AKP ភ្នំពេញ ថ្ងៃទី១៨ ខែតុលា ឆ្នាំ២០២៦--

លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងជានាយកវិទ្យាស្ថាន CamEd បានអញ្ជើញប្រកាសបើកការប្រកួតបាល់ទាត់ហ្វូតសាលបុរស CamEd ឆ្នាំ២០២៦ (CamEd Men's Futsal Tournament 2026) ជាផ្លូវការនៅទីលានបាល់ទាត់ Platinum Sport Club ស្ថិតនៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញជាមួយនឹងការលើកទឹកចិត្តជំរុញឱ្យកីឡាករជានិស្សិតរប់ខ្លួនឱ្យចូលរួមលេងកីឡាដើម្បីសុខភាព មិត្តភាព និងសាមគ្គីភាព និងដណ្តើមជ័យលាភី សម្តៅស្វែងរកធនធានឆ្ពោះទៅចូលរួមប្រកួតត្រៀមការប្រកួតនានា ក្រោមការរៀបចំរបស់ក្រសួងអប់រំ យុវជន និងកីឡា។

លោក ខេស៊ី បាណេត បានលើកឡើងថា ការបញ្ជូនកីឡាក្នុងឧត្តសិក្សា គឺសំខាន់សម្រាប់បំផុសគំនិតឱ្យកីឡាករជានិស្សិតចេះធ្វើការជាក្រុម ចេះធ្វើការក្រោមសម្ពាធ ខិតខំពុះពារគ្រប់ឧបសគ្គ ក្នុងការងារ និងទទួលបានបទពិសោធន៍ការប្រកួត ក៏ដូចជាគោលបំណងក្នុងការរួមចំណែកផលិតធនធានកីឡាករ-កីឡាការិនីគ្រប់ប្រភេទកីឡានានា តាមរយៈការរៀបចំការប្រកួតជារៀងរាល់ឆ្នាំរបស់ខ្លួន ដែលជាប្រភពដ៏សំខាន់ ក្នុងការចូលរួមជួយអភិវឌ្ឍធនធាន អត្តពលិកជាមួយសហព័ន្ធកីឡាជាតិនានា។

លោកបញ្ជាក់ថា វិទ្យាស្ថានខេមអេដ និងគ្រឹះស្ថានឧត្តមសិក្សាផ្សេងៗទៀតកំពុងវិនិយោគក្នុងវិស័យកីឡាឱ្យកាន់តែរីកចម្រើន ក្នុងការប្រកួតប្រជែង ក្នុងកម្រិតឧត្តមសិក្សា។ ជាធម្មតា នៅប្រទេសផ្សេងៗ កីឡាករ-កីឡាការិនី នៅតាមកម្រិតឧត្តមសិក្សា គឺជាប្រភពដ៏សំខាន់ សម្រាប់ការជ្រើសរើសធនធានចូលរួម ជាមួយក្រុមជម្រើសជាតិ នៅតាមសហព័ន្ធកីឡាជំនាញនីមួយៗ។ ដូច្នេះហើយ បើយើងបង្កើតវប្បធម៌កីឡា ក្នុងវិស័យឧត្តមសិក្សា កាន់តែច្រើន វានឹងអាចជួយផ្តល់ធនធានកាន់តែច្រើនចូលរួមជាមួយជាតិ ក្នុងការត្រៀមឆ្ពោះទៅចូលរួមប្រកួតអន្តរជាតិផងដែរ។

នាយកវិទ្យាស្ថានរូបនេះគូសបញ្ជាក់ទៀតថា យើងចង់បង្កើតវប្បធម៌ នៃការលេងកីឡានៅប្រទេសកម្ពុជា ខណៈកម្ពុជាកំពុងត្រៀមឆ្ពោះទៅទទួលរៀបចំធ្វើម្ចាស់ផ្ទះការប្រកួតកីឡាយុវជនអាស៊ី ឆ្នាំ២០៣១។ យើងចង់ឱ្យនិស្សិតរបស់យើងធ្វើជាគំរូដល់យុវជនផ្សេងៗ ក្នុងការបំផុសស្មារតីចូលរួមលេងកីឡាដើម្បីឱ្យមានសុខភាពល្អ។ ការប្រកួតនេះមានកីឡាករបាល់ទាត់ក្នុងសាលជាង ២០០នាក់ស្មើនឹង១៨ក្រុម លោកបន្ថែមថា បើទោះបីជា ខេមអេដ ផ្តោតលើជំនាញគណនេយ្យ និងហិរញ្ញវត្ថុក្តី ក៏តាមរយៈការរៀបចំព្រឹត្តិការណ៍កីឡានេះជួយជំរុញឱ្យក្រុមអត្តពលិកជានិស្សិតរបស់ខ្លួនបានចូលរួមលេងកីឡា ដើម្បីសុខភាព មិត្តភាព និងសាមគ្គីភាព ជាពិសេសបណ្តុះឱ្យពួកគាត់ចេះធ្វើការជាក្រុម ចេះធ្វើការក្រោមសម្ពាធ ដើម្បីឱ្យពួកគាត់ទទួលបាននូវបទពិសោធទាំងកម្លាំង និងលទ្ធផលជោគជ័យ៕

ដោយ ហេង ណាលីន