AKPបន្ទាយមានជ័យថ្ងៃទី១៤ខែមិថុនាឆ្នាំ២០២៦--- ក្នុងគោលបំណងពង្រឹងប្រសិទ្ធភាពការងារអភិវឌ្ឍន៍មូលដ្ឋាន និងឆ្លើយតបឱ្យចំតម្រូវការជាក់ស្តែងរបស់ប្រជាពលរដ្ឋ ក្រុមការងាររាជរដ្ឋាភិបាលចុះមូលដ្ឋានស្រុកអូរជ្រៅខេត្តបន្ទាយ មានជ័យ បាននិងកំពុងមមាញឹកយ៉ាងខ្លាំងក្នុងការចុះជួបសំណេះសំ ណាលផ្ទាល់ជាមួយប្រជាពលរដ្ឋតាមបណ្តាឃុំនានា។ សកម្មភាពនេះ មិនត្រឹមតែជាការស្តាប់ពីបញ្ហាប្រឈមប៉ុណ្ណោះទេ ប៉ុន្តែគឺជាយន្តការមួយដែលផ្តល់ដំណោះស្រាយបានភ្លាមៗនៅនឹងកន្លែង។
 
ថ្លែងក្នុងវេទិកាសាធារណៈកាលពីថ្ងៃទី១៣ ខែមិថុនា ឆ្នាំ២០២៦ កន្លងទៅនេះ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកអូរជ្រៅ បានគូសបញ្ជាក់យ៉ាងច្បាស់អំពីសារសំខាន់នៃវេទិកានេះថាការចូលរួមរបស់បងប្អូនប្រជាពលរដ្ឋ គឺជាកញ្ចក់ឆ្លុះបញ្ចាំងយ៉ាងសំខាន់ ដើម្បីឈានទៅរកការអភិវឌ្ឍមូលដ្ឋានរបស់យើងឱ្យកាន់តែរីកចម្រើន និងមានប្រសិទ្ធភាពខ្ពស់។

គិតមកដល់ពេលនេះ ក្រុមការងាររាជរដ្ឋាភិបាលបានរៀបចំវេទិកាសា ធារណៈចំនួន ៤ លើក ដោយមានការចូលរួមពីប្រជាពលរដ្ឋជិត ១,០០០ នាក់ មកពីឃុំកូប ឃុំសំរោង ឃុំគុត្តសត និងឃុំចង្ហារ។ តាមរយៈវេទិកាទាំងនេះ ក្រុមការងារបានទទួលសំណើ និងសំណូមពរសរុបចំនួន ៤០ ករណី ដែលផ្តោតសំខាន់លើការអភិវឌ្ឍហេដ្ឋារចនាសម្ព័ន្ធក្នុងមូលដ្ឋាន បញ្ហាសន្តិសុខសណ្តាប់ធ្នាប់សាធារណៈ និងបញ្ហាថ្លៃកសិផលជាដើម។​ លទ្ធផលនៃការដោះស្រាយដ៏គួរឱ្យកត់សម្គាល់របស់ក្រុមការងារ រួមមានដោះស្រាយជូនភ្លាមៗនៅនឹងកន្លែង២៨ ករណី។ករណីបន្តដោះស្រាយនៅថ្នាក់ខេត្ត និងថ្នាក់ជាតិ ១២ ករណី។ 
 ឯកឧត្តម ឃឹម ហ្វីណង់ បានសង្កត់ធ្ងន់ថា ការដោះស្រាយបញ្ហាបានរហ័សបែបនេះ គឺឆ្លុះបញ្ចាំងពីការយកចិត្តទុកដាក់របស់រាជរដ្ឋាភិបាលក្នុងការចុះជាប់ជាមួយមូលដ្ឋាន ដើម្បីស្តាប់កង្វល់ និងដោះស្រាយការលំបាកជូនប្រជាពលរដ្ឋឱ្យបានទាន់ពេលវេលា។
សម្រាប់ផែនការបន្ត ក្រុមការងារគ្រោងនឹងបន្តចុះរៀបចំវេទិកាសាធារណៈនៅតាមឃុំចំនួន ៣ ទៀតដែលនៅសេស សល់ ដើម្បីឱ្យសម្រេចបាននូវការគ្របដណ្តប់ទូទាំងស្រុកអូរជ្រៅ ស្របតាមផែនការដែលបានកំណត់ទុកថានឹងបញ្ចប់នៅក្នុងខែមិថុនា ឆ្នាំ២០២៦ នេះ។

តាមរយៈការដាក់ចុះនូវយន្តការវេទិកា សាធារណៈនេះ បានបង្ហាញយ៉ាងច្បាស់ថា ភាពជោគជ័យនៃការអភិវឌ្ឍមូល ដ្ឋាន គឺកើតចេញពីការចូលរួម និងការផ្តល់មតិយោបល់ដោយផ្ទាល់ពីប្រជាពលរដ្ឋ ដែលជាមូលដ្ឋានគ្រឹះដ៏រឹងមាំក្នុងការកសាងស្រុកអូរជ្រៅឱ្យកាន់តែមានសុវត្ថិភាព និងវិបុលភាព៕

ដោយ៖ឈុនសារ៉ាត