ន្ធ​គ្រប់គ្រងព័ត៌មានមួយជាក់លាក់សម្រាប់ចែករំលែកភារកិច្ចទៅតាមមុខងារ និងផ្តល់ព័ត៌​មាន​ទៅវិញទៅមកឱ្យទាន់ពេល ឱ្យជាប់លាប់ និងប្រតិបតិ្តការឱ្យពេញលេញ ហើយក្រុម​ការងារគួររៀបចំប្រព័ន្ធសម្របសម្រួល និងយន្តការរយៈពេលមធ្យម និងវែងដើម្បីធានាថា ជំនួយបច្ចេកទេស និងអត្ថប្រយោជន៍ផ្តល់ដល់ក្រុមហ៊ុន សហគ្រាសធុនតូចនិងមធ្យម និងក្រុមកសិករផលិតមិនជាន់គ្នា។ លើសពីនេះទៀត ក្រុមហ៊ុន Yamato Green គួរនាំផលិត​ផលកសិ-ពាណិជ្ជកម្មពីក្រុមកសិករផលិតខ្នាតតូច​ទៅទីផ្សារធំៗ បង្កើនការវិនិយោគ និង​ផ្តល់​​បច្ចេកទេសអភិវឌ្ឍន៍គ្រប់ដំណាក់កាល​នៃវដ្ត​ផលិតកម្ម កសិ-ពាណិជ្ជកម្ម ដែលគិត​ចាប់ពីការដាំដុះ ការកែច្នៃ ការវេចខ្ចប់ រហូតដល់ការចែកចាយ។ បន្ថែមពីនេះទៀត ក្រុមហ៊ុន គួរផ្តល់ជំនួយការលើបច្ចេក​ទេសក្នុងការពង្រឹងការអនុវត្តច្បាប់ពាណិជ្ជកម្ម​តាម​ប្រព័ន្ធអេឡិចត្រូនិក។

សូមបញ្ជាក់ថា Yamato Green ជាបុត្រសម្ព័ន្ធក្រុមហ៊ុនជំនួញជប៉ុនធំៗ រួមមាន​ធនាគារ ស្ថាប័នមីក្រូហិរញ្ញវត្ថុ ផ្សារទំនើប និងក្រុមហ៊ុនរបស់ប្រទេសជប៉ុនជាដៃគូចំនួន ១៦ក្រុមហ៊ុន។ ក្រុមហ៊ុនបានរៀបចំបង្កើតជាគំរូខ្សែច្រវាក់តម្លៃផលិតផលកសិ-ពាណិជ្ជកម្ម ដើម្បីធានាឱ្យបានទាំងបរិមាណនិងគុណភាពផលិតផលកសិ-ពាណិជ្ជកម្ម ដើម្បីឆ្លើយតប តាមតម្រូវការទីផ្សារក្នុងប្រទេស និងនាំចេញឱ្យមានចីរភាព តាមរយៈការធ្វើអាជីវកម្ម Franchise នៃគំរូផលិតដែលស្របតាមខ្នាត និងស្តង់ដារកំណត់តែមួយ៕

ដោយ រិទ្ធី