AKP ភ្នំពេញ ថ្ងៃទី២៦ ខែតុលា ឆ្នាំ២០២៦ -- ប្រធានាធិបតីអ៊ុយក្រែនលោក វូឡូឌីមៀ ហ្សេលេនស្គី (Volodymyr Zelensky) បានថ្លែងថាអ៊ុយក្រែនត្រៀមខ្លួនរួចរាល់ហើយក្នុងការផ្អាកប្រតិបត្តិការប្រយុទ្ធនៅតាមខ្សែត្រៀមមុខបច្ចុប្បន្ន ដើម្បីបញ្ចប់ជម្លោះនេះឱ្យបានឆាប់រហ័ស ប៉ុន្តែលោកបានបដិសេធយ៉ាងដាច់អហង្ការចំពោះការយល់ព្រមបោះបង់ទឹកដី។

នៅក្នុងបទសម្ភាសន៍ជាមួយបណ្តាញព័ត៌មាន ABC News លោកហ្សេលេនស្គី បានបង្ហាញឆន្ទៈក្នុងការឈានដល់កិច្ចព្រមព្រៀងបទឈប់បាញ់ ប៉ុន្តែបានបដិសេធសំណើដែលស្នើឱ្យអ៊ុយក្រែនបោះបង់ទឹកដីចំនួន២៥%។

លោក ហ្សេលេនស្គី ក៏បានសម្តែងការសោកស្តាយចំពោះការថយចុះនៃជំនួយយោធាពីសហរដ្ឋអាមេរិកនាពេលថ្មីៗនេះ ដោយលោកបានបញ្ជាក់ថា ក្នុងរយៈពេល ៣ខែចុងក្រោយនេះ អ៊ុយក្រែនទទួលបានមីស៊ីលស្ទាក់ចាប់ចំនួន ២៤គ្រាប់ប៉ុណ្ណោះសម្រាប់ប្រព័ន្ធការពារដែនអាកាស របស់ខ្លួនដែលចំនួននេះគឺតិចជាងតម្រូវការប្រចាំខែជាមធ្យមចំនួន ៣៥០គ្រាប់យ៉ាងខ្លាំង។ លោកបានសង្កត់ធ្ងន់លើភាពបន្ទាន់នៃស្ថានភាពនេះដោយលើកឡើងថា មានមីស៊ីលផ្លោង (ballistic missiles) ចំនួន ៣០គ្រាប់បានវាយប្រហារទីក្រុងគៀវ។

ទន្ទឹមនឹងនេះ ប្រព័ន្ធផ្សព្វផ្សាយអាមេរិកបានរាយការណ៍ថា មានសម្ពាធកាន់តែខ្លាំងឡើងពីទីក្រុងវ៉ាស៊ីនតោនទៅលើលោក ហ្សេលេនស្គី ឱ្យធ្វើការសម្បទានដើម្បីធានាបាននូវកិច្ចព្រមព្រៀងសន្តិភាព ខណៈដែលប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានស្តីបន្ទោសទីក្រុងគៀវជាច្រើនដង ចំពោះការខ្វះវឌ្ឍនភាពនៅក្នុងកិច្ចចរចាដែលមានសហរដ្ឋអាមេរិកជាអ្នកសម្របសម្រួល។

អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov)បានថ្លែងថា កិច្ចចរចាត្រីភាគីរវាងរុស្ស៊ី អ៊ុយក្រែន និងសហរដ្ឋអាមេរិកគ្រោងនឹងធ្វើឡើងនៅទីក្រុងអាប៊ូដាប៊ី ជារដ្ឋធានីនៃប្រទេសអេមីរ៉ាតអារ៉ាប់រួម (UAE) នៅក្នុងពាក់កណ្តាលដំបូងនៃខែវិច្ឆិកា។ កិច្ចចរចានេះនឹងផ្តោតសំខាន់លើការរៀបចំសន្តិសុខសម្រាប់រុស្ស៊ី និងអ៊ុយក្រែន បន្ទាប់ពីមានការសម្រេចបាននូវកិច្ចព្រមព្រៀងសន្តិភាព៕

ដោយ៖ មូល មិនា (ប្រភព៖ ស៊ីនហួ)