AKP កំពត ថ្ងៃទី០៥ ខែមករា ឆ្នាំ២០២១ -- នៅព្រឹកថ្ងៃទី០៥ ខែមករា ឆ្នាំ២០២១ រដ្ឋបាលខេត្តកំពត បានបើកកិច្ចប្រជុំ គណៈអភិបាលខេត្ត ប្រចាំខែធ្នូ ដំណាច់ឆ្នាំ២០២០តាមរយៈ video content ភ្ជាប់ពីបណ្ដា រដ្ឋបាលក្រុង ស្រុក និងមន្ទីរអង្គភាពជុំវិញខេត្ត។

ឯកឧត្តម ជាវ តាយ អភិបាលខេត្តកំពត បានបញ្ជាក់ថា កិច្ចប្រជុំពេលនេះ គឺពិតជា សំខាន់ក្នុងការឆ្លុះបញ្ចាំងអំពីសមិទ្ធផល និងលទ្ធផលការងារ អំពីបញ្ហាប្រឈម សំណូមពរ ដែលតែងកើតមានឡើងនៅក្នុងមូលដ្ឋាន ដើម្បីរួមគ្នាពិនិត្យពិភាក្សា និងបន្តការដោះស្រាយ ឱ្យមានប្រសិទ្ធភាពប្រសិទ្ធផល និងការអភិវឌ្ឍប្រកប ដោយនិរន្តរភាពនិងចីរភាព។

ឯកឧត្តមអភិបាលខេត្តបានលើកឡើងថា រឿងដែលកំពុងប្រឈមជាងគេ នៅតាម បណ្តាក្រុងស្រុក គឺបញ្ហាបទស្មើសដីធ្លី ដែលទាមទារឱ្យអភិបាលក្រុងស្រុក ត្រូវមានវិធាន ការម៉ឺងម៉ាត់ បើមិនដូច្នេះទេបទល្មើសនឹងកើតឡើងយ៉ាងអនាធិបតេយ្យ។ ទោះជា យ៉ាងណាក៏ដោយ អភិបាលក្រុងស្រុកត្រូវចេះសហការគ្នា រួមគ្នាគិត រួមគ្នាធ្វើ រួមគ្នា ទទួលខុសត្រូវ ហើយការអនុវត្តត្រូវផ្អែកលើមូលដ្ឋានបីដំណាក់កាលគឺ៖ ទី១. ផ្សព្វផ្សាយ លិខិតបទដ្ឋានគតិយុត្តឱ្យបានទូលំទូលាយដល់ពលរដ្ឋបានដឹង, ទី២. ចុះពន្យល់ណែនាំ និងធ្វើកិច្ចសន្យាលើការប្រព្រឹត្តល្មើស និងទី៣. ការអនុវត្តនិត្តិវិធីច្បាប់ ដោះស្រាយតាម ប្រព័ន្ធតុលាការ។

ជាមួយគ្នានេះ ឯកឧត្តមអភិបាលខេត្ត ក៏បានណែនាំដល់អាជ្ញាធរក្រុង ស្រុក និងជំនាញពាក់ព័ន្ធទាំងអស់ ក្រៅពីការយកចិត្តទុកដាក់ផ្ដល់សេវារដ្ឋបាល សេវាសាធារណៈ និងការរក្សាសន្តិសុខសណ្ដាប់ធ្នាប់ជូនប្រជាពលរដ្ឋ ក៏ត្រូវបន្តការ ប្រុងប្រយ័ត្នយកចិត្ត ទុកដាក់ចូលរួមពង្រឹងការអនុវត្តវិធានការការពារសុវត្ថិភាពសង្គម តាម វិធានការណែនាំរបស់ រាជរដ្ឋាភិបាលក៏ដូចក្រសួងសុខាភិបាល ដើម្បីបង្ការទប់ស្កាត់ នៃការរីករាលដាលជំងឺកូវីដ១៩ កុំឱ្យចូលក្នុងសហគមន៍ខេត្តកំពតបានដាច់ខាត។

ដោយឡែកពាក់ព័ន្ធទិវាជ័យជម្នះ ថ្ងៃ៧មករា នៅចំពោះមុខនេះ ឯកឧត្តមអភិបាលខេត្ត ក៏បានក្រើនរម្លឹកដល់មន្ទីរ អង្គភាពកងកម្លាំងប្រដាប់អាវុធ និងអាជ្ញាធរក្រុង ស្រុក ក៏ត្រូវត្រៀម លក្ខណៈរៀបចំឱ្យបានសមរម្យ និងបំផុសស្មារតីដល់ មហាជនឱ្យចូលរួមទាំងអស់គ្នា ក្នុងការរៀបចំតុបតែងលម្អភ្លើង ដាក់ទង់ជាតិអបអរ តាមមន្ទីរអង្គភាព និងលំនៅឋានប្រជា ពលរដ្ឋឱ្យបានផុលផុសស្របតាមស្មារតីនៃច្បាប់កំណត់៕

ដោយ ប្រាក់ លាង