AKP បាត់ដំបង ថ្ងៃទី០៥ ខែមករា ឆ្នាំ២០២១--នៅរសៀលថ្ងៃ៦រោច ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃចន្ទ ទី០៤ ខែមករា ឆ្នាំ២០២១ ឯកឧត្តម ងួន រតនៈ អភិបាលខេត្តបាត់ដំបង បានដឹកនាំក្រុមការងារ ចុះត្រួតពិនិត្យការដ្ឋានសាងសង់ផ្លូវក្រាលបេតុងមួយខ្សែ នៅភូមិអង់ សង្កាត់អូរចារ ក្រុងបាត់ដំបង ដើម្បីសម្រួលដល់ការធ្វើដំណើររបស់ប្រជាពលរដ្ឋឱ្យកាន់ តែប្រសើរជាងមុន និងជាពិសេសដើម្បីលើកសោភណភាពក្រុងបាត់ដំបងផងដែរ ។ 

ផ្លូវបេតុងមួយខ្សែ ដែលមានបណ្ដោយ ១.៨០០ម៉ែត្រ និងទទឹង៦ម៉ែត្រ ត្រូវបានកសាងឡើងដោយគម្រោងថវិការបស់រដ្ឋបាលខេត្តបាត់ដំបង ដែលមានទីតាំងចាប់ពីសាលាបឋមសិក្សាអូរតាគាំ១ ដល់ផ្លូវជាតិលេខ៥ ដើម្បីបម្រើនូវផលប្រយោជន៍ប្រជាពលរដ្ឋ ក្នុងការធ្វើដំណើរ ការប្រាស័យទាក់ទងគ្នាទៅវិញទៅមក និងការដឹកជញ្ជូនទំនិញ កសិផលនានាផងដែរ ក្រោយពីរងការខូចខាតអស់ជាច្រើនឆ្នាំ និងជាពិសេសរងការខូចខាតដោយទឹកជំនន់កន្លងមកនោះ ។

ឆ្លៀតក្នុងឱកាសនោះ ឯកឧត្តម ងួន រតនៈ អភិបាលខេត្តបាត់ដំបងក៏បានឆ្លៀតសួរសុខទុក្ខប្រជាពលរដ្ឋតាមបណ្ដោយផ្លូវ និងសូមឱ្យមានការយោគយល់ដល់ក្រុមការដ្ឋានសាងសង់ផ្លូវ ជាពិសេសសូមឱ្យមានការអាធ្យាស្រ័យគ្នាទៅវិញទៅមក ដើម្បីឱ្យការស្ថាបនាប្រកប ដោយរលូន ហើយចូលរួមថែរក្សាសម្បត្តិសាធារណៈឱ្យបានគង់វង្សជាប់បានយូរអាចប្រើប្រាស់បានរាប់ឆ្នាំ រហូតដល់កូនចៅជំនាន់ក្រោយផងដែរ ៕

ដោយ ណយ នឿន (ប្រភព:រដ្ឋបាលខេត្តបាត់ដំបង)