AKP បន្ទាយមានជ័យ ថ្ងៃទី០៦ ខែមករា ឆ្នាំ២០២១--អភិបាលខេត្តបន្ទាយមានជ័យ ឯកឧត្តម អ៊ុំ រាត្រី បានបន្តធ្វើការអំពាវនាវយ៉ាងទទូចដល់​​ពលករខ្មែរ ដែលបានវិលត្រឡប់ពីប្រទេសថៃ មកវិញ ត្រូវតែធ្វើការពិនិត្យសំណាក ធ្វើចត្តាឡីស័ករយៈពេល១៤ថ្ងៃ ឱ្យបានគ្រប់ៗគ្នាយ៉ាងហ្មត់ចត់ ច្បាស់លាស់គោរពតាមការណែនាំ និងអំពាវនាវរបស់សម្តេចតេជោប្រមុខរាជរដ្ឋាភិ បាល និងក្រសួងសុខាភិបាលសំដៅទប់ស្កាត់ការរីករាល​ដាលជំងឺកូវីដ-១៩ចូលក្នុងសហគមន៍ ខណៈជំងឺដ៏កាចសាហាវនេះកំពុងរាតត្បាតយ៉ាងខ្លាំងក្នុង​ប្រទេសនោះ។

ការថ្លែងបែបនេះរបស់ឯកឧត្តមអភិបាលខេត្តបន្ទាយមានជ័យ ក្នុងឱកាសអញ្ជើញបន្ត ចុះពិនិត្យមើលជាប់ជានិច្ច ដល់ក្រុមការងារប្រចាំការសម្របសម្រួល និងបងប្អូនពលករខ្មែរ យើងដែលត្រឡប់មកពីប្រទេសថៃ កំពុងធ្វើចត្តាឡីស័ក នៅវិទ្យាល័យនិមិត្ត ក្រុងប៉ោយប៉ែត, វិទ្យាល័យកូប ស្រុកអូរជ្រៅ, មហាវិទ្យាល័យវិទ្យាសាស្ត្រសុខាភិបាល, និងមណ្ឌលអង្គការស្ត្រី នៅពងវ៉ា ក្រុងសិរីសោភ័ណ, ​ដោយមានការគ្រប់គ្រងយ៉ាងហ្មត់ចត់ ពីក្រុមការងារកងកម្លាំង ចម្រុះ មានពេទ្យ នគរបាល កងរាជអាវុធហត្ថ យោធា មន្ត្រីរាជការយើងទាំងអស់កាលពីរ សៀលថ្ងៃ៧រោច​ ខែបុស្ស ឆ្នាំជូត ទោស័ក ព.ស.២៥៦៤​ត្រូវនឹងថ្ងៃអង្គារ ទី០៥ ខែមករា ឆ្នាំ២០២១ ។

យោងរបាយការណ៍រដ្ឋបាលខេត្តបន្ទាយមានជ័យ បានឱ្យដឹងថាមកទល់ថ្ងៃ០៥ ខែ មករា ឆ្នាំ២០២១នេះ មានបងប្អូនពលករខ្មែរដែលវិលពីប្រទេសថៃមានប្រមាណជាង ២.០០០ នាក់ ដែលបាននិងកំពុងធ្វើចត្តាឡីស័ក នៅតាមមណ្ឌលនានាក្នុងខេត្តបន្ទាយមានជ័យ ហើយមួយចំនួនត្រូវបានចាកចេញពីមណ្ឌលត្រឡប់ទៅផ្ទះសម្បែងវិញ ក្រោយយកសំណាកទៅ ពិនិត្យឃើញលទ្ធផលអវិជ្ជមានជំងឺកូវីដ-១៩ក្នុងរយៈពេល១៤ថ្ងៃ ។

​​ឯកឧត្តមអភិបាលខេត្តបន្ទាយមានជ័យ ​ក៏បានក្រើនរម្លឺកដល់ក្រុមគ្រូពេទ្យ ក្រុមការងារ ប្រចាំការសម្របសម្រួល និងគ្រប់គ្រងបងប្អូនគ្រប់ទីតាំង សូមបន្តយកចិត្តទុកដាក់​បំពេញបេ សកកម្មការងារ ឱ្យដោយជោគជ័យច្បាស់លាស់ហ្មត់ចត់ ទាំងចំនួនបងប្អូនចូល-ចេញ ការ ហូបចុកការពិនិត្យសុខភាពយកសំណាកជាដើ​ម។

​​អភិបាលខេត្តបន្ទាយមានជ័យបានបន្ថែមទៀតថា អ្វីដែលសំខាន់កម្លាំងសមត្ថកិច្ច ត្រូវ បង្កើនការទប់ស្កាត់ឱ្យបាន និងជួយផ្សព្វផ្សាយអប់រំបន្ថែមដល់ប្រជាពលរដ្ឋ កុំឱ្យពួកគាត់លួច ឆ្លងដែនចេញ-ចូលទៅក្នុងប្រទេសថៃដោយខុសច្បាប់ តាមការបោកពីមេខ្យល់វាគ្រោះថ្នាក់ ណាស់ ហើយបើសមត្ថកិច្ចឃាត់ខ្លួនបាន នោះក៏តម្រូវធ្វើតេស្តធ្វើចត្តាឡីស័ក​។​ 

ជាមួយគ្នានេះ ឯកឱត្តម អ៊ុំ រាត្រី ក៏បានអំពាវនាវដល់ប្រជាពលរដ្ឋគ្រប់មជ្ឈដ្ឋានក្នុង ក្រៅ ប្រទេសសូមចូលរួមអនុវត្តន៍ តាមការផ្សព្វផ្សាយ អប់រំណែនាំរបស់រាជរដ្ឋាភិបាល និង ក្រសួងសុខាភិបាលដែលបានចាក់ផ្សាយរាល់ថ្ងៃ ពីវិធានការទប់ស្កាត់ ការរីករាលដាលជំងឺកូ វីដ-១៩ និងចូលរួមថែរក្សាអនាម័យបរិស្ថាន ថែរក្សាសុខភាពដោយខ្លួនឯង បើមានបញ្ហាសុខភាពខុសពីប្រក្រតីសូមប្រញាប់ទៅមន្ទីរពេទ្យ ឬមណ្ឌលសុខភាព​ជាបន្ទាន់៕

 ដោយឈុន សារ៉ាត