ENGLISH 
FRENCH 
ARAB ពុទ្ធិកសាកលវិទ្យាល័យព្រះសីហនុរាជប្រកាសផ្តល់អាហារូបករណ៍១០០ភាគរយដល់សមណនិស្សិត និង សិស្សនិស្សិតលើមុខជំនាញជាច្រើន
AKP ភ្នំពេញ ថ្ងៃទី០៦ ខែមករា ឆ្នាំ២០២១ -- សម្រាប់ឆ្នាំសិក្សា២០២១-២០២២ ពុទ្ធិកសាកលវិទ្យាល័យព្រះសីហនុរាជទាំងបីទីតាំង បានប្រកាសផ្តល់ អាហារូបករណ៍១០០ភាគរយ ប្រគេនដល់ សមណនិស្សិត និង សិស្សនិស្សិត លើមុខជំនាញជាច្រើនដោយចាប់ទទួលពាក្យពីពេលនេះតទៅ។
សម្តេចព្រះមហាអរិយវង្ស បណ្ឌិត ឃី សុវណ្ណរតនា ព្រះសាកលវិទ្យាធិការរងទទួលបន្ទុកដឹកនាំ គ្រប់គ្រង ពុទ្ធិកសាកលវិទ្យាល័យព្រះសីហនុរាជ បានបញ្ជាក់ឱ្យដឹងថា សាកលវិទ្យាល័យចាប់ផ្តើមអនុញ្ញាតឱ្យសមណនិស្សិត និងនិស្សិតជាគ្រហស្ថទាំងពីរភេទ ទាំងបុរសនិងស្ត្រីអាចដាក់ពាក្យស្នើសុំអាហារូបករណ៍និងចូលរៀនថ្នាក់បរិញ្ញាបត្របានគឺអាហារូបករណ៍១០០ភាគរយ មិនត្រូវបង់ថ្លៃអ្វីទាំងអស់ ប៉ុន្តែត្រូវដាក់ពាក្យសុំដើម្បីធ្វើការប្រឡងជ្រើសរើស។
សម្តេចព្រះសាកលវិទ្យាធិការរងបានបញ្ជាក់បន្ថែមថា«សម្រាប់ពេលបច្ចុប្បន្ននេះដោយសារតែ មានកូវីដ-១៩រាតត្បាត ដូច្នេះការប្រឡងគឺអាស្រ័យតាមក្រសួងជាអ្នកផ្តល់កាលបរិច្ឆេទនិងផ្តល់លទ្ធភាពថាតើអាចប្រឡងពេលណា ប៉ុន្តែសំខាន់ត្រូវដាក់ពាក្យសិន ដើម្បីឱ្យបានឈ្មោះហើយ បើមិនទាន់ប្រឡងទេ អាចចូលរៀនបណ្តើរៗ ចាំពេលប្រឡងដើម្បីនឹងកំណត់ថាតើ និស្សិតណាត្រូវរៀនបន្ត»។
យ៉ាងណាក៏ដោយ សម្តេចព្រះមហាអរិយវង្ស បានសង្កត់ធ្ងន់ថា បើសមណនិស្សិត និង សិស្សនិស្សិតបានដាក់ពាក្យស្នើសុំហើយភាគច្រើនគឺបានប្រឡងជាប់ជាស្ថាពរ។
សមណសិស្ស និងសិស្សនិស្សិតសិក្សានៅពុទ្ធិកសាកលវិទ្យាល័យព្រះសីហនុរាជ អាចជ្រើសឯកទេសចំនួន៩គឺ៖១- ទស្សនវិជ្ជាពុទ្ធសាសនា,២- នីតិសាស្រ្ត,៣- សង្គមវិទ្យា,៤- អក្សរសាស្រ្តខ្មែរ,៥- បរិស្ថានវិទ្យា,៦- រដ្ឋបាលអប់រំ,៧- គ្រប់គ្រងទូទៅ,៨- ភាសាបាលី,៩- អក្សរសាស្រ្តអង់គ្លេស។
បើតាមសម្តេចព្រះមហាអរិយវង្ស បណ្ឌិត ឃី សុវណ្ណរតនា បច្ចុប្បន្ននេះ សមណនិស្សិតនិងសិស្សនិស្សិតដែលកំពុងសិក្សាគឺមានរហូតដល់ទៅ៣ 000 អង្គ/នាក់ ហើយក្នុងនោះគឺនិស្សិតជាគ្រហស្ថទាំងបុរសនិងស្ត្រីមានចំនួនច្រើនជាងព្រះសង្ឃទៅទៀត ព្រះសង្ឃមានតែប្រមាណ៤០ភាគរយប៉ុណ្ណោះ ហើយ ក្នុងនោះស្ត្រីច្រើនជាងបុរស ក្នុងបណ្តានិស្សិតជាគ្រហស្ថ។
សូមបញ្ជាក់ថា ពុទ្ធិកសាកលវិទ្យាល័យព្រះសីហនុរាជ មាន៣ទីតាំង នៅរាជធានី ភ្នំពេញ១ សាខាខេត្តកំពង់ឆ្នាំង១ និងសាខាខេត្តបាត់ដំបង១។ សញ្ញាបត្ររបស់ពុទ្ធិកសាកលវិទ្យាល័យព្រះសីហនុរាជ ត្រូវបានចុះ ហត្ថលេខា និងទទួលជាផ្លូវការដោយក្រសួងធម្មការ និងសាសនា និង ក្រសួងអប់រំ យុវជន និង កីឡា។ សញ្ញាបត្ររបស់ពុទ្ធិកសាកលវិទ្យាល័យព្រះសីហនុរាជ អាចប្រឡង ចូលក្របខ័ណ្ឌមន្ត្រីរាជការគ្រប់ស្ថាប័ន និងអាចប្រឡងជ្រើសរើស អាហារូបករណ៍ទៅសិក្សានៅបរទេសបាន។
ដេប៉ាតឺម៉ង់ឆ្នាំសិក្សាមូលដ្ឋាននៃពុទ្ធិកសាកលវិទ្យាល័យព្រះសីហនុរាជភ្នំពេញស្ថិត នៅតាមបណ្ដោយតិរវិថីព្រះស៊ីសុវត្ថិ សង្កាត់ជ័យជំនះ ខណ្ឌដូនពេញ រាជធានីភ្នំពេញ ជាប់របងក្រសួងយុត្តិធម៌ ទល់មុខសាលសន្និសីទចតុម្មុខសិក្សានៅពុទ្ធិកសាកលវិទ្យាល័យព្រះសីហនុរាជ សិក្សាដើម្បីឧត្តមភាព និងគុណធម៌៕
ដោយ ៖ គង់ សិរីរ័ត្ន, រូបថត ៖ អ៊ុន រិទ្ធី
