AKP ភ្នំពេញ ថ្ងៃទី០៦ ខែមករា ឆ្នាំ២០២១ -- មណ្ឌលចត្តាឡីស័ករាជធានីភ្នំពេញ មានទីតាំងស្ថិតនៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ បានស្ថាបនារួចរាល់ហើយ និងបានសម្ពោធដាក់ឱ្យ ប្រើប្រាស់ ជាផ្លូវការនាព្រឹកថ្ងៃទី០៦ ខែមករា ឆ្នាំ២០២១នេះ ក្រោមវត្តមានឯកឧត្តម ឃួង ស្រេង អភិបាលរាជធានីភ្នំពេញ និងលោកជំទាវ ជា ស៊ីណា ឃួង ស្រេង រួមជាមួយ នឹងអភិបាល រងរាជធានី អភិបាលខណ្ឌ និងមន្ត្រីរាជការចំណុះឱ្យ រដ្ឋបាលរាជធានីភ្នំពេញ ជាច្រើន រូបទៀត។

មណ្ឌលចត្តាឡីស័ករាជធានីភ្នំពេញមានចំនួន៤អាគារ ដែលក្នុងមួយអាគារដាក់ មនុស្សបាន១២៦នាក់ ដូច្នេះ៤ អាគារស្មើនឹង៥០៤នាក់ ចែកចេញជា៥០៤បន្ទប់ ស្មើនឹង៥០៤គ្រែ ជាមួយនឹងការបំពាក់កង្ហារ បន្ទប់ទឹក បង្គន់អនាម័យ និងបានរៀបចំនូវ ហេដ្ឋារចនាសម្ព័ន្ធជាច្រើនទៀត ដែលបានបង្កលក្ខណៈងាយស្រួលដល់បងប្អូនដែលត្រូវ មកធ្វើចត្តាឡីស័ក។

ឯកឧត្ដម ឃួង ស្រេង បានមានប្រសាសន៍លើកឡើងថា មណ្ឌលចត្តាឡីស័កនេះ ធ្វើឡើង ដើម្បីដាក់អ្នកដំណើរដែលចូលមកព្រះរាជាណាចក្រកម្ពុជាតាមអាកាសយានដ្ឋាន អន្តរជាតិភ្នំពេញ ហើយអ្នកដំណើរទាំងអស់នោះត្រូវបានចែកជាពីរប្រភេទ ពោលគឺ បើអ្នកដំណើរមានលទ្ធភាពគ្រប់គ្រាន់ ពួកគាត់អាចធ្វើចត្តាឡីស័កនៅតាមផ្ទះសំណាក់ ឬសណ្ឋាគារ។ តែបើអ្នកដំណើរមិនមានលទ្ធភាពគ្រប់គ្រាន់ទេ ពួកគាត់អាចធ្វើចត្តាឡីស័កនៅ មជ្ឈមណ្ឌលចត្តាឡីស័ករាជធានីបាន ដោយមណ្ឌលនេះមិនតម្រូវឱ្យមានការបង់ថ្លៃសេវា នោះទេ ព្រមទាំងផ្ដល់នូវអាហារក្នុងមួយថ្ងៃ៣ពេល រួមជាមួយនឹងការធ្វើតេស្តដោយមិនអស់ ប្រាក់ថែមទៀត។

ឯកឧត្ដមបានបញ្ជាក់ថា នៅថ្ងៃទី១១ ខែមករាខាងមុខនេះ នៅតាមបណ្ដា សាលារៀន ទាំងអស់ក្នុងរាជធានីភ្នំពេញ នឹងបើកបវេសនកាលចូលរៀនវិញ។ ដូច្នេះសាលាដែលធ្លាប់ ជាកន្លែងធ្វើចត្តាឡីស័ក ត្រូវប្រគល់ទៅឱ្យសាលាវិញ ដើម្បីឱ្យសិស្សានុសិស្ស អាចចូលរៀនបាន។ ចំណែកបងប្អូនប្រជាពលរដ្ឋដែល បាន និងកំពុងធ្វើចត្តាឡីស័ក នៅតាមសាលារៀនទាំងនោះ នឹងត្រូវប្ដូរមកនៅមណ្ឌល ចត្តាឡីស័ករាជធានីភ្នំពេញនេះ។

បើតាមរបាយការណ៍របស់លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានបញ្ជាក់ថា អគារចត្តាឡីស័កនេះ មានចំនួន៤អាគារ ដែលអាគារនីមួយៗមានទទឹង២០ម៉ែត្រ និងបណ្តោយ៤០ម៉ែត្រ និងបន្ទប់អនាម័យទំហំ ៧ម៉ែត្រ x ២២ម៉ែត្រ រួមជាមួយនឹងការរៀបចំហេដ្ឋារចនាសម្ព័ន្ធនានា ក្នុងនោះមានបណ្តាញ ផ្លូវ លូ ទឹក និងភ្លើង៕ ដោយ សួស សំរិត