AKP បន្ទាយមានជ័យ ថ្ងៃទី១៩ ខែតុលា ឆ្នាំ២០២៦ -- រដ្ឋបាលស្រុកព្រះនេត្រព្រះ ខេត្តបន្ទាយមានជ័យ បានទទួលអង្ករសរុបចំនួន ១២តោន ពីថ្នាក់ដឹកនាំ ដើម្បីទុកជាស្បៀងបម្រុងសម្រាប់ត្រៀមជួយសង្គ្រោះប្រជាពលរដ្ឋដែលជួបការលំបាក ជាពិសេសគ្រួសារក្រីក្រ និងជនងាយរងគ្រោះក្នុងមូលដ្ឋាន ឱ្យទទួលបានស្បៀងអាហារគ្រប់គ្រាន់នៅពេលមានតម្រូវការចាំបាច់។

ការឧបត្ថម្ភនេះ រួមមានអង្ករចំនួន ៩តោន ពីឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ រួមជាមួយក្រុមការងារ និងអង្ករចំនួន ៣តោន ពីឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ដែលបានឧបត្ថម្ភដល់រដ្ឋបាលស្រុក កាលពីថ្ងៃទី១៨ ខែតុលា ឆ្នាំ២០២៦។

លោក ហឿន វីរៈ អភិបាលស្រុកព្រះនេត្រព្រះ បានសម្ដែងនូវការគោរព និងថ្លែងអំណរគុណយ៉ាងជ្រាលជ្រៅចំពោះឯកឧត្តម អ៊ុំ រាត្រី និងឯកឧត្តម គង់ ច័ន្ទវាសនា ព្រមទាំងក្រុមការងារទាំងអស់ ដែលបានផ្ដល់អង្ករជាស្បៀងបម្រុងដល់រដ្ឋបាលស្រុកសម្រាប់ត្រៀមចែកជូនប្រជាពលរដ្ឋដែលជួបការលំបាក គ្រួសារក្រីក្រ និងជនងាយរងគ្រោះនៅក្នុងមូលដ្ឋាន។

លោកអភិបាលស្រុក បានចាត់ទុកការឧបត្ថម្ភនេះថា ជាការបង្ហាញយ៉ាងច្បាស់ពីការយកចិត្តទុកដាក់ និងស្មារតីទទួលខុសត្រូវរបស់ថ្នាក់ដឹកនាំចំពោះសុខទុក្ខ និងជីវភាពរស់នៅរបស់ប្រជាពលរដ្ឋ ជាពិសេសអ្នកដែលមានជីវភាពខ្វះខាត និងត្រូវការជំនួយជាចាំបាច់។ អំណោយអង្ករទាំងនេះនឹងក្លាយជាធនធានស្បៀងដ៏សំខាន់សម្រាប់រដ្ឋបាលស្រុក ក្នុងការត្រៀមឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋនៅពេលមានហេតុការណ៍បន្ទាន់ ឬគ្រោះអាសន្នផ្សេងៗ។

ជាមួយគ្នានេះ លោក ហឿន វីរៈ បានបញ្ជាក់ថា ការមានស្បៀងបម្រុងនៅក្នុងមូលដ្ឋាន គឺជាកត្តាសំខាន់មួយក្នុងការជួយសម្រួលដល់ការឆ្លើយតបរបស់អាជ្ញាធរមូលដ្ឋានចំពោះគ្រួសារដែលកំពុងប្រឈមនឹងការខ្វះខាតស្បៀងអាហារ។ ការត្រៀមទុកជាមុននេះ ក៏ជួយឱ្យការផ្ដល់ជំនួយអាចធ្វើឡើងបានទាន់ពេលវេលា ស្របតាមស្ថានភាព និងតម្រូវការរបស់អ្នកទទួលផលផងដែរ។

ការឧបត្ថម្ភអង្ករចំនួន ១២តោននេះ មិនត្រឹមតែជាការចូលរួមចំណែកផ្នែកសម្ភារៈប៉ុណ្ណោះទេ ប៉ុន្តែថែមទាំងជាការលើកទឹកចិត្តដល់រដ្ឋបាលស្រុក និងអាជ្ញាធរមូលដ្ឋានឱ្យបន្តយកចិត្តទុកដាក់លើការងារសង្គមកិច្ច និងការជួយដល់ប្រជាពលរដ្ឋដែលត្រូវការជំនួយ។

ជាការឆ្លើយតប រដ្ឋបាលស្រុកព្រះនេត្រព្រះ បានបង្ហាញនូវការដឹងគុណចំពោះទឹកចិត្តសប្បុរសធម៌ និងការគាំទ្ររបស់ថ្នាក់ដឹកនាំ ព្រមទាំងប្ដេជ្ញាចិត្តបន្តសហការជាមួយក្រុមការងារ និងអាជ្ញាធរពាក់ព័ន្ធ ដើម្បីត្រៀមស្បៀង និងជំនួយចាំបាច់ សម្រាប់ជួយប្រជាពលរដ្ឋដែលជួបការលំបាកឱ្យបានទាន់ពេលវេលា។

សកម្មភាពនេះ បានឆ្លុះបញ្ចាំងពីស្មារតីសាមគ្គីភាព ការចែករំលែក និងការយកចិត្តទុកដាក់ចំពោះសុខុមាលភាពប្រជាពលរដ្ឋ ដោយផ្ដោតលើគោលដៅរួម គឺជួយកាត់បន្ថយការលំបាកក្នុងជីវភាព និងធានាថា ប្រជាពលរដ្ឋក្រីក្រ និងជនងាយរងគ្រោះអាចទទួលបានការជួយគាំទ្រនៅពេលដែលពួកគេត្រូវការបំផុត។ នេះក៏ជាការបង្ហាញពីការបន្តពង្រឹងទំនាក់ទំនងរវាងថ្នាក់ដឹកនាំ អាជ្ញាធរមូលដ្ឋាន និងប្រជាពលរដ្ឋ ដើម្បីរួមគ្នាដោះស្រាយបញ្ហាប្រឈមក្នុងសហគមន៍ប្រកបដោយប្រសិទ្ធភាព៕

ដោយ៖ ឈុន សារ៉ាត