AKP ភ្នំពេញ ថ្ងៃទី០៦ ខែមករា ឆ្នាំ២០២១ -- ឯកឧត្តម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនបានលើកឡើងថា សហគមន៍​ផ្តល់ជំនួយ​បាន​វាយតម្លៃ​ខ្ពស់​ចំពោះ​ការ​ដឹកនាំ​របស់​រាជរដ្ឋាភិបាលកម្ពុជា ដែល​បាន​ដាក់​ចេញនូវ​ទស្សនវិស័យ​ និង​គោល​ដៅ​ច្បាស់​លាស់​ក្នុង​ការ​បញ្ចប់​ការ​គំរាមកំហែង​ដោយ​សារ​មីន​នៅក្នុងប្រទេសកម្ពុជា។ នេះបើយោងតាមផេកផ្លូវការរបស់ឯកឧត្តម ទេសរដ្ឋមន្ត្រី ក្នុង​កិច្ច​ប្រជុំក្រុមប្រឹក្សាភិបាលគម្រោងបោសសម្អាតមីនដើម្បីលទ្ធផលដំណាក់កាលទី៤ ដែល​មានការអញ្ជើញចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ប្រទេសផ្តល់ជំនួយ និង​ដៃគូអភិវឌ្ឍន៍ ក្នុងនោះរួមមាន អង្គការ UNDP ប្រទេសអូស្ត្រាលី ភ្នាក់ងារសហប្រតិបត្តិ​ការ​អន្តរជាតិនៃប្រទេសកូរ៉េ(KOICA) និងប្រទេសនូវែលសេឡង់ ដើម្បីពិនិត្យលទ្ធផលដែល​សម្រេច​បានក្នុងឆ្នាំ២០២០ និងផែនការសកម្មភាពការងារឆ្នាំ២០២១។ កិច្ចប្រជុំនេះ បានធ្វើឡើង នាព្រឹកថ្ងៃទី០៦ ខែមករា ឆ្នាំ២០២១​។

ឯកឧត្តម ទេសរដ្ឋមន្ត្រី លី ធុជ បានគូសបញ្ជាក់ថា ក្នុងនាមរាជរដ្ឋាភិបាលកម្ពុជា សូម​វាយតម្លៃខ្ពស់ចំពោះកិច្ចខិតខំប្រឹងប្រែង និង​សមិទ្ធផលនានានៃការអនុវត្តគម្រោង​បោស​សម្អាតមីនដើម្បីលទ្ធផលចាប់តាំងពីឆ្នាំ២០០៦ នៅខេត្តបាត់ដំបង ប៉ៃលិន និងខេត្ដ​បន្ទាយមានជ័យ ដែលគិតត្រឹមខែវិច្ឆិកា ឆ្នាំ២០២០ ដែលការអនុវត្តគម្រោងនេះ បាន​រំដោះ​ផ្ទៃដី និងផ្តល់ដីមានសុវត្ថិភាពប្រមាណ ២៥៤ គីឡូម៉ែត្រក្រឡា និងមានប្រជាពលរដ្ឋទទួល​ផលប្រមាណជាង ១ លាននាក់។ ឯកឧត្ដមទេសរដ្ឋមន្រ្ដីបានមានប្រសាសន៍ថា ការគាំទ្រ​រួមគ្នារបស់ម្ចាស់ជំនួយ និងអង្គការ UNDP ត្រូវបានវាយតម្លៃខ្ពស់ដោយរាជរដ្ឋាភិបាល និង​ប្រជាជនកម្ពុជា ជាពិសេសសហគមន៍ដែលរស់នៅក្នុងតំបន់រងគ្រោះដោយសារគ្រាប់មីន ដែលការប្តេជ្ញាចិត្តនេះ គឺមានសារៈសំខាន់ណាស់ ក្នុងខណៈពេលដែលយើងទាំងអស់​គ្នា​បន្តពង្រឹងកិច្ចខិតខំប្រឹងប្រែង និងគោលដៅរួមគ្នា ឆ្ពោះទៅរកការសម្រេចបាននូវកម្ពុជា​ដែលគ្មាន​មីននៅឆ្នាំ ២០២៥ ។

ឯកឧត្ដមទេសរដ្ឋមន្រ្ដីក៏​បានចាត់ទុកកម្មវិធីអភិវឌ្ឍន៍​នៃ​អង្គការសហប្រជាជាតិប្រចាំ​នៅកម្ពុជា (UNDP) គឺជាដៃគូការងារដ៏រឹងមាំ និងធ្វើការងារ​មិនខ្លាច​ការនឿយហត់ជាមួយ​អាជ្ញាធរមីន ដែលបានចូលរួមយ៉ាងសកម្ម ក្នុងការស្វែងរក​ការគាំទ្រដល់គម្រោងបោស​សម្អាតមីនដើម្បីលទ្ធផល ទាំងផ្នែកថវិកា សម្ភារ និងការផ្តល់​ប្រឹក្សាបច្ចេកទេស ចាប់តាំងពី ដំណើរ​ការក្នុងឆ្នាំ២០០៦។ ជាមួយគ្នានេះ ឯកឧត្ដមទេសរដ្ឋមន្រ្ដីក៏បានថ្លែងអំណរគុណ​ចំពោះការ​បន្តគាំទ្រដ៏សប្បុរសជាមួយរាជរដ្ឋាភិបាលកម្ពុជា ដែលផ្តល់ដោយប្រជាជន និងរដ្ឋាភិបាលអូស្រ្តាលី សាធារណរដ្ឋកូរ៉េ និងនូវែលសេឡង់ ក្នុងចំណោមប្រទេស​ដទៃ​ទៀត ដើម្បីចូលរួមការងារបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា តាមរយៈគម្រោងបោសសម្អាតមីនដើម្បីលទ្ធផលដំណាក់កាលទី៤។ លើសពីនេះទៀត បើទោះបីជាជំងឺរាតត្បាត Covid-19 ប្រតិបត្ដិការបោសសម្អាតមីននៅកម្ពុជា បានបន្តដោយ​ជោគជ័យ និងដោយសុវត្ថិភាព។ ឯកឧត្ដមទេសរដ្ឋមន្រ្តីបានអំណរគុណ​ចំពោះការខិតខំ​ប្រឹងប្រែង និងវីរភាពអ្នកដោះមីនរបស់យើង ដោយធ្វើការទាំងប្រថុយប្រថាន និងមិនខ្លាច​ញ​ញើតតាមបណ្តាអង្គការរៀងៗខ្លួន។

ក្នុងឱកាសនោះដែរ តំណាង​សហគមន៍​ម្ចាស់​ជំនួយ​ រួម​ទាំង​តំណាងអង្គការ​ UNDP ប្រចាំ​កម្ពុជាក៏បានវាយតម្លៃខ្ពស់ចំពោះការដឹកនាំរបស់សម្តេចតេជោនាយករដ្ឋមន្រ្តី និងជា​ប្រធានអាជ្ញាធរមីន ដែលបានដាក់ចេញនូវទស្សនវិស័យ និងគោលដៅយ៉ាង​ច្បាស់លាស់​ក្នុងការបញ្ចប់ការគំរាមកំហែងដោយសារមីន។

សូមបញ្ជាក់ផងដែរថា ក្រៅ​ពី​ម្ចាស់​ជំនួយ​ក្នុង​គម្រោង​ CFR-4 វិស័យ​មីន​នៅ​កម្ពុជា​ មាន​ការ​គាំទ្រ​ពី​ប្រទេសម្ចាស់ជំនួយដទៃទៀត រួមមាន សហរដ្ឋអាមេរិក អង់គ្លេស ជប៉ុន ន័រវែស ចិន កាណាដា អាល្លឺម៉ង់ ស្វ៊ីស អៀរឡង់ UNDP និង UNICEF ព្រមទាំងមូលនិធិ អង្គការសង្គមស៊ីវិល និងសប្បុរសជន​ ផងដែរ៕

ដោយ រិទ្ធី