AKP ភ្នំពេញ ថ្ងៃទី២០ ខែតុលា ឆ្នាំ២០២៦--លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នៃព្រះរាជាណាចក្រកម្ពុជា នារសៀលថ្ងៃទី១៩ ខែតុលា ឆ្នាំ២០២៦ បានអញ្ជើញទស្សនាពន្លាជាតិកម្ពុជា ក្នុងព្រឹត្តិការណ៍ពិព័រណ៍ម្ហូបអាហារអន្តរជាតិ Salon International de l'Alimentation (SIAL) Paris 2026 ដែលបានរៀបចំធ្វើឡើងនៅមជ្ឈមណ្ឌលពិព័រណ៍ Paris Nord Villepinte នារដ្ឋធានីប៉ារីស សាធារណរដ្ឋបារាំង ដោយមានការចូលរួមជាកិត្តិយសពីសំណាក់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងគណៈប្រតិភូអម តំណាងស្ថានឯកអគ្គរាជទូត នៃព្រះរាជាណាចក្រកម្ពុជា ប្រចាំសាធារណរដ្ឋបារាំង តំណាងគម្រោង EU-German GATE នៃអង្គការ GIZ កម្ពុជា និងតំណាងក្រុមហ៊ុន-សហគ្រាសកម្ពុជា និងដៃគូពាណិជ្ជកម្មអន្តរជាតិជាច្រើនរូប។

សូមជម្រាបផងដែរថា ក្រសួងពាណិជ្ជកម្ម ក្រោមកិច្ចសហការពីសហភាពអឺរ៉ុប និងរដ្ឋាភិបាលសហព័ន្ធអាល្លឺម៉ង់បានរៀបចំពន្លាជាតិកម្ពុជា (Cambodia Pavilion) ក្រោមមូលបទ «Cambodia: Basket of Wonders» ក្នុងគោលដៅលើកកម្ពស់វត្តមាន និងកិត្យានុភាពរបស់កម្ពុជា ជំរុញការនាំចេញ និងពង្រឹងឧត្តមភាពប្រកួតប្រជែងរបស់កម្ពុជាក្នុងនាមជាដៃគូផ្គត់ផ្គង់ដ៏មានទំនុកចិត្តនៅលើទីផ្សារអន្តរជាតិ។ ពន្លាជាតិកម្ពុជាមានការរចនាលេចធ្លោ រំលេចអំពីអត្តសញ្ញាណខ្មែរ និងបាននាំមកនូវបណ្តាក្រុមហ៊ុន-សហគ្រាសកម្ពុជាចំនួនប្រមាណ ១៦ ជាមួយនឹងផលិតផលសក្តានុពលខ្ពស់មកតាំងបង្ហាញ ដូចជា ស្វាយចន្ទី ផ្លែឈើសម្ងួត (ជាពិសេសស្វាយសម្ងួត) ម្រេច គ្រឿងទេស និងម្ហូបពាក់កណ្តាលសម្រេច (Ready-to-Cook) ព្រមទាំងផលិតផលផ្សេងៗជាច្រើនទៀត។

បន្ថែមលើនេះ ក្រសួងពាណិជ្ជកម្មក៏បានរៀបចំជាតុសម្រាប់ប្រជុំពិភាក្សាតភ្ជាប់ធុរកិច្ច តុតាំងបង្ហាញផលិតផល ការសម្តែងសិល្បៈ កន្លែងផ្តល់ព័ត៌មានពាណិជ្ជកម្ម កន្លែងសម្រាប់បង្ហាញអំពីការចម្អិនអាហារខ្មែរ និងចែកជូនភ្ញៀវអន្តរជាតិភ្លក្ស ព្រមទាំងបានអញ្ជើញអ្នកបញ្ជាទិញ អ្នកចែកចាយ និងវិនិយោគិនអន្តរជាតិមកទស្សនាស្វែងយល់ពីសក្តានុពលផលិតផលកម្ពុជា និងពិភាក្សាស្វែងរកកាលានុវត្តភាពសហប្រតិបត្តិការធុរកិច្ចថ្មីៗដោយផ្ទាល់នៅទីតាំងពន្លាជាតិកម្ពុជាផងដែរ។

គួរកត់សម្គាល់ថា ព្រឹត្តិការណ៍ពិព័រណ៍ពាណិជ្ជកម្មម្ហូបអាហារអន្តរជាតិ SIAL Paris 2026 នេះ ប្រព្រឹត្តទៅចាប់ពីថ្ងៃទី១៧ ដល់ថ្ងៃទី២១ ខែតុលា ឆ្នាំ២០២៦ ដោយមានក្រុមហ៊ុនចូលរួមតាំងបង្ហាញប្រមាណជិត ៨,០០០ មកពី ១៣០ប្រទេស ដែលរំពឹងថានឹងមានអ្នកទស្សនាធុរកិច្ច (Trade Visitors) ប្រមាណជាង ២៨៥,០០០នាក់៕

ដោយ ចាន់ សុភឿន (ប្រភព៖ ក្រសួងពាណិជ្ជកម្ម)