AKP បន្ទាយមានជ័យ ថ្ងៃទី២៣ ខែឧសភា ឆ្នាំ២០២៦--ស្មារតី «មិនបោះបង់ពលរដ្ឋណាម្នាក់» របស់រាជរដ្ឋាភិបាលកម្ពុជា ត្រូវបានស្តែងចេញយ៉ាងច្បាស់តាមរយៈសកម្មភាពចុះជួបផ្ទាល់ និងផ្តល់ភាពកក់ក្តៅដល់បងប្អូនពលករខ្មែរ។ កាលពីរសៀលថ្ងៃសុក្រ ទី២២ ខែឧសភា ឆ្នាំ២០២៦ ម្សិលមិញនេះ ឯកឧត្តមបណ្ឌិត ប៉ាន់ខែម ប៊ុនថន នាយករងខុទ្ទកាល័យសម្តេចធិបតីនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះជួយមូលដ្ឋានក្រុងប៉ោយប៉ែត បានអញ្ជើញចុះជួបសំណេះសំណាល និងទទួលស្វាគមន៍យ៉ាងកក់ក្តៅចំពោះបងប្អូនពលករចំណាកស្រុក ដែលបានវិលត្រឡប់មកពីប្រទេសថៃ តាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ។

ផ្ដោតលើការយកចិត្តទុកដាក់ និងមនោសញ្ចេតនាដ៏ជ្រាលជ្រៅនេះ ឯកឧត្តមបណ្ឌិត ប៉ាន់ខែម ប៊ុនថន បានគូសបញ្ជាក់ថា «រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្ដេចធិបតី តែងតែគិតគូរ រួមសុខរួមទុក្ខ និងមិនដែលបោះបង់បងប្អូនពលរដ្ឋខ្មែរណាម្នាក់ឡើយ ទោះបីស្ថិតក្នុងកាលៈទេសៈណាក៏ដោយ។ បងប្អូនវិលត្រឡប់មកវិញទីនេះ គឺមកកាន់ផ្ទះ មករកទឹកដីកំណើតវិញដោយសុវត្ថិភាព និងភាពកក់ក្ដៅបំផុត»។

នៅក្នុងសកម្មភាពមនុស្សធម៌ និងពោរពេញដោយទឹកចិត្តនេះ ក៏មានការអញ្ជើញចូលរួមពី លោក គាត ហ៊ុល អភិបាលនៃគណៈអភិបាលក្រុងប៉ោយប៉ែត ព្រមទាំង លោកឧត្ដមសេនីយ៍ត្រី អុី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត និងមន្ដ្រីជំនាញពាក់ព័ន្ធជាច្រើនរូបទៀត។

ដើម្បីសម្រាលការនឿយហត់របស់បងប្អូនពលករ ថ្នាក់ដឹកនាំ និងមន្ត្រីជំនាញបាននាំយកអាហារសម្រន់ជា នំប៉័ង និងទឹកសុទ្ធ ចែកជូនដល់ពួកគាត់គ្រប់ៗគ្នា ម្នាក់ៗទទួលបាននំប៉័ង ១ដើម និងទឹកសុទ្ធ ១ដប ឆ្លុះបញ្ចាំងពីការគិតគូរភ្លាមៗដល់សុខុមាលភាពបឋមរបស់ប្រជាពលរដ្ឋ។

យោងតាមរបាយការណ៍ពី លោកឧត្ដមសេនីយ៍ត្រី អុី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានឱ្យដឹងថា នៅវេលាម៉ោង ១៣និង៤០នាទី រសៀលថ្ងៃដដែល ក្រោមការដឹកនាំបញ្ជាផ្ទាល់ពីរូបលោក មន្ត្រីជំនាញបានទទួលពលរដ្ឋខ្មែរឆ្លងដែនខុសច្បាប់ ដែលអាជ្ញាធរថៃបញ្ជូនមកវិញ សរុបចំនួន ៥៧នាក់ (ក្នុងនោះមាន ស្រី ២១នាក់ និងកុមារ ០៥នាក់)។

បន្ទាប់ពីទទួលបានការស្វាគមន៍ និងការចែកជូនអាហារសម្រន់រួចរាល់ អនុវត្តតាមការណែនាំដ៏ខ្ពង់ខ្ពស់របស់លោកឧត្តមសេនីយ៍ទោ ប្រធាននាយកដ្ឋានច្រកទ្វារទី១  មន្ត្រីប៉ុស្តិ៍នគរបាលព្រំដែន បានធ្វើការសម្រង់សាវតាតម្កល់ទុកនៅអង្គភាពដើម្បីគ្រប់គ្រងទិន្នន័យ។
ក្រុមការងារបានជួយដឹកជញ្ជូនបងប្អូនពលរដ្ឋទាំងអស់ យកទៅប្រគល់ជូនមន្ត្រីនៃមជ្ឈមណ្ឌលសំចតប៉ោយប៉ែតដើម្បីបន្តអនុវត្តនីតិវិធី និងជួយសម្របសម្រួលបញ្ជូនពួកគាត់ទៅកាន់ស្រុកកំណើតជួបជុំគ្រួសារវិញ ប្រកបដោយសុវត្ថិភាព និងសេចក្តីថ្លៃថ្នូរបំផុត៕

ដោយ ឈុន សារ៉ាត