AKP ភ្នំពេញ ថ្ងៃទី២០ ខែតុលា ឆ្នាំ២០២៦--គណៈកម្មាធិការសេដ្ឋកិច្ច និងធុរកិច្ចឌីជីថល(គ.ស.ធ.ឌ.)និងក្រសួងសេដ្ឋកិច្ច និងហិរញ្ញវត្ថុ ក្រោមការគាំទ្រថវិកាដោយមូលនិធិអភិវឌ្ឍន៍ជំនាញ កាលពីថ្ងៃទី១៩ ខែតុលា ឆ្នាំ២០២៦ បានរៀបចំបើកវគ្គទី១៣ នៃការបណ្តុះបណ្តាលមូលដ្ឋាននៃការចាប់យកឌីជីថលសម្រាប់សេដ្ឋកិច្ចក្រៅប្រព័ន្ធ បានប្រព្រឹត្តទៅដោយរលូនចាប់តាំងពីវគ្គទ្រឹស្តីរហូតដល់ការអនុវត្តជាក់ស្តែង ដោយសិក្ខាកាមបានទទួលការសម្របសម្រួល និងការណែនាំយ៉ាងយកចិត្តទុកដាក់ពីគ្រូបង្គោលរួមជាមួយនឹងក្រុមការងារ។

តាមរយៈការបណ្តុះបណ្តាលនេះ សិក្ខាកាមគ្រប់រូបបានសិក្សា និងអនុវត្តផ្ទាល់លើជំនាញឌីជីថលសំខាន់ៗ រួមមាន ការពង្រឹងសុវត្ថិភាព និងការការពារគណនីហ្វេសប៊ុក (Facebook) ការបង្កើត និងរៀបចំទំព័រហ្វេសប៊ុក (Facebook Page) ការរចនាមាតិកាផ្សព្វផ្សាយ (Content Creation) តាមរយៈ Canva បច្ចេកទេសថត និងកាត់តវីដេអូនៅលើទូរសព្ទដៃ ការយល់ដឹងមូលដ្ឋាននៃប្រព័ន្ធគ្រប់គ្រងការលក់ (POS System) ដែលជំនាញទាំងនេះ គឺជាជំហានដ៏សំខាន់មួយក្នុងការចាប់ផ្តើមការប្រើប្រាស់ឧបករណ៍ឌីជីថលសម្រាប់ពង្រឹងការគ្រប់គ្រង និងពង្រីកឱកាសអាជីវកម្ម។ 

ក្រុមការងាររៀបចំវគ្គបណ្តុះបណ្តាលបានវាយតម្លៃខ្ពស់ចំពោះសិក្ខាកាមទាំងអស់ ដែលបានចំណាយពេលវេលាមានតម្លៃចូលរួមយ៉ាងសកម្ម និងសហការយ៉ាងល្អប្រសើរ។ សម្រាប់ការចូលរួមវគ្គបន្ទាប់ សូមចុះឈ្មោះតាមរយៈ៖ https://forms.gle/E9joG1Jd13vyaJYa9៕

ដោយ ចាន់ សុភឿន (ប្រភព៖ គណៈកម្មាធិការសេដ្ឋកិច្ច និងធុរកិច្ចឌីជីថល)