AKP ភ្នំពេញ ថ្ងៃទី២៦ ខែតុលា ឆ្នាំ២០២៦--ឯកឧត្តមបណ្ឌិតទេសរដ្ឋមន្រ្តី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) បានលើកឡើងថា ទិវារត់ប្រណាំងរត់ប្រណាំងកម្សាន្ត (AIA PINK RUN) លើកទី៤ ឆ្នាំ២០២៦ នៅមុខសួនច្បារវត្តបទុមវតី រាជធានីភ្នំពេញទទួលបានអ្នកចូលរួមសរុប ៣៦១៥នាក់ មកពី៣៦ប្រទេស។

ឯកឧត្តម ថោង ខុន មានប្រសាសន៍ថា ព្រឹត្តិការណ៍រត់កម្សាន្ដ AIA Pink Run លើកទី៤ ដែលបានប្រារព្ធធ្វើឡើងកាលពីព្រឹកថ្ងៃទី២៥ ខែតុលា ឆ្នាំ២០២៦ គឺដើម្បីជំរុញយុទ្ធនាការ ប្រជាជនម្នាក់លេងកីឡាមួយប្រភេទប្រចាំជីវិត ក៏ដូចជាលើកកម្ពស់ការយល់ដឹង និងទប់ស្កាត់ជំងឺមហារីកសុដន់នៅកម្ពុជា។ ក្នុងចំនួន ៣៦១៥នាក់ គឺក្នុងនោះគឺមានអត្តពលិកខ្មែរ ៣២១០នាក់ និងអន្តរជាតិ ៤០៥ នាក់ មកពី ៣៦ប្រទេស ក្នុងនោះប្រទេសចូលរួមច្រើនជាងគេ រួមមាន៖ ហ្វីលីពីន, សហរដ្ឋអាមេរិក, ព្រីតថេន, ជប៉ុន និងអូស្ត្រាលី។

វិញ្ញាសារត់ប្រណាំង ១០គីឡូម៉ែត្រ ដែលជាវិញ្ញាសាគោលនៃព្រឹត្តិការណ៍ទទួលបានអ្នករត់ ១៥១២នាក់ (ខ្មែរ ១២៧៩នាក់ និងបរទេស ២៣៣នាក់។ វិញ្ញាសារត់ ៥គីឡូម៉ែត្រ ទទួលបានអ្នករត់ ១២៣៣នាក់ (ខ្មែរ ១១០៩នាក់ បរទេស ១២៤នាក់ និងវិញ្ញាសារត់ ២,៥គីម៉ែត្រ ទទួលបានអ្នករត់ ៨៧០នាក់ (ខ្មែរ ៨២២នាក់ និងបរទេស ៤៨នាក់)។

ជាមួយគ្នានេះ ឯកឧត្តមបណ្ឌិតទេសរដ្ឋមន្ត្រី ថោង ខុន បានថ្លែងអំណរគុណចំពោះការគាំទ្រ និងចូលរួមរបស់អត្តពលិកជាតិ-អន្តរជាតិ និងដៃគូឧបត្ថម្ភធំដោយក្រុមហ៊ុនធានារ៉ាប់រង AIA និងដៃគូសហការឧបត្ថម្ភដោយគ្រឹះស្ថានមីក្រូហិរញ្ញវត្ថុ Amret, ធានាគារ UCB, ភេសជ្ជៈ V-Active, Hi-Tech និង Sunway Medical Center។ ឯកឧត្តមបណ្ឌិតក៏បានថ្លែងអំណរគុណដល់សាលារាជធានីភ្នំពេញ និងអាជ្ញាធរពាក់ព័ន្ធ ដែលបានសហការជួយរក្សាសន្តិសុខ ការសង្គ្រោះ និងសុវត្ថិភាពចរាចរ ក្នុងព្រឹត្តិការណ៍រត់ប្រណាំងនេះ។

ជាមួយគ្នានេះ ឯកឧត្តម វ៉ាត់ ចំរើន អគ្គលេខាធិការ NOCC គូសបញ្ជាក់នៅក្នុងបទសម្ភាសន៍ក្រោយបញ្ចប់ការត់ថា នេះជាព្រឹត្តិការណ៍រត់ប្រណាំង ដែលជួយដល់ស្ត្រីក្នុងពិនិត្យ-ព្យាបាលមហារីកសុដន់ផងដែរ។ គណៈកម្មាធិការជាតិអូឡាំពិកកម្ពុជាតែងតែទទួលបានការអនុញ្ញាតជាគោលការណ៍ពីរាជរដ្ឋាភិបាលកម្ពុជា សាលារាជធានីភ្នំពេញ និងដៃគូឧបតម្ថម្ភធំ AIA ព្រមទាំងដៃគូសហការជាច្រើនទៀត ជំរុញឱ្យការរៀបចំរបស់គណៈកម្មការធ្វើបានល្អប្រសើរជាឆ្នាំមុនៗច្រើន តាមរយៈគុណភាពនៃការរៀបចំ។ នៅក្នុងព្រឹត្តិការណ៍នេះ ស្ត្រីរាប់ពាន់នាក់បានចូលរួមទទួលសេវាពិនិត្យមហារីកសុដន់ដោយឥតគិតថ្លៃផង និងបានចូលរួមរត់ប្រណាំងកម្សាន្តសប្បាយរីករាយផង និងទទួលបានសុខភាពល្អផងដែរ៕

ដោយ ហេង ណាលីន (រូបភាព៖ យឹម សុវឌ្ឍនា)