AKP ព្រះសីហនុ ថ្ងៃទី០៥ ខែមករា ឆ្នាំ២០២១ -- ឯកឧត្តម ជាម ហ៊ីម ប្រធានក្រុមប្រឹក្សាខេត្តព្រះសីហនុ និងឯកឧត្ដម គួច ចំរើន អភិបាលនៃគណៈអភិបាលខេត្តព្រះសីហនុ ដឹកនាំកិច្ចប្រជុំសាមញ្ញរបស់ក្រុមប្រឹក្សា ខេត្តព្រះសីហនុ អាណត្តិទី៣ លើកទី១៩ ដែលមានការចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រីជាអភិបាលរងខេត្ត លោកនាយករដ្ឋបាលសា លាខេត្ត ប្រធានមន្ទីរ អង្គភាព និងប្រធានការិយាល័យចំណុះសាលាខេត្តព្រះសីហនុ នាព្រឹកថ្ងៃអង្គារ ៧រោច ខែបុស្ស ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៥ ខែមករា ឆ្នាំ២០២១។

កិច្ចប្រជុំសាមញ្ញរបស់ក្រុមប្រឹក្សាខេត្តព្រះសីហនុលើកទី១៩ អាណត្តិទី៣ មានរបៀប វារៈចំនួន៩ យកមកពិនិត្យ និងពិភាក្សារួមមាន៖១-មតិស្វាគមន៍បើកកិច្ចប្រជុំ។ ២-ពិនិត្យកូរ៉ុម។ ៣-ពិនិត្យ និងអនុម័ត លើសេចក្តីព្រាងរបៀបវារៈនៃកិច្ចប្រជុំសាមញ្ញលើកទី១៩ របស់ក្រុម ប្រឹក្សាខេត្ត។ ៤-ពិនិត្យ និងអនុម័ត លើសេចក្តីព្រាងកំណត់ហេតុកិច្ចប្រជុំសាមញ្ញលើកទី១៨ របស់ក្រុមប្រឹក្សាខេត្ត។ ៥-ពិនិត្យ និងអនុម័តរបាយការណ៍ប្រចាំខែធ្នូ ឆ្នាំ២០២០ ស្ដីពីការ អនុវត្តការងាររបស់រដ្ឋបាលខេត្ត (គិតចាប់ពីថ្ងៃទី២០ ខែវិច្ឆិកា ដល់ថ្ងៃទី២០ ខែធ្នូ ឆ្នាំ២០២០)។ ៦-ពិនិត្យ និងអនុម័តលើសេចក្តីព្រាងការបែងចែកប្រាក់រង្វាន់លើកទឹកចិត្តជូនមន្ត្រីរាជការ សាលាខេត្ត។ ៧-ពិនិត្យ និងអនុម័តលើសេចក្តីព្រាងស្តីពីការកែសម្រួលគម្រោង អភិវឌ្ឍន៍ ឆ្នាំ២០២១។ ៨-ស្តាប់របាយការណ៍របស់គណ:កម្មាធិការនានារបស់ក្រុមប្រឹក្សាខេត្ត និង របាយការណ៍របស់ការិយាល័យប្រជាពលរដ្ឋខេត្តព្រះសីហនុ -គណៈកម្មាធិការពិគ្រោះ យោបល់កិច្ចការស្ត្រីនិងកុមារ, -គណៈកម្មាធិការលទ្ធកម្មខេត្ត, -គណៈកម្មាធិការសម្រប សម្រួលបច្ចេកទេសខេត្ត, -គណៈកម្មាធិការគ្រប់គ្រងមណ្ឌលអភិវឌ្ឍន៍ធនធានមនុស្ស -គណៈកម្មាធិការរៀបចំដែនដីនគរូបនីយកម្មនិងសំណង់ខេត្ត, -ការិយាល័យប្រជា ពលរដ្ឋខេត្តព្រះសីហនុ និង៩-ផ្សេងៗ។

ឯកឧត្តម ជាម ហ៊ីម ប្រធានក្រុមប្រឹក្សាខេត្តព្រះសីហនុ បានកោតសរសើរ និងវាយ តម្លៃ ចំពោះការខិតខំប្រឹងប្រែងរបស់រដ្ឋបាលខេត្ត មន្ទីរ អង្គភាព បានបំពេញការងារតាម តួនាទីភារកិច្ចបានល្អ ដោយការទទួលខុសត្រូវ ដូចជាការចូលរួមអប់រំ ផ្សព្វផ្សាយទប់ស្កាត់ ការឆ្លងជំងឺកូវីដ-១៩ នៅក្នុងសហគមន៍ ម្យ៉ាងទៀតការតាមដានប្រជាពលរដ្ឋចំណាកស្រុកវិល មកពីប្រទេសថៃជាដើម។

ឯកឧត្តម ជាម ហ៊ីម បន្តថា ដោយមានការចូលរួមពីអាជ្ញាធរមូលដ្ឋាន កងកម្លាំង ប្រដាប់អាវុធក្នុងការងារការពារសន្តិសុខ សុវត្ថិភាពជូនបងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិមកលេងកម្សាន្តឆ្លងឆ្នាំសកល២០២០-២០២១ នៅតាមបណ្តោយឆ្នេរនានា ក្នុង ក្រុងព្រះសីហនុមានចំនួនច្រើន ទោះបីកម្ពុជាកំពុងប្រឈមនឹងជំងឺឆ្លងកូវីដ១៩ ក៏ដោយ ក៏មាន ភ្ញៀវទេសចរមកលេងខេត្តមាត់សមុទ្ររបស់យើងដដែល នេះសរបញ្ជាក់ថា ខេត្តព្រះសីហនុ មានការទាក់ទាញកាន់តែខ្លាំង ដោយសាររាជរដ្ឋាភិបាលបានសាងសង់ ហេដ្ឋារចនា សម្ព័ន្ធនានា មានផ្លូវ៣៤ខ្សែ ការរៀបចំឆ្នេរលំហែកាយកាន់តែច្រើននៅក្នុងក្រុងព្រះសីហនុ សង្ឃឹមថា ភ្ញៀវទេសចរ និងប្រជាពលរដ្ឋមកពីបណ្តាខេត្តនានាមក លេងកម្សាន្ត ខេត្តព្រះសីហនុ ក្នុងឱកាសបុណ្យជាតិ និងពិធីបុណ្យផ្សេងៗកាន់តែច្រើន បន្ថែមទៀតនា ពេលខាងមុខ៕

ដោយ ងូ សុមុនី